ଉତ୍ତରପ୍ରଦେଶରେ ଏବେ ଅଜଣା ଜ୍ୱରର ଭୟ ବ୍ୟାପିଛି । ସପ୍ତାହେ ଭିତରେ ପ୍ରାୟ ୧୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇସାରିଲାଣି । ବ୍ୟାପିଥିବା ଭାଇରାଲ ଫିଭରକୁ ରୋକିବା ପାଇଁ ସ୍ବତନ୍ତ୍ର ଟିମ ଗଠନ କରାଯାଇଛି । ଏହି ଟିମ୍‌ରେ ୫ ଜଣ ବିଶେଷଜ୍ଞ ରହିଛନ୍ତି । ଏହି ଟିମ ବିଭିନ୍ନ ଜିଲ୍ଲାରେ ଗାଁଗୁ ଗାଁ ବୁଲି ନମୂନା ସଂଗ୍ରହ କରୁଛନ୍ତି । ତେବେ ନମୂନା ନରୀକ୍ଷଣ ପରେ ଆଗାମୀ ପଦକ୍ଷେପ ନିଆଯିବ ବୋଲି କହିଛନ୍ତି ଡାକ୍ତରୀ ଟିମ ।  

ରିପୋର୍ଟ ଅନୁଯାୟୀ, ପ୍ରଭାବିତ ହୋଇଥିବା ଜିଲ୍ଲାଗୁଡ଼ିକ ମଧ୍ୟରେ ରାଜଧାନୀ ଲକ୍ଷ୍ନୌ, ଆଗ୍ରା, ମଥୁରା, ମେନ୍‌ପୁରୀ, ଏଟା, କାସଗଞ୍ଜ ଏବଂ ଫିରୋଜାବାଦର ରହିଛି। ଫିରୋଜାବାଦର କୌଶଲ୍ୟାନଗରରେ ଅଜଣା ଜ୍ୱରରେ ପୀଡିତ ଲୋକଙ୍କ ସଂଖ୍ୟା ସର୍ବାଧିକ । ପୀଡିତଙ୍କ ମଧ୍ୟରୁ ଅଧିକାଂଶ ଶିଶୁ ରହିଛନ୍ତି । କୁହାଯାଉଛି ଯେ, ଏପର୍ଯ୍ୟନ୍ତ ୩ ଜଣ ବୟସ୍କ ବ୍ୟକ୍ତିଙ୍କ ମୃତ୍ୟୁ ହୋଇଥିବାବେଳେ ଶିଶୁ ମୃତ୍ୟୁ ସଂଖ୍ୟା ୫୦ରେ ପହଞ୍ଚିଛି। 

ଫିରୋଜାବାଦର ସ୍ୱାସ୍ଥ୍ୟ ଅଧିକାରୀ ଡକ୍ଟର ନୀତା କୁଲସ୍ରେଷ୍ଟା କହିଛନ୍ତି, ବିଶେଷକରି ପିଲାମାନଙ୍କୁ ଏହି ଜ୍ବର ଅଧିକ ସଂକ୍ରମିତ କରୁଛି ଏବଂ ମୃତ୍ୟୁସଂଖ୍ୟା ମଧ୍ୟ ଅଧିକ ରହୁଛି । ଗତ ସପ୍ତାହରେ ୩୨ ଶିଶୁଙ୍କ ସମେତ ୪୦ ଜଣଙ୍କର ମୃତ୍ୟୁ ହୋଇଥିଲା। ଯଦିଓ ସରକାରୀ ଆକଳନକୁ ୧୦୦ରୁ ଅଧିକ ବୋଲି କୁହାଯାଉଛି । ଏହି ରୋଗ ଦ୍ୱାରା ଅଧିକ ପ୍ରଭାବିତ ଅଞ୍ଚଳ ହେଉଛି ଫୈଜୁଲ୍ଲାଗଞ୍ଜ । ଗତ ଶୁକ୍ରବାର ଏଠାରେ ୨୦ ଜଣ ଶିଶୁ ଭାଇରାଲ ଜ୍ୱରର ଶିକାର ହୋଇଛନ୍ତି। ବଳରାମପୁର ଡାକ୍ତରଖାନାରେ ପ୍ରତିଦିନ ୩୦ରୁ ଅଧିକ ଶିଶୁ ଚିକିତ୍ସା ପାଇଁ ଆସୁଛନ୍ତି । ସେହିଭଳି ସିଭିଲ ହସ୍ପିଟାଲରେ ପ୍ରତିଦିନ ୩୦ରୁ ୪୦ଟି ମାମଲା ଆସୁଛି ।

Powered by Froala Editor