ଭୁବନେଶ୍ୱର : ପଶ୍ଚିମ ଓଡ଼ିଶାର ଗନ୍ଧମାର୍ଦ୍ଧନ ପାହାଡ଼ରେ ଥିବା ହରିଶଙ୍କର ଓ ନୃସିଂହନାଥ ମନ୍ଦିରରେ ଶ୍ରଦ୍ଧାଳୁ ଓ ପରିଦର୍ଶନକାରୀଙ୍କୁ ମିଳିବ ନୂଆ ଅଭିଜ୍ଞତା । ଧାର୍ମିକ, ସାଂସ୍କୃତିକ ପରମ୍ପରା, ପ୍ରାକୃତିକ ଇକୋ-ସିଷ୍ଟମ ଓ ଦୁଃସାହସିକ ପର୍ଯ୍ୟଟକକୁ ଆଖି ଆଗରେ ରହି ସମଗ୍ର ମନ୍ଦିର ଅଞ୍ଚଳକୁ ବିକଶିତ କରାଯିବ । ଅଧିକ ସଂଖ୍ୟାରେ ଦର୍ଶକ ଓ ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ଲକ୍ଷ୍ୟରେ ଏହି ଯୋଜନା ପ୍ରସ୍ତୁତ ହୋଇଛି । ୨୦୨୨ ଡିସେମ୍ବର ସୁଦ୍ଧା ବିକାଶମୂଳକ କାର୍ଯ୍ୟ ଶେଷ କରିବା ଲାଗି ଲକ୍ଷ୍ୟ ରହିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟରେ ଏହାର ମାଷ୍ଟର ପ୍ଲାନ୍ ଉପସ୍ଥାପନ କରାଯାଇଛି । ପ୍ରକଳ୍ପ ଅଧୀନରେ ଗମନାଗମନର ବିକାଶ ସହିତ ପାର୍କିଂକୁ ଗୁରୁତ୍ୱ ଦିଆଯାଇଛି । ଏହାସହ ଭେଣ୍ଡିଂ ଜୋନର ଅପଗ୍ରେଡେସନ, ଧାର୍ମିକ ରାସ୍ତା, ସାଂସ୍କୃତିକ ପ୍ଲାଜା, ସାଂସ୍କୃତିକ ପରମ୍ପରା ଓ ହର୍ବାଲ ସେଣ୍ଟର ସହିତ ପରିଦର୍ଶନର ସୁବିଧା, ପିକନିକ ଜୋନ ସହିତ ପ୍ଲାଜା, ପିଲାଙ୍କ ଖେଳିବା ଅଞ୍ଚଳ ସହିତ ଆଲୋକୀକରଣ, ଧର୍ମଶାଳାର ପୁନରୁଦ୍ଧାର, ଭୋଗ ମଣ୍ଡପ ଓ ରୋଷେଇ ଘରର ସୌନ୍ଦର୍ଯ୍ୟୀକରଣ ଏଥିରେ ସାମିଲ ରହିଛି । ଏହାସହ ଯେଉଁମାନେ ଦୁଃସାହସିକ କ୍ରୀଡ଼ାର ମଜା ନେବାକୁ ଚାହୁଁଛନ୍ତି ସେମାନଙ୍କ ପାଇଁ ପାହାଡ଼ରେ ୧୮ କି.ମିର ରାସ୍ତାର ମଧ୍ୟ ପ୍ରସ୍ତାବ ରହିଛି । ଏଥିରେ ବେଞ୍ଚ, ଇନଫୋ ସାଇନେଜ୍, ପରିସ୍ରାଗାର, କାଫେ ଓ ୱାଚ୍ ଟାୱାର ନିର୍ମାଣ କରାଯିବ । ଏହି ବୈଠକକୁ ୫-ଟି ସଚିବ ଭି.କେ ପାଣ୍ଡିଆନ ସଂଚାଳନ କରିଥିଲେ । ଅନ୍ୟମାନଙ୍କ ମଧ୍ୟରେ ମୁଖ୍ୟ ଶାସନ ସଚିବ ସୁରେଶ ମହାପାତ୍ର, ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର, ଉନ୍ନୟନ କମିସନର ପି.କେ ଜେନା, ଏସିଏସ ଫରେଷ୍ଟ ମୋନା ଶର୍ମା ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

Powered by Froala Editor