୪ ରୁ ୫ଦିନ ମଧ୍ୟରେ ଫେରିଯିବ ମୌସୁମି ବାୟୁ!
ଭୁବନେଶ୍ୱର : ଦକ୍ଷିଣ-ପଶ୍ଚିମ ମୌସୁମି ବାୟୁ ଦେଶର କିଛି ଅଞ୍ଚଳରୁ ଅପସାରଣ ହୋଇଥିବା ବେଳେ ଆସନ୍ତା ୨ରୁ ୩ଦିନ ମଧ୍ୟରେ ବିଦର୍ଭ, ମହାରାଷ୍ଟ୍ର, ଛତିଶଗଡ଼, ତେଲଙ୍ଗାନା ଏବଂ ଉତ୍ତର ଆଭ୍ୟନ୍ତରୀଣ କର୍ଣ୍ଣାଟକର କିଛି ଅଞ୍ଚଳରୁ ପ୍ରତ୍ୟାବର୍ତ୍ତନ ପାଇଁ ପାଗ ସମ୍ପୂର୍ଣ୍ଣ ଅନୁକୂଳ ରହିଛି। ଅନ୍ୟପଟେ, ଆସନ୍ତା ୪ରୁ ୫ଦିନ ମଧ୍ୟରେ ଓଡ଼ିଶାର କିଛି ଜିଲାରୁ ମୌସୁମି ବାୟୁ ଫେରିଯିବାର ସମ୍ଭାବନା ରହିଛି। ବିଶେଷକରି, ପଶ୍ଚିମ ଓ ଉତ୍ତର ଓଡ଼ିଶାର କେତେକ ଜିଲାରୁ ମୌସୁମି ପ୍ରତ୍ୟାବର୍ତ୍ତନ ଲାଗି ପାଗ ଅନୁକୂଳ ରହିଛି ବୋଲି ପାଣିପାଗ ବିଶେଷଜ୍ଞ ଆକଳନ କରିଛନ୍ତି। ସ୍ବାଭାବିକ ଭାବେ ଅକ୍ଟୋବର ୧୨ରୁ ୧୫ ମଧ୍ୟରେ ଓଡ଼ିଶାରୁ ମୌସୁମି ଫେରିଥାଏ। ଯଦି ଆସନ୍ତା ୪ରୁ ୫ଦିନ ମଧ୍ୟରେ ମୌସୁମି ବାୟୁ ଓଡ଼ିଶାରୁ ପ୍ରତ୍ୟାବର୍ତ୍ତନ କରେ, ତେବେ ଏଥର ମୌସୁମି ଶୀଘ୍ର ଫେରିଯିବ ବୋଲି କୁହାଯାଇପାରିବ। ପାଣିପାଗ ବିଶେଷଜ୍ଞ ବିଶ୍ବଜିତ ସାହୁ କହିଛନ୍ତି, ଆସନ୍ତା ୪ରୁ ୫ ଦିନ ମଧ୍ୟରେ ପଶ୍ଚିମ ଓଡ଼ିଶାର କିଛି ଅଞ୍ଚଳ ସହ ଉତ୍ତର ଓଡ଼ିଶାର ମୟୂରଭଞ୍ଜ, ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର ଏବଂ ବାଲେଶ୍ବର ଆଦି ଅଞ୍ଚଳରୁ ମୌସୁମି ଫେରିଯିବା ନିମନ୍ତେ ପାଗ ସମ୍ପୂର୍ଣ୍ଣ ଅନୁକୂଳ ରହିଛି।
Powered by Froala Editor
