ବେଙ୍ଗାଲୁରୁ:ବେଙ୍ଗାଲୁରୁ ବିମାନବନ୍ଦରରେ ଟଳିଲା ବଡ଼ ଦୁର୍ଘଟଣା। ଦିଲ୍ଲୀରୁ ଆସୁଥିବା ଏୟାର ଇଣ୍ଡିଆର ଏକ ଯାତ୍ରୀବାହୀ ବିମାନ ଅବତରଣ ସମୟରେ ‘ଟେଲ୍-ଷ୍ଟ୍ରାଇକ୍’ର ଶିକାର ହୋଇଛି। ଅର୍ଥାତ୍ ଲ୍ୟାଣ୍ଡିଂ ବେଳେ ରନ୍‌ୱେରେ ବିମାନର ପଛ ଭାଗ ପିଟି ହୋଇଯାଇଛି। ତେବେ ବିମାନଟି ସୁରକ୍ଷିତ ଭାବେ ଅବତରଣ କରିଛି।। ସମସ୍ତ ଯାତ୍ରୀ ଓ କ୍ରୁ ସଦସ୍ୟଙ୍କୁ ସୁରକ୍ଷିତ ବିମାନରୁ ଓହ୍ଲାଇଛନ୍ତି। ଏହି ଘଟଣାଟି ଏୟାର ଇଣ୍ଡିଆର ବିମାନ ଏଆଇ୨୬୫୧ ଘଟିଛି। ତେବେ ବିମାନଟି ଟେଲ୍ ଷ୍ଟ୍ରାଇକ ହେବା ପରେ ଗ୍ରାଉଣ୍ଡେଡ୍ କରାଯାଇଛି।

ଆଉ ଦିଲ୍ଲୀକୁ ଯିବାକୁ ଥିବା ଯାତ୍ରୀଙ୍କ ପାଇଁ ଅନ୍ୟ ବିକଳ୍ପ ଯୋଗାଇ ଦେବ ବୋଲି ଟାଟା ଗ୍ରୁପ ଚାଳିତ ଏୟାରଲାଇନ୍ସ ତରଫରୁ ଆଶ୍ବାସନା ଦିଆଯାଇଛି ।।ସୂଚନା ଅନୁଯାୟୀ,ଏହି ବିମାନଟି ଲ୍ୟାଣ୍ଡିଂ କରୁଥିବା ସମୟରେ ଅନ୍ୟ ଏକ ବଡ଼ ବିମାନ ସେଠାରୁ ଉଡ଼ାଣ ଭରିଥିଲା। ସେହି ବଡ଼ ବିମାନ ଯୋଗୁଁ ପବନର ଗତିରେ ପ୍ରବଳ ତରଙ୍ଗ ବା ‘ୱେକ୍ ଟର୍ବୁଲନ୍ସ’ ସୃଷ୍ଟି ହୋଇଥିଲା।

ଏହି କାରଣରୁ ବିମାନର ସନ୍ତୁଳନ ବିଗିଡ଼ି ଯାଇଥିଲା।ପବନର ଝଟ୍‌କା ଯୋଗୁଁ ପାଇଲଟ୍ ବିମାନକୁ ପୁଣି ଉପରକୁ ଉଠାଇବାକୁ ଚେଷ୍ଟା କରିଥିଲେ। ଏହି ସମୟରେ ବିମାନର ପଛ ଭାଗ ରନ୍‌ୱେରେ ଘଷି ହୋଇଯାଇଥିଲା। ଏହି ଘଟଣା ପରେ ବିମାନକୁ ଏବେ ଯାଞ୍ଚ ପାଇଁ ଗ୍ରାଉଣ୍ଡେଡ୍ କରାଯାଇଛି। ବେଙ୍ଗାଲୁରୁରୁ ଦିଲ୍ଲୀ ଫେରିବାକୁ ଥିବା ବିମାନ ଏଆଇ୨୬୫୧ କୁ ବାତିଲ କରାଯାଇଛି। ବିମାନରେ ୧୮୧ ଜଣ ଯାତ୍ରୀ ରହିଥିଲେ । ସମସ୍ତଙ୍କୁ ସୁରକ୍ଷିତ ଓହ୍ଲାଇ ଦିଆଯାଇ ସେମାନଙ୍କ ପାଇଁ ଅନ୍ୟ ବିକଳ୍ପ ବ୍ୟବସ୍ଥା କରାଯାଇଛି । ବିସିସିଆଇ ଏବଂ ନିୟାମକ କର୍ତ୍ତୃପକ୍ଷ ଏହାର ତଦନ୍ତ ଆରମ୍ଭ କରିଛନ୍ତି।

Powered by Froala Editor