ମହାରାଷ୍ଟ୍ରର ବୀଡ଼ ଜିଲ୍ଲା ଅମ୍ବାଜୋଗାଈରେ ୪୭ ବର୍ଷୀୟ ରମାବାଈ ରଣବୀର ନିଜ ଝିଅଙ୍କ ପାଠପଢ଼ା ପାଇଁ ଏକ ମାରାଥନ୍‌ରେ ଦୌଡ଼ି ପ୍ରଥମ ସ୍ଥାନ ହାସଲ କରିଛନ୍ତି। ତାଙ୍କର ଏହି ଦୌଡ଼ କେବଳ ଏକ ପ୍ରତିଯୋଗିତା ନଥିଲା, ବରଂ ଥିଲା ଝିଅମାନଙ୍କ ଭବିଷ୍ୟତ ପାଇଁ ଜଣେ ମା’ଙ୍କ ଦୃଢ଼ ସଂକଳ୍ପର ପ୍ରତୀକ।

ବୀଡ ଜିଲ୍ଲା ଅମ୍ବାଜୋଗାଇ ଗାଁର ୪୭ ବର୍ଷୀୟ ମହିଳା ରମାବାଇ ରଣବୀର। ଦାରିଦ୍ର‌୍ୟ ଯନ୍ତ୍ରଣା ଯୋଗୁଁ ଝିଅକୁ ପାଠ ପଢ଼ାଇ ପାରୁନଥିଲେ। ତେଣୁ ନାନା ଅସୁବିଧାରେ ସମ୍ମୁଖୀନ ହେଉଥିଲେ। କ’ଣ କରିବେ ଭାବି ପାରୁନଥିଲେ। ଦିନେ ସେ ଜାରିବାକୁ ପାଇଲେ ଭାରତୀୟ ଶିକ୍ଷଣ ପ୍ରସାରକ ସଂସ୍ଥା ଦ୍ୱାରା ପରିଚାଳିତ ଖୋଲେଶ୍ୱର ଏଜୁକେସନାଲ୍ କମ୍ପ୍ଲେକ୍ସର ‘ଅମୃତ ମହୋତ୍ସବ’ ସମାରୋହ ଅବସରରେ ‘ଅମୃତ ଦୌଡ଼’ ଆୟୋଜନ ହେଉଛି। ଆଉ ଏଥିରେ ବିଜେତାଙ୍କୁ ମିଳିବ ୩୦୦୦ ଟଙ୍କା। ତେଣୁ ସେ ଗଣଦୌଡ଼ରେ ଭାଗ ନେବା ପାଇଁ ନିଷ୍ପତ୍ତି ନେଲେ।

ମାରାଥନ୍‌ରେ ଅନ୍ୟ ପ୍ରତିଯୋଗୀଙ୍କ ଭଳି ରମାବାଈଙ୍କ ପାଖରେ ନଥିଲା ସ୍ୱତନ୍ତ୍ର ଧାବକଙ୍କ ପୋଷାକ କିମ୍ବା ଭଲ ଜୋତା। ଆରମ୍ଭରେ ସେ ଚପଲ ପିନ୍ଧି ଦୌଡ଼ିଥିଲେ। କିନ୍ତୁ କିଛି ଦୂର ଯିବା ପରେ ଚପଲ ଖସିଯିବାରୁ ସେ ତାହାକୁ ହାତରେ ଧରି ଖାଲି ପାଦରେ ଦୌଡ଼ିବା ଆରମ୍ଭ କରିଥିଲେ। ଯୁବ ଧାବକମାନଙ୍କ ସହ ପ୍ରତିଯୋଗିତା କରି ସେ ସମସ୍ତଙ୍କୁ ପଛରେ ପକାଇ ମାରାଥନ୍‌ର ଫିନିଶିଙ୍ଗ ଲାଇନ୍‌ରେ ସର୍ବପ୍ରଥମେ ପହଞ୍ଚିଥିଲେ। ରମାବାଈଙ୍କ ଏହି ଅଦମ୍ୟ ସାହସ ତାଙ୍କୁ ପ୍ରଥମ ସ୍ଥାନ ସହ ୩ ହଜାର ଟଙ୍କାର ପୁରସ୍କାର ମଧ୍ୟ ଦେଇଥିଲା। ତେବେ ତାଙ୍କ ପାଇଁ ଏହି ଟଙ୍କା କେବଳ ପୁରସ୍କାର ନୁହେଁ; ଏହା ଥିଲା ଝିଅମାନଙ୍କ ପାଠପଢ଼ା ଓ ଭବିଷ୍ୟତ ଗଢ଼ିବା ପାଇଁ ଏକ ଛୋଟ ସାହାଯ୍ୟ।

ହିଙ୍ଗୋଲୀର ବାସିନ୍ଦା ରମାବାଈ ଅମ୍ବାଜୋଗାଈ ସହରର ଏକ ଏକାଡେମୀରେ ରୋଷେଇ କାମ କରନ୍ତି। ସ୍ୱାମୀଙ୍କ ମୃତ୍ୟୁ ପରେ ଦୁଇ ଝିଅଙ୍କ ଲାଳନପାଳନ ଓ ପାଠପଢ଼ାର ସମସ୍ତ ଦାୟିତ୍ୱ ତାଙ୍କ ଉପରେ ପଡ଼ିଥିଲା। ଆର୍ଥିକ ସ୍ଥିତି ଦୁର୍ବଳ ହୋଇଥିଲେ ମଧ୍ୟ ଝିଅମାନଙ୍କୁ ଭଲ ଶିକ୍ଷା ଦେବାର ସଂକଳ୍ପରୁ ସେ କେବେ ବି ପଛକୁ ହଟିନଥିଲେ। ନିଜ ଝିଅମାନଙ୍କ ସ୍ୱପ୍ନ ପୂରଣ ପାଇଁ ସେ ରୋଷେଇ କାମକୁ ଆପଣାଇ ନିଜ ପରିବାରର ଭାର ବହନ କରୁଛନ୍ତି।

Powered by Froala Editor