ଭୁବନେଶ୍ୱର : ଅଗଷ୍ଟ ୨୮ ତାରିଖ ସୁଦ୍ଧା ପ୍ରକାଶ ପାଇବ ଅଫଲାଇନ ମାଟ୍ରିକ ପରୀକ୍ଷା ଫଳାଫଳ । ଏଥିପାଇଁ ମାଧ୍ୟମିକ ଶିକ୍ଷା ପରିଷଦ ଉଦ୍ୟମ ଚଳାଇଛି । ଏହା ମଧ୍ୟରେ ଉଭୟ ସବଜେକ୍ଟିଭ୍‌ ଓ ଅବଜେକ୍ଟିଭ (ଓଏମଆର) ଉତ୍ତରଫର୍ଦ୍ଦର ମୂଲ୍ୟାୟନ ସଂପୂର୍ଣ୍ଣ ହୋଇଥିବାବେଳେ ଏବେ ମାର୍କ ପ୍ରକ୍ରିୟା କରଣ ଚାଲିଛି । ମାଟ୍ରିକ୍‌ ପରୀକ୍ଷାର୍ଥୀଙ୍କ ଗ୍ରେଡ ସ୍ଥିର ହୋଇଥିବା ବେଳେ ଏ-୧ ଓ ଏ-୨ ଗ୍ରେଡ ପାଇଥିବା ପିଲାଙ୍କ ମାର୍କକୁ ପୁଣିଥରେ ଯାଂଚ କରାଯାଉଛି । ଆସନ୍ତା ୨୨ତାରିଖ ମଧ୍ୟରେ ଏ-୧ ପାଇଥିବା ପିଲାଙ୍କ ତାଲିକା ଚୂଡାନ୍ତ ହୋଇଯିବ ଓ ଆସନ୍ତା ୨୮ତାରିଖ ମଧ୍ୟରେ ଫଳ ପ୍ରକାଶ କରାଯିବ ବୋଲି ଜଣାପଡ଼ିଛି । ଅଫଲାଇନ ମାଟ୍ରିକ ପରୀକ୍ଷାରେ ଏଚଏସସି(ମାଟ୍ରିକ), ରାଜ୍ୟ ମୁକ୍ତବିଦ୍ୟାଳୟ ସାର୍ଟିଫିକେଟ୍‌ ଓ ମଧ୍ୟମାରେ ୧୫ ହଜାର ୧୫୧ ଛାତ୍ରଛାତ୍ରୀ ଫର୍ମ ପୂରଣ କରିଥିଲେ । ଏଥରୁ ମାଟ୍ରିକ (ଅସନ୍ତୁଷ୍ଟ ଛାତ୍ରଛାତ୍ରୀ) ଓ ପତ୍ରବିନିମୟରେ ୬୫୯୭ ଜଣ, ମୁକ୍ତ ବିଦ୍ୟାଳୟ ସାର୍ଟିଫିକେଟ୍‌ ପରୀକ୍ଷାରେ ୮୪୯୩ ଜଣ ଓ ମଧ୍ୟମା(ସଂସ୍କୃତ ଟୋଲ) ପାଇଁ ୬୧ ଛାତ୍ରଛାତ୍ରୀ ଫର୍ମ ପୂରଣ କରିଥିଲେ । ଏହି ପରୀକ୍ଷା ଜୁଲାଇ ୩୦ରୁ ଅଗଷ୍ଟ ୫ତାରିଖ ପର୍ଯ୍ୟନ୍ତ ରାଜ୍ୟର ୫୦୪ଟି ପରୀକ୍ଷା କେନ୍ଦ୍ରରେ ଅନୁଷ୍ଠିତ ହୋଇଥିଲା । ପରୀକ୍ଷାର ବିଭିନ୍ନ ବିଷୟରେ ପାଖାପାଖି ୩ହଜାର ପରୀକ୍ଷାର୍ଥୀ ଅନୁପସ୍ଥିତ ରହିଥିବା ବେଳେ ୧୨ହଜାରରୁ ଅଧିକ ପରୀକ୍ଷାର୍ଥୀ ପରୀକ୍ଷା ଦେଇଥିଲେ ।

Powered by Froala Editor