ନୂଆଦିଲ୍ଲୀରେ ଅନୁଷ୍ଠିତ ୧୮ତମ ବ୍ରିକ୍ସ (BRICS) ସମ୍ମିଳନୀର ଏକ ନୂଆ ରାଜନୈତିକ ବିବାଦ ଦେଖାଦେଇଛି। ସମ୍ମିଳନୀ ଅବସରରେ ବିଦେଶୀ ଅତିଥିମାନଙ୍କ ପାଇଁ ଆୟୋଜିତ ଭୋଜିରେ ପରିବେଷଣ କରାଯାଇଥିବା ନିରାମିଷ ଖାଦ୍ୟକୁ ନେଇ ସୃଷ୍ଟି ହୋଇଛି ବିବାଦ । ଲୋକ ସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ‘ଏକ୍ସ’ (X) ରେ ଲେଖିଛନ୍ତି, ‘୮୦ ପ୍ରତିଶତ ଭାରତୀୟ ଆମିଷାଶୀ ଅଟନ୍ତି। ଭାରତୀୟ ଆମିଷ ଖାଦ୍ୟ ଅତ୍ୟନ୍ତ ସ୍ବାଦଯୁକ୍ତ ଏବଂ ମୋ ଭଉଣୀଙ୍କ ଦ୍ୱାରା ପ୍ରସ୍ତୁତ ‘ଛୋଲେ-ଭଟୁରେ’ ମଧ୍ୟ ସେହିପରି ସ୍ବାଦିଷ୍ଟ।’ ବ୍ରିକ୍ସ ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ଆୟୋଜିତ ଭୋଜିର ରାହୁଲ ଗାନ୍ଧୀ ଏହି ମନ୍ତବ୍ୟ ଦେଇଛନ୍ତି।

କଂଗ୍ରେସ ନେତା ପୱନ ଖେରା ମଧ୍ୟ ଏହି ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଥିଲେ। ‘X’ (ଟୁଇଟର) ରେ ପୋଷ୍ଟ କରି ସେ ଲେଖିଥିଲେ, ‘ଅନ୍ୟମାନଙ୍କ ଉପରେ ନିଜର ଖାଦ୍ୟାଭ୍ୟାସ ଲଦି ଦେବାର ଅଭ୍ୟାସ ଭାଜପାର ପୂର୍ବରୁ ରହିଛି। ବର୍ତ୍ତମାନ ସେମାନେ ଅନ୍ତର୍ଜାତୀୟ ସ୍ତରର ବିଶିଷ୍ଟ ଅତିଥିମାନଙ୍କ ଉପରେ ମଧ୍ୟ ଏହା ଲଦି ଦେଉଛନ୍ତି। ଭାରତ ବିଭିନ୍ନ ସଂସ୍କୃତିର ଦେଶ ଏବଂ ଏହାର ଆମିଷ ଖାଦ୍ୟ ସମଗ୍ର ବିଶ୍ୱରେ ପ୍ରସିଦ୍ଧ। ସରକାର କାହିଁକି ଏହି ବିବିଧତାକୁ ବିଶ୍ୱଠାରୁ ଲୁଚାଇବାକୁ ଚାହୁଁଛନ୍ତି?’ 

ସଂସଦୀୟ ବ୍ୟାପାର ଓ ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରେନ ରିଜିଜୁ ଖାଦ୍ୟ ତାଲିକାକୁ ନେଇ ରାଜନୀତି କରୁଥିବା ନେଇ କଂଗ୍ରେସ ଦଳକୁ ସମାଲୋଚନା କରିଛନ୍ତି। ‘ଏକ୍ସ’ (X) ରେ ସେ ଲେଖିଛନ୍ତି, ‘ମୁଁ ବିଶ୍ୱାସ କରିପାରୁନାହିଁ ଯେ କଂଗ୍ରେସ ଦଳ ବ୍ରିକ୍ସ ରାଷ୍ଟ୍ରଗୁଡ଼ିକର ନେତାମାନଙ୍କୁ ପରଷା ଯାଇଥିବା ଖାଦ୍ୟ ତାଲିକାକୁ ନେଇ ମଧ୍ୟ ରାଜନୀତି କରୁଛି। ଆମର ଅତିଥିମାନେ ଭାରତୀୟ ନିରାମିଷ ଖାଦ୍ୟର ଆନନ୍ଦ ନେଇଥିଲେ।’ ସେ କହିଛନ୍ତି ଯେ ଭାରତୀୟ ନିରାମିଷ ଖାଦ୍ୟ ବିବିଧତା, ସ୍ବାଦ ଓ ପୁଷ୍ଟିଗୁଣ ପ୍ରଦାନ କରିବା ସହ ଭାରତୀୟ ସଂସ୍କୃତିର ପ୍ରତିଫଳନ ଘଟାଇଥାଏ; ବିଦେଶୀ ଅତିଥିମାନେ ମଧ୍ୟ ଏହାକୁ ବେଶ ଉପଭୋଗ କରିଥିଲେ।

ଟିଏମସି (TMC) ସାଂସଦ ମହୁଆ ମୋଇତ୍ରା ‘X’ ରେ ହାସ୍ୟରସାତ୍ମକ ଢଙ୍ଗରେ ପୋଷ୍ଟ କରି ସେ ଲେଖିଥିଲେ, ‘ଯଦି ମୁଁ ଗସ୍ତରେ ଆସିଥିବା ବ୍ରିକ୍ସ (BRICS) ନେତାମାନଙ୍କୁ ଏହି ଖାଦ୍ୟ ତାଲିକାକୁ ଏଡ଼ାଇବାକୁ ପରାମର୍ଶ ଦିଏ ଏବଂ ସୁରକ୍ଷାକର୍ମୀଙ୍କୁ ନିକଟସ୍ଥ ପ୍ରସିଦ୍ଧ ‘କରିମ୍ସ’ (Karim’s) ରୁ କିଛି ‘ବାରା କବାବ’ (Barra Kebabs) ଆଣିବାକୁ କୁହେ, ତେବେ କ’ଣ ମୋତେ ଜଣେ ‘ଖରାପ ସାଂସଦ’ ବୋଲି ବିବେଚନା କରାଯିବ?”

ଭାଜପା ମୁଖପାତ୍ର ପ୍ରଦୀପ ଭଣ୍ଡାରୀ କହିଛନ୍ତି, ‘ଯେତେବେଳେ ସମ୍ମିଳନୀ ବିଷୟରେ ସମାଲୋଚନା କରିବା ପାଇଁ ବିରୋଧୀଙ୍କ ପାଖରେ କେବଳ ଖାଦ୍ୟ ତାଲିକା ହିଁ ଏକମାତ୍ର ବିଷୟ ରହିଛି, ସେତେବେଳେ ଏହା ସ୍ପଷ୍ଟ ଭାବେ ଦର୍ଶାଉଛି ଯେ BRICS ସମ୍ମିଳନୀ କେତେ ସଫଳ ହୋଇଛି।’ 

Powered by Froala Editor