ଜାପାନରେ ପ୍ରଧାନମନ୍ତ୍ରୀ ସାନାଏ ତାକାଏଚିଙ୍କ ଲିବରାଲ ଡେମୋକ୍ରାଟିକ୍ ପାର୍ଟି (LDP) ରେକର୍ଡ ଭାଙ୍ଗି ବିଜୟ ସହିତ କ୍ଷମତାକୁ ଫେରିବାକୁ ଯାଉଛି। ରବିବାର ସଂସଦୀୟ ନିର୍ବାଚନରେ ଶାସକ ଦଳ ଦୁଇ-ତୃତୀୟାଂଶ ବହୁମତ ହାସଲ କରିଛି, ଜାପାନୀ ଗଣମାଧ୍ୟମ ପ୍ରାଥମିକ ଫଳାଫଳକୁ ଉଦ୍ଧୃତ କରି ରିପୋର୍ଟ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଅବସରରେ ଜାପାନ ପ୍ରଧାନମନ୍ତ୍ରୀଙ୍କୁ ଅଭିନନ୍ଦନ ଜଣାଇବା ସହ ତାକାଏଚିଙ୍କ ନେତୃତ୍ୱରେ ୨ ଦେଶ ମଧ୍ୟରେ ସମ୍ପର୍କ ଆହୁରି ନିବିଡ଼ ହେବା ନେଇ ଦୃଢ଼ୋକ୍ତି ବ୍ୟକ୍ତ କରିଛନ୍ତି।

ସଂସଦୀୟ ନିର୍ବାଚନରେ ତାଙ୍କର ବିପୁଳ ବିଜୟ ପରେ, ଜାପାନ ପ୍ରଧାନମନ୍ତ୍ରୀ ସାର୍ବଜନୀନ ଟେଲିଭିଜନ ନେଟୱାର୍କ NHK ସହିତ ଏକ ସାକ୍ଷାତକାରରେ କହିଥିଲେ ଯେ, ତାଙ୍କର ଧ୍ୟାନ ଏପରି ନୀତିଗୁଡ଼ିକୁ ଆଗକୁ ବଢାଇବା ଉପରେ ରହିବ ଯାହା ଜାପାନକୁ ଆହୁରି ବିକାଶ  କରିବ।

ନିମ୍ନ ସଦନର ୪୬୫ ଆସନ ମଧ୍ୟରୁ ଲିବେରାଲ ଡେମୋକ୍ରାଟିକ୍‌ ପାର୍ଟି ନେତୃତ୍ୱରେ ତାକାଏଚିଙ୍କ ଶାସକ ମେଣ୍ଟ ଦୁଇ-ତୃତୀୟାଂଶରୁ ଅଧିକ ଆସନ ଜିତିବା ଏକପ୍ରକାର ନିଶ୍ଚିତ ବୋଲି ଏକ୍‌ଜିଟ୍‌ ପୋଲ୍‌ରେ ପୂର୍ବାନୁମାନ କରାଯାଇଥିଲା। ବୃହତ୍‌ ଜନାଦେଶ ଫଳରେ ତାକାଏଚି ଜାପାନର ଅର୍ଥନୀତି ଏବଂ ସାମରିକ ସାମର୍ଥ୍ୟ ବୃଦ୍ଧି ଦିଗରେ ବଡ଼ ପଦକ୍ଷେପ ନେବା ପାଇଁ ସୁଯୋଗ ପାଇବେ। ଚାଇନା ସହ ଜାପାନର ଉତ୍ତେଜନା ବଢ଼ିଥିବାବେଳେ ତାକାଏଚି ଆମେରିକା ସହ ସମ୍ପର୍କ ବଢ଼ାଇବାକୁ ଉଦ୍ୟମ ଚଳାଇଛନ୍ତି।

ଏନଏଚକେ ଅନୁଯାୟୀ, ସାନାଏ ତାକାଏଚିଙ୍କ ଲିବରାଲ ଡେମୋକ୍ରାଟିକ୍ ପାର୍ଟି (ଏଲଡିପି) ସୋମବାର (ଫେବୃଆରୀ ୯) ସକାଳ ସୁଦ୍ଧା ଏକାକୀ ୩୧୬ ଆସନ ଜିତିଛି । ଜାପାନର ୪୬୫ ସଦସ୍ୟ ବିଶିଷ୍ଟ ନିମ୍ନ ସଦନରେ ୨୬୧ ଆସନର ବହୁମତ ସଂଖ୍ୟା ଗରିଷ୍ଠତାକୁ ସହଜରେ ଅତିକ୍ରମ କରିଛି।

Powered by Froala Editor