ଭୁବନେଶ୍ବର: ସରକାର ଶିକ୍ଷାର ବିକାଶ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି, କିନ୍ତୁ ଶିକ୍ଷକ ଅଭାବରୁ ଛାତ୍ରଛାତ୍ରୀଙ୍କ ପାଠପଢ଼ା ବ୍ୟାହତ ହେଉଥିବାରୁ ସେମାନଙ୍କ ଭବିଷ୍ୟତ ଅନ୍ଧକାର ଆଡ଼କୁ ଠେଲି ହୋଇଯାଉଛି। ସରକାରୀ ହିସାବରେ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟଗୁଡ଼ିକରେ ପ୍ରାୟ ୫୦ ହଜାରରୁ ଊର୍ଦ୍ଧ୍ବ ଶିକ୍ଷକ ପଦ ଖାଲି ପଡ଼ିଥିବା ବେଳେ ଶିକ୍ଷକ ନେତାଙ୍କ ଅଭିଯୋଗ ଅନୁସାରେ, ପ୍ରଧାନ ଶିକ୍ଷକ, ସହକାରୀ ଶିକ୍ଷକ, ବିଭିନ୍ନ ବିଷୟଭିତ୍ତିକ ଖାଲି ପଡିଥିବା ଶିକ୍ଷକ ପଦ ସଂଖ୍ୟା ୯୦ ହଜାରରୁ ଊର୍ଦ୍ଧ୍ବ ହେବ।

ଶିକ୍ଷକ ଅଭାବ କାରଣରୁ ଗତ ଦୁଇଦିନ ମଧ୍ୟରେ ଦୁଇଟି ବିଦ୍ୟାଳୟରେ ତାଲା ଝୁଲିଲାଣି। କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ହାଟଡିହି ବ୍ଲକ ଗେଡ଼ମା ସରକାରୀ ପ୍ରାଥମିକ ବିଦ୍ୟାଳୟ ଫାଟକରେ ତାଲା ପକାଇ ଛାତ୍ରଛାତ୍ରୀ ଏବଂ ଅଭିଭାବକ ଧାରଣା ଦେଇଥିଲେ। ଅଭିଯୋଗ ଅନୁଯାୟୀ, ଏହି ବିଦ୍ୟାଳୟରେ ଶିଶୁ ବାଟିକାଠାରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ମୋଟ ୬ଟି ଶ୍ରେଣୀ ରହିଛି। ୬୮ ପିଲାଙ୍କୁ ପଢ଼ାଇବା ପାଇଁ ମାତ୍ର ଦୁଇ ଜଣ ଶିକ୍ଷକ ଅଛନ୍ତି। ଦୁଇ ଶିକ୍ଷକଙ୍କ ମଧ୍ୟରୁ ଜଣେ ସବୁବେଳେ ସରକାରୀ କାର୍ଯ୍ୟ ଓ ଅନ୍ୟାନ୍ୟ ପ୍ରଶାସନିକ କାର୍ଯ୍ୟରେ ବ୍ୟସ୍ତ ରହୁଛନ୍ତି। ଫଳରେ ଜଣେ ମାତ୍ର ଶିକ୍ଷକଙ୍କ ଭରସାରେ ଚାଲିଛି ସମଗ୍ର ବିଦ୍ୟାଳୟ। ଜଣେ ଶିକ୍ଷକ କିଭଳି ଏକା ସାଙ୍ଗରେ ୬ଟି ଶ୍ରେଣୀର ପିଲାଙ୍କୁ ପାଠ ପଢ଼ାଇବେ ଏହାକୁ ନେଇ ଅଭିଭାବକଙ୍କ ମଧ୍ୟରେ ଅସନ୍ତୋଷ ତେଜିବାରେ ଲାଗିଛି। ବୌଦ୍ଧ ଜିଲା କଣ୍ଟାମାଳ ବ୍ଲକ ଦେଢ଼େନମାଳ ଉଚ୍ଚ ପ୍ରାଥମିକ ବିଦ୍ୟାଳୟ ଫାଟକରେ ତାଲା ପକାଇଛନ୍ତି ଛାତ୍ରଛାତ୍ରୀ ଓ ଅଭିଭାବକ। ଶିକ୍ଷକ ନିଯୁକ୍ତି ପ୍ରତିବାଦରେ ସେମାନେ ଧାରଣାରେ ବସିଥିଲେ। ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୭୪ ଛାତ୍ରଛାତ୍ରୀ ଥିବାବେଳେ ମାତ୍ର ତିନିଜଣ ଶିକ୍ଷକ ଅଛନ୍ତି। ଫଳରେ ପିଲାଙ୍କ ଶିକ୍ଷାଦାନରେ ବ୍ୟାହତ ହେଉଛି। କେବଳ ଏହି ଦୁଇଟି ବିଦ୍ୟାଳୟରେ ଏଭଳି ଘଟଣା ସୃଷ୍ଟି ହୋଇଛି ତାହା ନୁହେଁ; ବରଂ ରାଜ୍ୟର ଅନେକ ବିଦ୍ୟାଳୟରେ ସମାନ ପରିସ୍ଥିତି ଦେଖିବାକୁ ମିଳୁଛି।

୨୦୨୫ ଅଗଷ୍ଟରେ ବିଦ୍ୟାଳୟ ଓ ଗଣଶିକ୍ଷା ବିଭାଗର ତତ୍କାଳୀନ ସଚିବ ପ୍ରାୟ ୪୫ହଜାର ଶିକ୍ଷକ ପଦ ଖାଲି ପଡ଼ିଥିଲା ବୋଲି ସରକାରଙ୍କୁ ଜଣାଇଥିଲେ। ବାର୍ଷିକ ୫ ହଜାର ଶିକ୍ଷକ ଅବସର ଗ୍ରହଣ କରୁଛନ୍ତି। ଏହାକୁ ଦେଖିଲେ ବର୍ତ୍ତମାନ ସ୍ଥିତିରେ ୫୦ ହଜାରରୁ ଊର୍ଦ୍ଧ୍ବ ଶିକ୍ଷକ ପଦ ଖାଲି ପଡ଼ିଛି। ରାଜ୍ୟ ସରକାର ୩ବର୍ଷ ମଧ୍ୟରେ ବର୍ଷକୁ ୧୫ ହଜାର ଲେଖାଏଁ କରି ୪୫ ହଜାର ଶିକ୍ଷକ ନିଯୁକ୍ତି ଦେବେ ବୋଲି ଘୋଷଣା କରିଛନ୍ତି; କିନ୍ତୁ ଏପର୍ଯ୍ୟନ୍ତ ଶିକ୍ଷକ ନିଯୁକ୍ତି କ୍ଷେତ୍ରରେ କୌଣସି ସ୍ପଷ୍ଟତା ଆସିପାରୁ ନାହିଁ। ସରକାର ପ୍ରଥମରୁ ୮ମ ଶ୍ରେଣୀ ପର୍ଯ୍ୟନ୍ତ ପାଠ୍ୟପୁସ୍ତକ ବଦଳାଇଛନ୍ତି। ତେଣୁ ପ୍ରତି ବ୍ଲକରେ ଶିକ୍ଷକଙ୍କୁ ନୂତନ ପାଠ୍ୟପୁସ୍ତକ ଉପରେ ତାଲିମ ଦିଆଯାଉଛି।

ଫଳସ୍ବରୂପ ଶିକ୍ଷକ ବିଦ୍ୟାଳୟ ଛାଡ଼ି ତାଲିମ ନେଉଛନ୍ତି। ମାର୍ଚ୍ଚରେ ଛାତ୍ରଛାତ୍ରୀଙ୍କ ବାର୍ଷିକ ପରୀକ୍ଷା ହେବ। ଶିକ୍ଷକ ଅଭାବ କାରଣରୁ ଅନେକ ବିଦ୍ୟାଳୟର ପାଠପଢ଼ା ବାକି ରହିଛି। ଏଭଳି ପରିସ୍ଥିତିରେ ଶିକ୍ଷକଙ୍କ ତାଲିମ ପାଠପଢ଼ାକୁ ଆହୁରି ବ୍ୟାହତ କରୁଛି। ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘର ସଭାପତି ବ୍ରହ୍ମାନନ୍ଦ ମହାରଣା କହିଛନ୍ତି, ସରକାର ରିପୋର୍ଟରେ ଯେତିକି ପଦବୀ ଖାଲି ଅଛି ବୋଲି ଦର୍ଶାଯାଇଛି ତାହା ପୂରଣ ପାଇଁ ପର୍ଯ୍ୟାୟକ୍ରମେ ନିଯୁକ୍ତି ଦିଆଯାଉ। ସ୍କିମାଟିକ୍ ଶିକ୍ଷକଙ୍କୁ ମୁଖ୍ୟମନ୍ତ୍ରୀଙ୍କ ଘୋଷଣା ଅନୁଯାୟୀ ନିୟମିତ କରାଯାଉ। ପ୍ରଧାନଶିକ୍ଷକ, ବିଷୟଭିତ୍ତିକ ଶିକ୍ଷକ ଖାଲି ପଡ଼ିଥିବା ପଦବୀକୁ ପଦୋନ୍ନତି ଦେଇ ପୂରଣ କରାଯାଉ ଏବଂ ପ୍ରାଥମିକ ବିଦ୍ୟାଳୟରେ ଆବଶ୍ୟକତାକୁ ଦୃଷ୍ଟିରେ ରଖି ନୂଆ ଶିକ୍ଷକ ପଦବୀ ସୃଷ୍ଟି କରାଯାଉ।

Powered by Froala Editor