କରୋନା ସଂକ୍ରମଣକୁ ଦୃଷ୍ଟିରେ ରଖି ତାମିଲନାଡୁ ସରକାର ନୂଆ ଗାଇଡଲାଇନ ଜାରି କରିଛନ୍ତି । କୋଭିଡ ପ୍ରତିବନ୍ଧକକୁ କୋହଳ କରିଥିଲେ ସୁଦ୍ଧା ଆସନ୍ତା ସେପ୍ଟେମ୍ବର ୯ ତାରିଖ ଯାଏଁ ରାଜ୍ୟରେ ଆଂଶିକ ଲକ୍‌ଡାଉନ୍‌ ନିୟମ ବୃଦ୍ଧି କରିଛନ୍ତି ସରକାର । 

ନୂଆ ଗାଇଡଲାଇନରେ ସରକାର ସ୍କୁଲ ଖୋଲିବାକୁ ଅନୁମତି ଦେଇଛନ୍ତି। ସେପ୍ଟେମ୍ବର ୧ରୁ ୫୦% ଛାତ୍ରଛାତ୍ରୀଙ୍କୁ ନେଇ ରାଜ୍ୟରେ ୯ମରୁ ଦ୍ୱାଦଶ ଶ୍ରେଣୀ କ୍ଲାସ ଆରମ୍ଭ ହେବ। ରୋଟେସନାଲ ପଲିସି ଓ ଏସ୍‌ଓପିକୁ ସ୍କୁଲ ଖୋଲିବା ବେଳେ କଡ଼ାକଡ଼ି ଭାବେ ପାଳନ କରାଯିବ। ତେବେ ପ୍ରଥମରୁ ୮ମ ଶ୍ରେଣୀ ଯାଏ କ୍ଲାସ କେବେ ଆରମ୍ଭ ହେବ, ତା’ର ନିଷ୍ପତ୍ତି ସେପ୍ଟେମ୍ବର ୧୫ ପରେ ନିଆଯିବ ବୋଲି ସରକାର କହିଛନ୍ତି।

ନୂଆ ଗାଇଡଲାଇନ ଅନୁଯାୟୀ, ସେପ୍ଟେମ୍ବର ୧ରୁ ଡିପ୍ଲୋମା ଓ ପଲିଟେକନିକ କ୍ଲାସ ମଧ୍ୟ ଆରମ୍ଭ ହେବ। ଏଠାରେ କରୋନା ସଂକ୍ରମଣକୁ ରୋକିବା ପାଇଁ ଜାରି ଏସ୍‌ଓପିକୁ କଡ଼ାକଡ଼ି ଭାବେ ପାଳନ କରାଯିବ। କଲେଜରେ ସମସ୍ତ କର୍ମଚାରୀ ଭ୍ୟାକସିନ୍‌ ନେଇସାରିଥିବାରୁ ଏହି ନିଷ୍ପତ୍ତି ନିଆଯାଇଛି । 

ଏହା ସହିତ ଆସନ୍ତା ସୋମବାର ଠାରୁ ରାଜ୍ୟରେ ୫୦ ପ୍ରତିଶତ କ୍ଷମତାରେ ସିନେମା ହଲ ଖୋଲିବ । କିନ୍ତୁ ସ୍କୁଲ ଏବଂ ସିନେମା ହଲ ଖୋଲିବା ନେଇ କିଛିଟା ଗାଇଡଲାଇନ୍‌ ମଧ୍ୟ ଜାରି କରିଛନ୍ତି ରାଜ୍ୟ ସରକାର । ସିନେମା ହଲର ସମସ୍ତ କର୍ମଚାରୀ ଟିକା ନେଇଥିବା ଆବଶ୍ୟକ । ନଚେତ ସିନେମା ହଲ ଖୋଲିବା ପାଇଁ ଅନୁମତି ମିଳିବ ନାହିଁ । ସମସ୍ତ ଧାର୍ମିକ ଅନୁଷ୍ଠାନ ଲୋକଙ୍କ ପାଇଁ ଶୁକ୍ରବାର, ଶନିବାର ଓ ରବିବାର ବନ୍ଦ ରହିବ। 

ଦୋକାନ ବଜାର ରାତି ୧୦ଟା ଯାଏ ଖୋଲା ରହିବ ଓ ଆଇଟି କମ୍ପାନୀ ଗୁଡ଼ିକ ଶତ ପ୍ରତିଶତ କର୍ମଚାରୀଙ୍କୁ ନେଇ କାମ କରିବେ। ରାଜ୍ୟରେ ଥିବା ସୁଇମିଂ ପୁଲ ଗୁଡ଼ିକ ଅଭ୍ୟାସ ପାଇଁ ଖୋଲିବ। ଏଠାକୁ ଆସୁଥିବା ୧୮ ବର୍ଷରୁ ଅଧିକ ବୟସ୍କ କୋଚ୍‌ ଓ ଖେଳାଳିମାନେ ଟିକାର ଦୁଇଟି ଯାକ ଡୋଜ୍‌ ନେଇଥିବା ଜରୁରୀ। ତେବେ ଅଗଷ୍ଟ ୧୬ରୁ ରାଜ୍ୟରେ ଥିବା ସମସ୍ତ ମେଡିକାଲ ଓ ନର୍ସିଂ କଲେଜ ଖୋଲିବାକୁ ସରକାର ନିର୍ଦ୍ଦେଶ ଦେଇ ସାରିଥିଲେ।

Powered by Froala Editor