ଭୁବନେଶ୍ୱର : ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚଏସଇ) +୨ ବାଣିଜ୍ୟ ଓ ବିଜ୍ଞାନ ବିଭାଗ ଛାତ୍ରଛାତ୍ରୀଙ୍କ ଫଳ ଆସନ୍ତା ୩୧ ତାରିଖ ସନ୍ଧ୍ୟାରେ ପ୍ରକାଶ ପାଇବ । ଛାତ୍ରଛାତ୍ରୀମାନେ orissaresults.nic.in ରୁ ନିଜର ରେଜଲ୍ଟ ଜାଣିପାରିବେ ବୋଲି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି । ବୁଧବାର ଅପରାହ୍ନ ୪ଟା ୩୦ ରେ ମନ୍ତ୍ରୀ ଶ୍ରୀ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ପରିଷଦ ଅଧିକାରୀଙ୍କ ବୈଠକରେ ଏହି ନିଷ୍ପତ୍ତି ହୋଇଥିବା ମନ୍ତ୍ରୀ ଶ୍ରୀ ଦାଶ ସୂଚନା ଦେଇଛନ୍ତି । ଶନିବାର ପାଖାପାଖି ୧ ଲକ୍ଷ ୨୦ ହଜାର ଛାତ୍ରଛାତ୍ରୀଙ୍କ ଫଳ ପ୍ରକାଶ ପାଇବ । ବିଜ୍ଞାନରେ ପାଖାପାଖି ୯୫ ହଜାର ଓ ବାଣିଜ୍ୟରେ ୨୫ ହଜାର ଛାତ୍ରଛାତ୍ରୀ ଅଛନ୍ତି । ଯୁକ୍ତ ଦୁଇ କଳାରେ ଅଧିକ ସଂଖ୍ୟକ ଛାତ୍ରଛାତ୍ରୀ ଥିବାରୁ ଫଳ ପ୍ରକାଶରେ ବିଳମ୍ବ ହେବ । କଳା ଓ ଧନ୍ଦାମୁଳକ ବିଭାଗର ଛାତ୍ରଛାତ୍ରୀଙ୍କ ଆବଶ୍ୟକ କାଗଜପତ୍ର ଯାଞ୍ଚ କରିବାରେ ଅଧିକ ସମୟ ଆବଶ୍ୟକ ହେଉଥିବାରୁ ଫଳ ପ୍ରକାଶ ପାଇଁ ସମୟ ଦେବାକୁ ସୁପି୍ରମକୋର୍ଟର ଅନୁମତି ଲୋଡିଛି ପରିଷଦ । ପରିଷଦ ତରଫରୁ ସମୟ ଯାଚିକା ବା ଟାଇମ ପିଟିସନ ଦାଖଲ କରାଯାଇଛି । ତଥାପି କଳା ଓ ଧନ୍ଦାମୂଳକ ପରୀକ୍ଷା ଫଳ କିଭଳି ଶୀଘ୍ର ପ୍ରକାଶ ପାଇବ, ପରିଷଦ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି ଜାରି ରହିଛି ବୋଲି ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଅଧିକାରୀ ସୂଚନା ଦେଇଛନ୍ତି ।

Powered by Froala Editor