ବେରୁଟ୍‌ : ଲେବାନନର ଦକ୍ଷିଣରେ ଅବସ୍ଥିତ ଐତିହାସିକ ବନ୍ଦର ସହର ‘ଟାୟାର’ ଉପରେ ଇସ୍ରାଏଲ୍ ସେନା ପକ୍ଷରୁ ବଡ଼ଧରଣର ବିମାନ ଆକ୍ରମଣ କରାଯାଇଛି। ଲେବାନନ ସ୍ୱାସ୍ଥ୍ୟ ମନ୍ତ୍ରଣାଳୟ କହିବା ଅନୁଯାୟୀ ଏହି ଆକ୍ରମଣରେ ୮ ଜଣଙ୍କର ମୃତ୍ୟୁ ହୋଇଥିବାବେଳେ ୩୨ଜଣ ଆହତ ହୋଇଛନ୍ତି। ଏହି ଆକ୍ରମଣର ଦିନକ ପୂର୍ବରୁ ଇରାନ ଚେତାବନୀ ଦେଇଥିଲା ଯେ, ଯଦି ଇସ୍ରାଏଲ୍ ତା’ର ପଡ଼ୋଶୀ ଦେଶ ଲେବାନନ ଉପରେ ଆକ୍ରମଣ ଜାରି ରଖେ ତେବେ ତେହରାନ ପୁଣିଥରେ ଇସ୍ରାଏଲ୍ ଉପରେ ଆକ୍ରମଣ କରିବ। ମାତ୍ର ଇସ୍ରାଏଲ୍ ଏହି ଚେତାବନୀକୁ ଖାତିର ନକରି ଲେବାନନ ଉପରେ ଆକ୍ରମଣ କରିଛି। ଆକ୍ରମଣ କରିବା ପରେ ଇସ୍ରାଏଲ୍ ସେନା ଟାୟାର ସହରର ସମସ୍ତ ବାସିନ୍ଦାଙ୍କୁ ତୁରନ୍ତ ସେହି ସ୍ଥାନ ଛାଡ଼ି ଉତ୍ତର ଦିଗକୁ ଚାଲିଯିବାକୁ କହିଛି। ଫଳରେ ସେଠାରେ ଆତଙ୍କର ପରିବେଶ ସୃଷ୍ଟି ହୋଇଛି ଏବଂ ହଜାର ହଜାର ଲୋକ ସହର ଛାଡ଼ି ପଳାଉଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟସ୍ଥତାରେ ଇସ୍ରାଏଲ ଓ ଲେବାନନ୍‌ ମଧ୍ୟରେ ଯୁଦ୍ଧବିରତି ପାଇଁ ପ୍ରୟାସ ଚାଲିଥିବା ବେଳେ ଇସ୍ରାଏଲ୍‌ର ଏହି କାର୍ଯ୍ୟାନୁଷ୍ଠାନ ପଶ୍ଚିମ ଏସିଆରେ ଚାଲିଥିବା ମହାଯୁଦ୍ଧକୁ ଆହୁରି ଭୟଙ୍କର ସ୍ଥିତିକୁ ନେଇଯାଇଛି। ଲେବାନନ ଉପରେ ଆକ୍ରମଣ କରିବା କାରଣରୁ ରବିବାର ରାତିରେ ଇସ୍ରାଏଲ ଉପରେ ଇରାନ ଆକ୍ରମଣ କରିଥିଲା। ଫଳରେ ଇସ୍ରାଏଲ ଓ ଇରାନ ମଧ୍ୟରେ ପ୍ରତ୍ୟକ୍ଷ ଯୁଦ୍ଧ ଆରମ୍ଭ ହୋଇଥିଲା। ଟ୍ରମ୍ପଙ୍କ ହସ୍ତକ୍ଷେପ ପରେ ଦୁଇ ଦେଶ ଯୁଦ୍ଧରୁ ବିରତ ରହିଛନ୍ତି। ଏବେ ପୁଣି ଥରେ ଲୋବନନ ଉପରେ ଇସ୍ରାଏଲ ଆକ୍ରମଣ କରିବାରୁ ତେହରାନ ପକ୍ଷରୁ ଆକ୍ରମଣ କରାଯିବାର ଆଶଙ୍କା ପ୍ରକାଶ ପାଇଛି।

Powered by Froala Editor