ଗୌହାଟୀସ୍ଥିତ ନିଜ ଆପାର୍ଟମେଣ୍ଟରେ ଜଣେ ୨୫ ବର୍ଷୀୟା ମହିଳାଙ୍କ ମୃତଦେହ ମିଳିଛି। ମୃତ ମହିଳାଙ୍କ ନାଁ ରିୟା ତାଲୁକଦାର। ସେପ୍ଟେମ୍ବର ୬ ତାରିଖରେ ପଡ଼ୋଶୀମାନେ ଦୁର୍ଗନ୍ଧ ଆସୁଥିବା ନେଇ ଅଭିଯୋଗ କରିବା ପରେ ପୋଲିସ ସେହି ଆପାର୍ଟମେଣ୍ଟରେ ପହଞ୍ଚିଥିଲା । ସେଠାରେ କିଛି ମାସ ପୂର୍ବେ ବିବାହ କରିଥିବା ଏହି ଦମ୍ପତି ରହୁଥିଲେ। ପଡ଼ୋଶୀମାନେ ପୋଲିସକୁ କହିଥିଲେ ଯେ ସେମାନେ ଦୁଇ ଦିନ ଧରି ଦମ୍ପତିଙ୍କୁ ଦେଖିନାହାନ୍ତି ଏବଂ ସେମାନଙ୍କ ଫୋନ୍ ମଧ୍ୟ ବନ୍ଦ ରହିଛି।

ଏହାପରେ ପୋଲିସ ଆପାର୍ଟମେଣ୍ଟର ତାଲା ଭାଙ୍ଗି ଭିତରକୁ ଯାଇଥିଲା ଏବଂ ମହିଳାଙ୍କ କ୍ଷତବିକ୍ଷତ ମୃତଦେହ ପାଇଥିଲା। ତାଙ୍କ ଆଙ୍ଗୁଠିଗୁଡ଼ିକ ଅଧା କଟା ହୋଇଥିଲା, ଶରୀର ପଚିବା ଆରମ୍ଭ ହୋଇଯାଇଥିଲା ଏବଂ ମୁଣ୍ଡଟି ଶରୀର ସହ ନଥିଲା । ଫ୍ରିଜ୍ ଭିତରେ ଥିବା ଏକ ପଲିଥିନ୍ ବ୍ୟାଗ୍‌ରୁ ମହିଳାଙ୍କ ମୁଣ୍ଡ ଓ ଆଙ୍ଗୁଠି ଉଦ୍ଧାର କରିଥିଲା। ଘଟଣାସ୍ଥଳରେ ତାଙ୍କ ସ୍ୱାମୀଙ୍କର କୌଣସି ପତ୍ତା ମିଳିନଥିଲା। ପଡ଼ୋଶୀମାନେ କହିଥିଲେ ଯେ ସେମାନେ ଶେଷ ଥର ପାଇଁ ତାଙ୍କୁ ଶୁକ୍ରବାର ଦିନ ଦେଖିଥିଲେ।

ମୃତ ମହିଳା ନୂନମତି ଅଞ୍ଚଳର ବାସିନ୍ଦା ଥିବାବେଳେ ଫ୍ୟାନ୍ସି ବଜାରର ଏସି ମାର୍କେଟ୍‌ରେ ଥିବା ଏକ ବୁଟିକ୍‌ରେ କାମ କରୁଥିଲେ। ରିୟା ତାଙ୍କ ସ୍ୱାମୀ ରାମାନୁଜନ ଗୋସ୍ୱାମୀଙ୍କ ସହ ଗୌହାଟୀର ବେଲଟୋଲା ଅଞ୍ଚଳର ବଶିଷ୍ଠପୁର ବାଇଲେନ୍‌ରେ ଥିବା ଅଞ୍ଜଳି ଗୃହ ଆପାର୍ଟମେଣ୍ଟର ଏକ ଘରେ ପ୍ରାୟ ୬ ମାସ ଧରି ରହୁଥିଲେ। ବିବାହର ମାତ୍ର କିଛି ମାସ ପରେ ଘଟିଥିବା ଏହି ଘଟଣା ପରେ ପୋଲିସ ତାଙ୍କ ସ୍ୱାମୀଙ୍କୁ ଖୋଜିବା ଆରମ୍ଭ କରିଥିଲା।

ଏହାପରେ ମୃତଦେହ ଓ କଟା ମୁଣ୍ଡକୁ ଶବ ବ୍ୟବଚ୍ଛେଦ ପାଇଁ ପଠାଯାଇଥିଲା। ରବିବାର ରାତିରେ ତାଙ୍କ ସ୍ୱାମୀ ପୋଲିସ ନିକଟରେ ଆତ୍ମସମର୍ପଣ କରିଥିଲା ।

Powered by Froala Editor