୨୭ରେ ଭରତ ବନ୍ଦ କରିବା ପାଇଁ ମୁଜାଫରନଗରରେ ଆୟୋଜିତ କିଶାନ ମହାପଞ୍ଚାୟତରେ ନିଷ୍ପତ୍ତି ନିଆଯାଇଛି। ଚାଷ ଆଇନ ବିରୁଦ୍ଧରେ ଚାଲିଥିବା ଆନ୍ଦୋଳନକୁ ଆହୁରି ଆକ୍ରମଣାତ୍ମକ ଓ କ୍ରିୟାଶୀଳ କରିବା ଲକ୍ଷ୍ୟରେ ଏପରି ନିଷ୍ପତ୍ତି ନିଆଯାଇଛି । ଏହି ଦିନ ସାରା ଦେଶରେ ଟ୍ରେନ ଏବଂ ବସ ଯାତ୍ରା ବନ୍ଦ ରହିବ ବୋଲି ଚାଷୀ ନେତା କହିଛନ୍ତି। ଆଗକୁ ୟୁପିରେ ବିଧାନସଭା ନିର୍ବାଚନ ରହିଛି। ଏହା ପୂର୍ବରୁ ରବିବାର ୟୁପି ମୁଜାଫରନଗରରେ ବିଭିନ୍ନ ଚାଷୀ ସଂଗଠନର ନେତା ଏକାଠି ହୋଇ ଚାଷୀ ମହାପଞ୍ଚାୟତ କରିଛନ୍ତି। ଏହି ସମାବେଶ ଜରିଆରେ ଶାସକ ଦଳ ବିଜେପିକୁ ଆଗାମୀ ଦିନରେ ଘେରିବା ପାଇଁ ଚାଷୀ ମାନେ ଏକ ବଡ଼ ପ୍ରସ୍ତୁତି କରୁଛନ୍ତି ବୋଲି ଚେତାବନୀ ଦେଇଛନ୍ତି। 

ଭାରତ କିଷାନ ୟୁନିଅନର ନେତା ରାକେଶ ଟିକାୟତ, ନରେଶ ଟିକାୟତ, ୟୁନାଇଟେଡ କିଷାନ ମୋର୍ଚ୍ଚାର ନେତା ଯୋଗେନ୍ଦ୍ର ଯାଦବଙ୍କ ସମେତ ବହୁ ନେତା ଏକାଠି ହୋଇଥିଲେ। ଆଗାମୀ ଦିନରେ ହେବାକୁ ଥିବା ଉତ୍ତରପ୍ରଦେଶ, ଉତ୍ତରାଖଣ୍ଡ ଏବଂ ଅନ୍ୟାନ୍ୟ ନିର୍ବାଚନରେ ବିଜେପି ବିରୋଧରେ ଏହି ସଂଗଠନ ରାଲି କରିବ ବୋଲି ସ୍ପଷ୍ଟ କରିଛନ୍ତି।

ଚାଷୀ ନେତା ନରେଶ ଟିକାୟତ କହିଛନ୍ତି ଯେ, ଚାଷୀ ଆନ୍ଦୋଳନର ଝଲକ ଆଜି ମୁଜାଫରନଗରରେ ଦେଖିବାକୁ ମିଳିଛି। ଏଠାରେ ପାଦ ରଖିବା ପାଇଁ ସ୍ଥାନ ନାହିଁ । ସେ କହିଛନ୍ତି, ୨୦୧୩ରେ ଆମ ସହିତ ବିଜେପି ବିଶ୍ୱାସଘାତକତା କରିଥିଲା। ହିନ୍ଦୁ ଓ ମୁସଲମାନ ମଧ୍ୟରେ ବିଜେପି ଦଙ୍ଗା କରାଏ କିନ୍ତୁ ଏବେ ଆମେ ସମସ୍ତେ ଏକାଠି ଅଛୁ। ଏହି ମୁଜାଫରନଗର ସମସ୍ତଙ୍କୁ ଭଲ ପାଇବା ଶିଖାଏ। ଆଗାମୀ ଦିନରେ ଆମେ ସମସ୍ତେ ଏକାଠି ହୋଇ ଶାସକ ଦଳ ବିଜେପିକୁ ଘେରିବୁ ବୋଲି ନରେଶ କହିଛନ୍ତି। 

Powered by Froala Editor