ମଣିପୁର ରାଜଧାନୀ ଇମ୍ଫାଲରେ ପୁଣି ଥରେ ହିଂସା ଦେଖାଦେଇଛି। ଶନିବାର ବିଶାଳ ପଦଯାତ୍ରା ବେଳେ ପ୍ରଦର୍ଶନକାରୀ ଏବଂ ସୁରକ୍ଷାକର୍ମୀଙ୍କ ମଧ୍ୟରେ ତୀବ୍ର ସଂଘର୍ଷ ଘଟିଛି। 'କୋକୋମି' (COCOMI) ପକ୍ଷରୁ ଆୟୋଜିତ ଏହି ରାଲି ମୁଖ୍ୟମନ୍ତ୍ରୀଙ୍କ ବାସଭବନ ଆଡ଼କୁ ଯାଉଥିବା ବେଳେ ପୋଲିସ ଏହାକୁ ଅଟକାଇଥିଲା। ସୁରକ୍ଷାକର୍ମୀଙ୍କ ବାରଣ ସତ୍ତ୍ୱେ ଭିଡ଼ ଆଗକୁ ବଢ଼ିବାରୁ ସଂଘର୍ଷ ଆରମ୍ଭ ହୋଇଥିଲା।

ତେବେ COCOMI ପକ୍ଷରୁ ଚେତାବନୀ ଦିଆଯାଇଛି ଯେ, ଯଦି ସରକାର ତୁରନ୍ତ କୌଣସି ପଦକ୍ଷେପ ନ ନିଅନ୍ତି, ତେବେ ଆଗାମୀ ଦିନରେ ଆନ୍ଦୋଳନକୁ ଆହୁରି ଜୋରଦାର କରାଯିବ। ମେ ୨୦୨୩ରୁ ମଣିପୁରରେ ମେଇତି ଏବଂ କୁକି ସମ୍ପ୍ରଦାୟ ମଧ୍ୟରେ ଚାଲିଥିବା ସଂଘର୍ଷରେ ଏପର୍ଯ୍ୟନ୍ତ ୨୬୦ରୁ ଅଧିକ ଲୋକଙ୍କ ପ୍ରାଣହାନି ଘଟିଥିବା ବେଳେ ହଜାର ହଜାର ଲୋକ ବେସାହାରା ହୋଇଛନ୍ତି।

୨୦୨୩ ମେ ମାସରୁ ଲାଗିରହିଥିବା ଜାତିଗତ ହିଂସା ମଣିପୁରକୁ ଅସ୍ତବ୍ୟସ୍ତ କରି ରଖିଛି। ହତ୍ୟାକାଣ୍ଡ ଏବଂ ହାଇୱେରେ ଆମ୍ବୁସ ଭଳି ଘଟଣାକୁ ନେଇ ଜନସାଧାରଣଙ୍କ ମଧ୍ୟରେ ପ୍ରବଳ ଅସନ୍ତୋଷ ଦେଖାଦେଇଛି। 

ନାର୍କୋ-ଟେରରିଜିମ୍ ବନ୍ଦ କରିବା, କୁକି ବିଦ୍ରୋହୀଙ୍କ ସହ ହୋଇଥିବା 'ସସପେନସନ ଅଫ୍ ଅପରେସନ' (SoO) ଚୁକ୍ତିକୁ ରଦ୍ଦ କରିବା ଏବଂ ବିସ୍ଥାପିତ ଲୋକଙ୍କୁ ଥଇଥାନ କରିବା ଭଳି ଦାବି ନେଇ ପୁଣି ଥରେ ଆନ୍ଦୋଳନ କରାଯାଇଥିଲା। ହିଂସା ଯୋଗୁଁ ଅପରାହ୍ନ ୧ଟାରୁ ଇମ୍ଫାଲର ସମସ୍ତ ବଜାର ବନ୍ଦ କରିଦିଆଯାଇଥିଲା। ବିଶେଷ କରି ଇମା କେଥେଲ୍ ଏବଂ ଆଲୁ ଗଲି ଅଞ୍ଚଳରେ ବ୍ୟାପକ ପୋଲିସ ମୁତୟନ କରାଯାଇଛି।

ଉତ୍ତ୍ୟକ୍ତ ପ୍ରଦର୍ଶନକାରୀଙ୍କୁ ଛତ୍ରଭଙ୍ଗ ଦେବା ପାଇଁ ସୁରକ୍ଷା ବାହିନୀ ଲୁହବୁହା ଗ୍ୟାସ ପ୍ରୟୋଗ କରିଛନ୍ତି। କିଛି ପ୍ରଦର୍ଶନକାରୀଙ୍କୁ ଅଟକ ରଖାଯିବା ସହ ସେମାନଙ୍କ ପାଖରୁ ବାଟୁଳି ଓ ପଥର ଜବତ କରାଯାଇଛି।ଫଳରେ ଅନେକ ଲୋକ ଆହତ ହୋଇଥିବା ବେଳେ ସହରରେ ଚାପା ଉତ୍ତେଜନା ଜାରି ରହିଛି।

Powered by Froala Editor