ଦୂରଦୂରାନ୍ତରୁ ବହୁ ଲୋକେ ପ୍ରତିଦିନ ରାଜଧାନୀକୁ ଆସୁଛନ୍ତି । କିଏ ଚିକିତ୍ସା ପାଇଁ ଆସୁଛି ତ ଆଉ କିଏ ସରକାରୀ ଓ ପ୍ରଶାସନିକ କାମ, ପରୀକ୍ଷା, ସାକ୍ଷାତକାର, ପ୍ରଶିକ୍ଷଣ ଓ ରାଜ୍ୟସ୍ତରୀୟ ସରକାରୀ କାର୍ଯ୍ୟକ୍ରମ ପାଇଁ ବିଭିନ୍ନ ଜିଲ୍ଲାରୁ ଦୈନିକ ହଜାର ହଜାର ଲୋକ ଆସୁଛନ୍ତି । କିନ୍ତୁ ଅନେକ ଲୋକେ ଟଙ୍କା ଦେଇ ଲଜ୍‌ ଓ ହୋଟେଲରେ ରହିବାକୁ ସକ୍ଷମ ହେଉନାହାନ୍ତି । ଅର୍ଥାଭାବରୁ ରେଳଷ୍ଟେସନ, ବସଷ୍ଟାଣ୍ଡ ବା ଅନ୍ୟ କେଉଁଠି ଆଶ୍ରୟ ନେବାକୁ ବାଧ୍ୟ ହେଉଛନ୍ତି । ଏଭଳି ଲୋକଙ୍କ ଉଦ୍ଦେଶ୍ୟରେ ଶସ୍ତା ଅତିଥି ଭବନ କରିବାକୁ ୧୨ ତାରିଖରେ ଭିତ୍ତିପ୍ରସ୍ତର ଦେବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । 

ମୁଖ୍ୟମନ୍ତ୍ରୀଙ୍କ ଏହି ଡ୍ରିମ୍‌ ପ୍ରକଳ୍ପ ବାସ୍ତବ ରୂପ ନେବାକୁ ଯାଉଛି । ଏହି ଜନାଶ୍ରୟରେ ମାତ୍ର ୧୦୦ ଟଙ୍କା ଦେଇ ରାତି ରହଣୀ ସୁବିଧା ଦେବାକୁ ସରକାର ଯୋଜନା କରିଛନ୍ତି । ଅତିଥି ଭବନର ମୋଟ ୭୬୮ ରୁମ୍‌ରେ ୧୯୮୪ ବେଡ୍‌ ସୁବିଧା ରଖାଯିବ । ଏ ପ୍ରକଳ୍ପରେ ପ୍ରାୟ ୫୫୩.୨୯ କୋଟି ଟଙ୍କା ଖର୍ଚ୍ଚ ହେବ ବୋଲି ସରକାର ଆକଳନ କରିଛନ୍ତି । 

ପ୍ରସ୍ତାବିତ ଜନାଶ୍ରୟ କୋଠାକୁ ଆକର୍ଷଣୀୟ ସ୍ଥାପତ୍ୟ ଶୈଳୀରେ ନିର୍ମାଣ କରିବାକୁ ଯୋଜନା କରିଛି ଓଡ଼ିଶା ସେତୁ ଓ ନିର୍ମାଣ ନିଗମ ଲିଃ(ଓବିସିସି) । ମୋଟ ୩.୨ ଏକର ଜାଗାରେ ପୂରା ପ୍ରକଳ୍ପ ଛିଡ଼ା ହେବ । ଏଥିପାଇଁ ଅନେକ କ୍ୱାର୍ଟର୍ସ ଭଙ୍ଗା ହୋଇ ଜାଗା ଖାଲି କରାଯାଇଛି । ପୂର୍ତ୍ତ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଓ ସଚିବ ସଞ୍ଜୟ ସିଂ ଜାଗା ବୁଲି ଦେଖିଛନ୍ତି । ପ୍ରସ୍ତାବିତ ଜନାଶ୍ରୟ ପ୍ରକଳ୍ପର ବେସ୍‌ମେଣ୍ଟରେ ୩ଟି ଭୂତଳ ମହଲା ରହିବ । ଏଠାରେ ୬୮୭ଟି କାର୍‌ ପାର୍କିଂ ହେବା ଭଳି ସ୍ଥାନ ଓ ସୁବିଧା ରଖାଯିବ । 

ଗ୍ରାଉଣ୍ଡ ଫ୍ଲୋର୍‌ରେ ଅଭ୍ୟର୍ଥନା ପ୍ରକୋଷ୍ଠ, ବିଭିନ୍ନ ଦୋକାନ ଓ ବ୍ୟବସାୟିକ ପ୍ରତିଷ୍ଠାନ, ପ୍ରତୀକ୍ଷାଳୟ ଓ ଜିନିଷ ରଖିବା ସ୍ଥାନ ରହିବ। ପ୍ରଥମ ମହଲାରୁ ପଞ୍ଚମ ମହଲା ଯାଏ ଦୋକାନ ଓ ବିଭିନ୍ନ ଅଫିସ୍‌ ପାଇଁ ସ୍ଥାନ ରଖାଯିବ । ଷଷ୍ଠ ମହଲାରେ ହୋଟେଲ, ରୋଷେଇ ଓ ରେଷ୍ଟୁରାଣ୍ଟ, ଲଣ୍ଡ୍ରି, ଅବସର ବିନୋଦନ ସ୍ଥାନ ଓ ରିଡିଂ ରୁମ୍‌ ରହିବ । ସପ୍ତମ ମହଲାରେ କର୍ମଚାରୀଙ୍କ ବିଶ୍ରାମ ପାଇଁ କୋଠରୀ ଓ ଜନାଶ୍ରୟ’ର ବିଭିନ୍ନ ଅଫିସ୍‌ ରହିବ । ଅଷ୍ଟମ ମହଲାରୁ ୧୪ ମହଲା ଯାଏ ୩ଟି ବେଡ୍‌ ବିଶିଷ୍ଟ ୬୪ଟି ରୁମ୍‌ ରହିବ । ପ୍ରତି ମହଲାରେ ୧୯୨ଟି ବେଡ୍‌ ରଖାଯିବ । ସବୁ ରୁମ୍‌ରେ ସ୍ୱତନ୍ତ୍ର ଶୌଚାଳୟ ସୁବିଧା କରାଯିବ । ୧୫ ମହଲାରୁ ୧୯ ମହଲା ଯାଏ ୨ଟି ବେଡ୍‌ ବିଶିଷ୍ଟ ୬୪ଟି ରୁମ୍‌ ରହିବ । ପ୍ରତି ମହଲାରେ ୧୨୮ଟି ବେଡ୍‌ ରହିବ । ଅଷ୍ଟମ ମହଲାରୁ ୧୯ ମହଲା ଯାଏ ମୋଟ ୪୪୮ଟି ରୁମ୍‌ରେ ୧୯୮୪ ବେଡ୍‌ ରଖିବାକୁ ଓବିସିସି ଡିଜାଇନ୍‌ କରିଛି । ପ୍ରଥମ ପର୍ଯ୍ୟାୟରେ ୟୁନିଟ୍‌-୨ ଅଞ୍ଚଳରୁ ମୋଟ ୨୨୪ କ୍ୱାର୍ଟର୍ସ ଭଙ୍ଗାଯିବ । ଦ୍ୱିତୀୟ ପର୍ଯ୍ୟାୟରେ ୟୁନିଟ୍‌୨ରୁ ୧୮୦ଟି କ୍ୱାର୍ଟର୍ସ ଭଙ୍ଗାଯିବ । 

Powered by Froala Editor