କେନ୍ଦ୍ରାପଡ଼ା: କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ତିଖିରୀ ଗ୍ରାମ ପଞ୍ଚାୟତ ସରପଞ୍ଚ ଚାମେଲି ଓଝା ଗୁରୁବାର ବିଡିଓଙ୍କ ଚାମ୍ବରରେ ଭିଡିଓ ରେକର୍ଡିଂ କରିବାକୁ ନେଇ ଉତ୍ତେଜନା ଦେଖାଦେଇଥିଲା। ପ୍ରଶାସନିକ କାର୍ଯ୍ୟରେ ବାଧା ଦେବା ଓ କାର୍ଯ୍ୟାଳୟରେ ଭିଡିଓ ଉତ୍ତୋଳନ କରି ବିରକ୍ତିକର ପରିବେଶ ସୃଷ୍ଟି କରୁଥିବା ନେଇ ବିଡିଓ ରବି ନାରାୟଣ ଆଚାର୍ଯ୍ୟ ମହାକାଳପଡ଼ା ଥାନାରେ ଲିଖିତ ଅଭିଯୋଗ କରିଥିଲେ। ଥାନା ଅଧିକାରୀ ମାନସ କୁମାର ମଲ୍ଲିକ ଓ ତାଙ୍କ ଟିମ୍‌ ଘଟଣାସ୍ଥଳରେ ପହଞ୍ଚି ସରପଞ୍ଚ ଓଝାଙ୍କୁ ସରକାରୀ କାର୍ଯ୍ୟରେ ବାଧା ସୃଷ୍ଟି ନ କରିବାକୁ କହିଥିଲେ। ଭିଡିଓ ରେକର୍ଡିଂ କରିବା ଅଧିକାର ତାଙ୍କର ଅଛି ବୋଲି ସରପଞ୍ଚ କହିଥିଲେ। ଏହାକୁ ନେଇ ପୋଲିସ ସହିତ ସରପଞ୍ଚ ଓଝାଙ୍କର ଯୁକ୍ତିତର୍କ ହୋଇଥିଲା। ଶେଷରେ ପୋଲିସ ସରପଞ୍ଚ ଓଝା ଓ ତାଙ୍କ ଭାଇ ସୂର୍ଯ୍ୟକାନ୍ତ ଓଝାଙ୍କୁ ଥାନାକୁ ଉଠାଇ ନେଇଥିଲା। ବିଡିଓଙ୍କ ଏତଲା ଆଧାରରେ ଥାନାରେ ଏକ ମାମଲା ରୁଜୁ କରାଯାଇଛି ବୋଲି ଥାନା ଅଧିକାରୀ ମଲ୍ଲିକ କହିଛନ୍ତି।
ଅପରପକ୍ଷରେ ସରପଞ୍ଚ ଓଝାଙ୍କ କହିବା ଅନୁଯାୟୀ, ମଧ୍ୟାହ୍ନରେ ନିଜ ପଞ୍ଚାୟତର ଉନ୍ନୟନ କାର୍ଯ୍ୟର ସମୀକ୍ଷା ପାଇଁ ବ୍ଲକକୁ ଯାଇଥିଲେ। ପଞ୍ଚାୟତର ଉନ୍ନୟନ କାର୍ଯ୍ୟକୁ କାହିଁକି ଗୁରୁତ୍ୱ ଦିଆ ଯାଉ ନଥିବା ଓ ବିଭିନ୍ନ ପ୍ରକଳ୍ପ କାର୍ଯ୍ୟର ଅର୍ଥ ବ୍ୟୟ ସମ୍ପର୍କରେ ପଚାରିଥିଲେ। ଏହି ସମୟରେ ସେଠାରେ ଉପସ୍ଥିତ ଥିବା କେତେକ ବ୍ୟକ୍ତି ଅଯଥା ଚାପ ସୃଷ୍ଟି କରାଯାଉଥିବା କହି ପ୍ରତିବାଦ କରିବାରୁ ସେ ଏହାର ଭିଡିଓ ଉତ୍ତୋଳନ କରିଥିଲେ। ଫଳରେ ସମ୍ପୃକ୍ତ ବ୍ୟକ୍ତିମାନେ ଗ୍ୟାଙ୍ଗ ରେପ୍‌ କରିବାକୁ ଧମକ ଦେଇଥିବାବେଳେ ପୋଲିସ ଥାନା ଗାଡିରେ ନେଉଥିବା ସମୟରେ ତାଙ୍କ ଛାତି ଓ ପେଟକୁ ମାଡ ମାରିଥିବା ସେ ଅଭିଯୋଗ କରିଛନ୍ତି।

Powered by Froala Editor