ବାରିପଦା: ମୟୂରଭଞ୍ଜରେ ବିଜେଡିର ପର୍ଯ୍ୟବେକ୍ଷକ ଭାବେ ବର୍ଷକ ତଳେ ଦାୟିତ୍ୱ ନେଇଥିଲେ ବିଜେଡି ରାଜ୍ୟ ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓରଫ ବବି । ଗତ ଏପି୍ରଲ ମାସରେ ମଧ୍ୟ ତାଙ୍କ ଗୋଟି ଚାଳନାରୁ ବିଜେପି କ୍ୟାମ୍ପରେ ବିଦ୍ରୋହ ସୃଷ୍ଟି ହୋଇଥିବା ଚର୍ଚ୍ଚା ହୋଇଥିଲା । ପ୍ରାୟ ୨୮ ଜଣ ବିଜେପି ଜିଲ୍ଲା ପରିଷଦ ସଭ୍ୟ ଦଳ ଛାଡ଼ି ବିଜେଡିରେ ଯୋଗ ଦେବାକୁ ଆରଡିସିଙ୍କୁ ପତ୍ର ଲେଖିଥିଲେ । ମାତ୍ର କୌଣସି ମତେ ବିଜେପି ରାଜ୍ୟସ୍ତରୀୟ ନେତାଙ୍କ ହସ୍ତକ୍ଷେପ ପରେ ଏହା ପ୍ରଶମିତ ହୋଇଥିଲା । ମାତ୍ର ଏଥର କିନ୍ତୁ ବବିଙ୍କ ଯୋଜନାବଦ୍ଧ ଚାଲକୁ ଆକଳନ କରିପାରିନାହାନ୍ତି ବିଜେପି ନେତୃତ୍ୱ । ଫଳରେ ଜଣେ କେନ୍ଦ୍ରମନ୍ତ୍ରୀ ୬ ଜଣ ବିଧାୟକ ଥାଇ ମଧ୍ୟ ଦଳକୁ ୧୫ ଜଣ ଜିଲ୍ଲା ପରିଷଦ ସଭ୍ୟ ଇସ୍ତଫା ଦେଇଛନ୍ତି । ଜିଲ୍ଲାରେ ୯ ବିଧାନସଭା କ୍ଷେତ୍ରରୁ ୬ ଆସନରେ ବିଜେପି ବିଧାୟକ ନିର୍ବାଚିତ ହୋଇଛନ୍ତି । ବିଜେପି ଛାଡ଼ିଥିବା ୧୫ ଜିଲ୍ଲା ପରିଷଦ ସଭ୍ୟମାନେ କରଞ୍ଜିଆ, ମୋରଡ଼ା, ବଡ଼ସାହି, ଯଶିପୁର, ଉଦଳା, ରାଇରଙ୍ଗପୁର ଓ ସାରକଣା ନିର୍ବାଚନ ମଣ୍ଡଳୀରୁ ରହିଛନ୍ତି । ମୋରଡା ଓ କରଞ୍ଜିଆରେ ବିଜେଡି ବିଧାୟକ ଥିବା ବେଳେ ଅନ୍ୟ ସମସ୍ତ ସ୍ଥାନରେ ବିଜେପି ବିଧାୟକ ରହିଛନ୍ତି । ତଥାପି ଜିଲ୍ଲା ପରିଷଦ ସଭ୍ୟମାନେ ଇସ୍ତଫା ଦେବା ବିଜେପି ବିଧାୟକଙ୍କୁ ଝଟକା ଲାଗିଛି । ଏହି ଘଟଣା ପରେ ଜିଲ୍ଲା ବିଜେପିରେ ନେତୃତ୍ୱ ସଂକଟ ରହିଥିବା ସ୍ପଷ୍ଟ ହୋଇଛି । ଜିଲ୍ଲାରେ ବିଜେପିରୁ ୬ ବିଧାୟକ ଓ ଜଣେ କେନ୍ଦ୍ରମନ୍ତ୍ରୀ ଅଛନ୍ତି । ଜିଲ୍ଲାରେ ଦଳର ନେତା କିଏ ତାହା ଦଳୀୟ କର୍ମୀ ଓ ତୃଣମୂଳ ସ୍ତରର ନେତାଙ୍କୁ ଅଡୁଆରେ ପକାଇଛି । ଇସ୍ତଫା ଦେଇଥିବା ଦଳୀୟ ଜିଲ୍ଲା ପରିଷଦ ସଭ୍ୟମାନେ ରାଜ୍ୟ ବିଜେପି ସଭାପତିଙ୍କୁ ଦେଇଥିବା ପତ୍ରରେ ସିଧାସଳଖ ଏକମାତ୍ର ସାଂସଦ ତଥା କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ ସହିତ ନିର୍ବାଚିତ ବିଧାୟ ଏବଂ ଅନ୍ୟ ନେତୃତ୍ୱଙ୍କ ମତାନ୍ତର ଥିବା ଉଲ୍ଲେଖ କରିଛନ୍ତି । ଏପରି ସ୍ଥିତି ଜାରି ରହିଲେ ଆଗାମୀ ପଞ୍ଚାୟତ ଓ ପୌର ନିର୍ବାଚନରେ ଦଳ କିପରି ଲଢ଼ିବ ବୋଲି ସେ ନେଇ ଆଶଙ୍କା ଦେଖାଦେଇଛି ।

Powered by Froala Editor