ଜଗତସିଂହପୁର : ଜଗତସିଂହପୁର ସଁଅରା ଛକ ନିକଟରେ ଥିବା ଜିଲା ଗ୍ରାମ୍ୟ ଉନ୍ନୟନ ସଂସ୍ଥା (ଡ଼ିଆର୍‌ଡ଼ିଏ)ର ମହିଳାଙ୍କ ଶୌଚାଳୟରେ ସ୍ପାଏ କ୍ୟାମେରା ମିଳିବା ପରେ ଜିଲା ପୁଲିସ ପକ୍ଷରୁ ଅଭିଯୁକ୍ତକୁ ଧରିବା ପାଇଁ ଜୋରଦାର ଉଦ୍ୟମ ଚାଲିଛି। ତିର୍ତ୍ତୋଲ ପୁଲିସ, ସାଇବର ପୁଲିସ ଓ ସାଇଣ୍ଟିଫିକ ଟିମ କ୍ୟାମେରା କେବେଠାରୁ ଲାଗିଥିଲା, କ’ଣ ରେକର୍ଡ଼ିଂ ହୋଇଛି ଓ କିଏ କ୍ୟାମେରା ଲଗାଇ ରେକର୍ଡ଼ିଂ ନେଇଛି ତା’ର ତନାଘନା ଚଳାଇଛି। ଘଟଣାରୁ ପ୍ରକାଶ ଯେ, ଜଗତସିଂହପୁର ଗ୍ରାମ୍ୟ ଉନ୍ନୟନ ସଂସ୍ଥା (ଡିଆରଡିଏ) କାର୍ଯ୍ୟାଳୟର ପ୍ରଥମ ମହଲାରେ ଥିବା ମହିଳାଙ୍କ ଶୌଚାଳୟରେ ୨ଦିନ ତଳେ ଜଣେ ମହିଳା କର୍ମଚାରୀ ଏକ କ୍ୟାମେରା ପଡ଼ିଥିବା ଦେଖିଥିଲେ। କ୍ୟାମେରାଟି ଶୌଚାଳୟର ବେସିନ୍‌ ତଳେ ଲାଗିଥିଲା ବୋଲି ସନ୍ଦେହ କରାଯାଉଛି। କ୍ୟାମେରାରେ କୌଣସି ତାର ସଂଯୋଗ ନଥିଲା। ବ୍ୟାଟେରି ଦ୍ୱାରା ପରିଚାଳିତ ଏହି କ୍ୟାମେରା ମିଳିବା ସମୟରେ ଏକ ନୀଳ ରଙ୍ଗର ଲାଇଟ ଜଳୁଥିଲା। ବ୍ୟାଟେରି ଚାଳିତ ସ୍ପାଏ କ୍ୟାମେରା ସର୍ବାଧିକ ୪୮ଘଣ୍ଟା ଚାଲିପାରିବ ତେଣୁ ତାହା ଗତ ରବିବାର କିମ୍ବା ସୋମବାର ଲଗାଯାଇଥିବା ସନ୍ଦେହ କରାଯାଉଛି।
ଅନ୍ୟପଟେ ଏହି ଶୌଚାଳୟକୁ କାର୍ଯ୍ୟାଳୟର ବହୁ ମହିଳା କର୍ମଚାରୀ ବ୍ୟବହାର କରନ୍ତି। କାର୍ଯ୍ୟାଳୟକୁ ଆସୁଥିବା ବିଭିନ୍ନ ବ୍ଲକର ମହିଳା କର୍ମଚାରୀ, ସରପଞ୍ଚ, ବ୍ଲକ ଅଧ୍ୟକ୍ଷା ଓ ଜିଲାପରିଷଦ ସଭ୍ୟା ମଧ୍ୟ ବ୍ୟବହାର କରନ୍ତି। ଏବେ କ୍ୟାମେରା ଲଗାଇଥିବା ଅଭିଯୁକ୍ତ ଜଣକ ପୂର୍ବରୁ ମଧ୍ୟ ତାକୁ କେବେ ଲଗାଇ ଥାଇପାରେ ଓ ମଝିରେ ମଝିରେ ବ୍ୟାଟେରି ରିଚାର୍ଜ କରୁଥାଇ ପାରେ ବୋଲି ମଧ୍ୟ ସନ୍ଦେହ କରାଯାଉଛି। ତେବେ ମହିଳାଙ୍କ ଶୌଚାଳୟକୁ ଯାଇ ବାହାର ଲୋକ କ୍ୟାମେରା ଲଗାଇବା ସମ୍ଭବ କଥା ନୁହେଁ। ତେଣୁ ଏଥିରେ କାର୍ଯ୍ୟାଳୟର କର୍ମଚାରୀ ସମ୍ପୃକ୍ତ ଥିବା ସନ୍ଦେହ କରାଯାଉଛି। ମହିଳା କର୍ମଚାରୀ ଜଣକ କ୍ୟାମେରା ପାଇବା ପରେ ଅନ୍ୟ କର୍ମଚାରୀଙ୍କୁ ନେଇ ଦେଖାଇଥିଲେ। ପରେ ଡିଆରଡିଏର ଅତିରିକ୍ତ ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ ଏ ନେଇ ତିର୍ତ୍ତୋଲ ଥାନାରେ ଏତଲା ଦେଇଛନ୍ତି।
ଏ ସଂକ୍ରାନ୍ତରେ ଜିଲାପାଳ ଓ ଜିଲା ଆରକ୍ଷୀ ଅଧୀକ୍ଷକଙ୍କୁ ଅବଗତ କରାଯିବା ପରେ ତିର୍ତ୍ତୋଲ ପୁଲିସ ସହ ସାଇବର ଥାନା ଓ ସାଇଣ୍ଟିଫିକ ଟିମ ଯାଇ ତଦନ୍ତ କରିଛନ୍ତି; ମାତ୍ର ଏପର୍ଯ୍ୟନ୍ତ ପୁଲିସ ଅଭିଯୁକ୍ତ ପାଖରେ ପହଞ୍ଚିବାରେ ସଫଳ ହୋଇପାରି ନାହିଁ। ସାଇବର ପୁଲିସ ଏହି କ୍ୟାମେରା କେବେ ଠାରୁ ବ୍ୟବହାର ହୋଇଛି, ଏହା କେଉଁ ମୋବାଇଲ ସହ ବ୍ଲୁଟୁଥ୍‌ ମାଧ୍ୟମରେ ସଂଯୋଗ ଥିଲା କି ନାହିଁ, ପୂର୍ବରୁ ଡାଟା ଟ୍ରାନ୍ସଫର ହୋଇଛି କି ନାହିଁ ତାର ତର୍ଜମା ଚଳାଇଛି। କ୍ୟାମେରା ଲଗାଇଥିବା ଅଭିଯୁକ୍ତର ମଧ୍ୟ ରେକର୍ଡ଼ିଂ ଥାଇପାରେ ବୋଲି ପୁଲିସ ଅନୁମାନ କରୁଛି।

Powered by Froala Editor