ଖନ୍ତାପଡ଼ା:  ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ଅଧୀନ ଶ୍ରୀଜଙ୍ଗ ପଞ୍ଚାୟତସ୍ଥିତ ଏକ ଉଚ୍ଚ ବିଦ୍ୟାଳୟର ଜଣେ ଛାତ୍ରଙ୍କ ସ୍କୁଲ ବ୍ୟାଗରୁ ଏକ ବନ୍ଧୁକ ଉଦ୍ଧାର ହୋଇଛି । ପୁଲିସ ଘଟଣାସ୍ଥଳରେ ପହଞ୍ଚି ବନ୍ଧୁଜ ଜବତ୍ କରିଛି । ଏହାକୁ ଫୋରେନସିକ୍ ଲ୍ୟାବକୁ ପଠାଯିବ ଓ ରିପୋର୍ଟ ଆସିଲେ ବନ୍ଧୁକ ସମ୍ପର୍କରେ ସଠିକ ତଥ୍ୟ ପ୍ରଦାନ କରାଯିବ ବୋଲି ପୁଲିସ ସୂଚନା ଦେଇଛି ।
ସୂଚନା ଅନୁଯାୟୀ ଜଣେ ଅଷ୍ଟମ ଶ୍ରେଣୀ ଛାତ୍ରର ସ୍କୁଲ ବ୍ୟାଗରେ ଏକ ବନ୍ଧୁକ ଥିବା ଶ୍ରେଣୀ ଶିକ୍ଷକ ଜାଣିବାକୁ ପାଇ ପ୍ରଧାନ ଶିକ୍ଷୟିତ୍ରୀଙ୍କୁ ଅବଗତ କରାଇଥିଲେ । ପ୍ରଧାନ ଶିକ୍ଷୟିତ୍ରୀ ଏ ସମ୍ପର୍କରେ ସ୍ଥାନୀୟ ସରପଞ୍ଚଙ୍କୁ ଖବର ଦେଇଥିଲେ । ସରପଞ୍ଚ ବିଦ୍ୟାଳୟରେ ପହଞ୍ଚି ବିଦ୍ୟାଳୟ ପରିଚାଳନା କମିଟି ସହିତ ଆଲୋଚନା କରିବା ପରେ ଖନ୍ତାପଡ଼ା ପୁଲିସକୁ ଖବର ଦେଇଥିଲେ । ଖବର ପାଇ ଖନ୍ତାପଡ଼ା ଥାନା ଏଏସଆଇ ଉଦୟ ନାରାୟଣ ଭକ୍ତା ସାଧା ପୋଷାକରେ ବିଦ୍ୟାଳୟରେ ପହଞ୍ଚି ବନ୍ଧୁକ ଜବତ୍ କରିବା ସହିତ ନାବାଳକ ଛାତ୍ର ଥାନାକୁ ନେଉଥିବା ବେଳେ ଉପସ୍ଥିତ ଲୋକଙ୍କ ବିରୋଧର ଶିକାର ହୋଇଥିଲେ । ଏଏସଆଇ ଶ୍ରୀ ଭକ୍ତା ପୁଲିସ ପୋଷାକରେ ନଥିବାରୁ ଲୋକେ ତାଙ୍କୁ ବିରୋଧ କରି ଅଟକ ରଖିଥିଲେ । ପରେ ଖବର ପାଇ ଥାନାର ଏସଆଇ ବିକ୍ରମ ମହାପାତ୍ର ଓ ଅନ୍ୟ କର୍ମଚାରୀ ବିଦ୍ୟାଳୟରେ ପହଞ୍ଚିଥିଲେ । କିନ୍ତୁ ଉତ୍ୟକ୍ତ ଲୋକେ ସମସ୍ତ ପୁଲିସ ଅଧିକାରୀ ଓ କର୍ମଚାରୀଙ୍କୁ ବିଦ୍ୟାଳୟର ଅଫିସ ଗୃହରେ ଦୀର୍ଘ ୪ଘଣ୍ଟା ଧରି ଅଟକ ରଖିଥିଲେ ।

Powered by Froala Editor