ଆଲ୍ଲାହବାଦ: ଗାଈକୁ ଜାତୀୟ ପଶୁ ଏବଂ ଗୋ ସୁରକ୍ଷାକୁ ହିନ୍ଦୁ ମାନଙ୍କର ମୌଳିକ ଅଧିକାର ଭାବେ ଘୋଷଣା କରାଯିବା ଉଚିତ ବୋଲି ଆଲ୍ଲାହବାଦ ହାଇକୋର୍ଟ ଏକ ରାୟରେ ପ୍ରକାଶ କରିଛନ୍ତି । ଜଣେ ଗୋ-ହତ୍ୟାକାରୀର ଜାମିନ ନା ମଞ୍ଜୁର କରି କୋର୍ଟ କହିଛନ୍ତି ଯେ, ଆମେ ଜାଣୁ ଯେତେବେଳେ ଗୋଟିଏ ଦେଶର ସଂସ୍କୃତି ଓ ବିଶ୍ୱାସ ଉପରେ ଆଘାତ ଲାଗେ ସେତେବେଳେ ଦେଶ ଦୁର୍ବଳ ହୋଇଯାଏ । କୋର୍ଟ କହିଲେ ଯେ, ମୌଳିକ ଅଧିକାର କେବଳ ଗୋମଂସାଭକ୍ଷୀମାନଙ୍କ ପାଇଁ ନାହିଁ । ଯେଉଁମାନେ ଗାଈକୁ ପୂଜା କରନ୍ତି, ସେମାନେ ଆର୍ଥିକ ଦୃଷ୍ଟିରୁ ଗାଈ ଉପରେ ନିର୍ଭରଶୀଳ ଏବଂ ଏକ ସାର୍ଥକ ଜୀବନ ବଞ୍ଚିବା ପାଇଁ ସେମାନଙ୍କର ଅଧିକାର ଅଛି । କୋର୍ଟ ପୁଣି କହିଲେ ଯେ, ବଞ୍ଚିବାର ଅଧିକାର ମାରିବାର ଅଧିକାରଠାରୁ ବଡ଼ ଏବଂ ଗୋ ମାଂସାହାରକୁ କେବେ ହେଲେ ମୌଳିକ ଅଧିକାର ଭାବରେ ବିବେଚନା କରାଯାଇପାରିବ ନାହିଁ । ଗୋଟିଏ ଗାଈ ରୋଗିଣା ଓ ବୁଢ଼ୀ ହୋଇଯିବା ପରେ ବି ମଣିଷର ଉପକାର କରିଥାଏ । ତାର ଗୋବର ଓ ମୂତ୍ରକୁ କୃଷିକାର୍ଯ୍ୟରେ ଓ ଔଷଧରେ ଲଗାଯାଏ ଏବଂ ବୁଢ଼ୀ ହୋଇଗଲା ପରେ ବି ତାକୁ ଗୋମାତା ଭାବରେ ପୂଜା କରାଯାଇଥାଏ । ତେଣୁ ତାକୁ ମାରିବା ପାଇଁ କାହାରିକୁ ଅଧିକାର ଦିଆଯାଇ ପାରିବ ନାହିଁ । କୋର୍ଟ ପୁଣି କହିଲେ ଯେ, ଗାଈମାନଙ୍କର ଗୁରୁତ୍ୱ କେବଳ ହିନ୍ଦୁମାନେ ବୁଝି ନାହାନ୍ତି, ମୁସଲମାନମାନେ ମଧ୍ୟ ସେମାନଙ୍କ ଶାସନ କାଳରେ ଭାରତୀୟ ସଂସ୍କୃତିରେ ଗାଈର ଗୁରୁତ୍ୱକୁ ଅନୁଭବ କରିଥିଲେ । ୫ ଜଣ ମୁସଲିମ ଶାସକଙ୍କ ଦ୍ୱାରା ଭାରତରେ ଗୋହତ୍ୟାକୁ ନିଷେଧ କରାଯାଇଥିଲା । ବାବର, ହୁମାୟିନୁ ଓ ଆକବର ମଧ୍ୟ ସେମାନଙ୍କ ଧାର୍ମିକ ଉତ୍ସବରେ ଗୋବଧ କରିବାକୁ ବା କୁରବାନୀ ଦେବାକୁ ନିଷେଧ କରିଥିଲେ ।

Powered by Froala Editor