ଭୁବନେଶ୍ୱର: ଗଭୀର ଅବପାତ ଜନିତ ଲଗାଣ ବର୍ଷାରେ ବିଭିନ୍ନ ନଦୀର ଜଳସ୍ତର ବୃଦ୍ଧି ପାଇଛି। ଉତ୍ତର ଓଡ଼ିଶାରେ ବନ୍ୟା ଆସିଛି। ଦକ୍ଷିଣ ଓଡ଼ିଶାର ଜିଲାଗୁଡ଼ିକରେ ବର୍ଷା ବିତ୍ପାତରେ ବ୍ୟାପକ କ୍ଷତି ହୋଇଛି। ବର୍ଷା ବିତ୍ପାତ ଏବଂ ବନ୍ୟାରେ ରାଜ୍ୟର ୧୦ଟି ଜିଲା ପ୍ରଭାବିତ ହୋଇଛି। ୧୦ଟି ଜିଲାର ୮୦ଟି ବ୍ଲକରୁ ୭୩,୦୮୫ ଲୋକ ପ୍ରଭାବିତ ହୋଇଥିବା ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି। ବନ୍ୟା ମୁକାବିଲା ସମୀକ୍ଷା କରିମନ୍ତ୍ରୀ ଶ୍ରୀ ପୂଜାରୀ କହିଛନ୍ତି, ବର୍ଷା ଓ ବନ୍ୟା ଦ୍ବାରା ବାଲେଶ୍ବର, କୋରାପୁଟ, ଗଞ୍ଜାମ, ମାଲକାନଗିରି, ଗଜପତି, ନବରଙ୍ଗପୁର, କନ୍ଧମାଳ, ବଲାଙ୍ଗିର, ମୟୂରଭଞ୍ଜ ଏବଂ ନୟାଗଡ଼ ଜିଲାର ୮୦ଟି ବ୍ଲକର ୩୨୫ ପଞ୍ଚାୟତରୁ ୧୦୭୧ ଗାଁର ଜନସାଧାରଣ ପ୍ରଭାବିତ ହୋଇଛନ୍ତି। ସେହିପରି, ୧୦ଟି ସହରାଞ୍ଚଳର ୪୯ଟି ୱାର୍ଡବାସିନ୍ଦା ପ୍ରଭାବିତ ହୋଇଥିବା ରିପୋର୍ଟ ଆସିଛି। ଗ୍ରାମାଞ୍ଚଳର ଏବଂ ସହରାଞ୍ଚଳରୁ ମୋଟ ୭୩,୦୮୫ ଲୋକ ପ୍ରଭାବିତ ହୋଇଥିବା ବେଳେ ଅଦ୍ୟାବଧି ୧୬ଟି ଗାଁ ବନ୍ୟାପାଣି ଘେରରେ ରହିଛି। ପ୍ରଭାବିତଙ୍କ ମଧ୍ୟରୁ ୪୦,୩୨୯ ଲୋକଙ୍କୁ ଜିଲା ପ୍ରଶାସନ ପକ୍ଷରୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ବର୍ଷା ବିତ୍ପାତ ଏବଂ ବନ୍ୟା ଆସିବା ଦ୍ବାରା ପ୍ରଭାବିତ ଜିଲାଗୁଡିକରୁ ୪,୪୮୦ ହେକ୍ଟର୍‌ ଚାଷ ଜମିରେ ପାଣି ମାଡ଼ିଯିବା ଦ୍ବାରା ଫସଲ କ୍ଷତି ହୋଇଛି। ବନ୍ୟା ଓ ବର୍ଷାରେ ୭୨୧ଟି ଘର ଭାଙ୍ଗିଥିବା ବେଳେ ପ୍ରଭାବିତଙ୍କ ପାଇଁ ସରକାରଙ୍କ ପକ୍ଷରୁ ୩୯୫ଟି ରିଲିଫ୍‌ କ୍ୟାମ୍ପ ଖୋଲାଯାଇ ୪୦,୩୨୯ ବିପନ୍ନଙ୍କୁ ରନ୍ଧାଖାଦ୍ୟ ଦିଆଯାଉଛି। ବିପନ୍ନଙ୍କୁ ଚୁଡ଼ା-ଗୁଡ଼ ମଧ୍ୟ ବଣ୍ଟନ କରାଯାଇଛି। ମୟୂରଭଞ୍ଜରେ ୨୪୯ଟି ଘର ଭାଙ୍ଗିଥିବା ବେଳେ ନୟାଗଡ଼ରେ ୧, ବଲାଙ୍ଗିରରେ ୨, କନ୍ଧମାଳରେ ୧୨, ନବରଙ୍ଗପୁରରେ ୧୩୭, ଗଜପତିରେ ୧୩୬, ମାଲକାନଗିରିରେ ୬୫, ଗଞ୍ଜାମରେ ୨୮, କୋରାପୁଟରେ ୯୧ଟି ଘର ଭାଙ୍ଗିଛି।

Powered by Froala Editor