କେନ୍ଦ୍ର ସରକାର ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଆଇନ (MGNREGA)କୁ ବାତିଲ କରି ଗ୍ରାମୀଣ ନିଯୁକ୍ତି ପାଇଁ ଏକ ନୂତନ ଆଇନ ପ୍ରଣୟନ କରିବାକୁ ଯାଉଛନ୍ତି। ସରକାର ସଂସଦରେ ଏଥିପାଇଁ ଏକ ବିଲ୍ ଆଗତ କରିବେ। ‘ବିକଶିତ ଭାରତ ନିଯୁକ୍ତି ଏବଂ ଜୀବିକା ମିଶନ (ଗ୍ରାମୀଣ) ପାଇଁ ଗ୍ୟାରେଣ୍ଟି -VB-G RAM G ବିଲ, ୨୦୨୫’ ଲୋକ ସଭାରେ ଉପସ୍ଥାପିତ ହେବାକୁ ଯାଉଛି। ବିଲର ଏକ କପି ଅନୁଯାୟୀ, ଏହାର ଉଦ୍ଦେଶ୍ୟ ହେଉଛି ୨୦୦୫ରେ ପ୍ରଣୀତ MNREGA ଆଇନକୁ ବାତିଲ କରିବା ଏବଂ ‘ବିକଶିତ ଭାରତ ୨୦୪୭’ ର ଜାତୀୟ ଦୃଷ୍ଟିକୋଣ ସହିତ ଏକ ନୂତନ ଏବଂ ବ୍ୟାପକ ଗ୍ରାମୀଣ ନିଯୁକ୍ତି ଢାଞ୍ଚା ସହିତ ଏହାକୁ ବଦଳାଯିବା।

ଏହି ବିଲ୍ ଅନୁଯାୟୀ, ପ୍ରତ୍ୟେକ ଗ୍ରାମୀଣ ପରିବାର ପ୍ରତି ଆର୍ଥିକ ବର୍ଷରେ ୧୨୫ ଦିନର ମଜୁରୀ ନିଯୁକ୍ତିର ଏକ ବୈଧାନିକ ଗ୍ୟାରେଣ୍ଟି ପାଇବେ। ହେଲେ, ବିଲ୍ ଆଗତ ସମୟରେ ସଂସଦରେ ହଙ୍ଗାମା ହେବାର ଆଶା କରାଯାଉଛି। ମନରେଗାର ପୂର୍ଣ୍ଣ ରୂପ ହେଉଛି ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଆଇନ। ଏହି ଆଇନ ୨୦୦୫ ମସିହାରେ UPA ସରକାର ଦ୍ୱାରା ଭାରତୀୟ ସଂସଦରେ ପ୍ରବର୍ତ୍ତନ କରାଯାଇଥିଲା।

ମୂଳତଃ ଏହାକୁ ନରେଗା ନାମ ଦିଆଯାଇଥିଲା, ୨୦୦୯ ମସିହାରେ ମହାତ୍ମା ଗାନ୍ଧୀଙ୍କ ସମ୍ମାନାର୍ଥେ ଏହାକୁ MGNREGA ରେ ପରିବର୍ତ୍ତନ କରାଯାଇଥିଲା। ୧ ଏପ୍ରିଲ, ୨୦୦୮ ସୁଦ୍ଧା, ଏହାକୁ ଦେଶର ସମସ୍ତ ଜିଲ୍ଲାରେ ବିସ୍ତାର କରାଯାଇଥିଲା, ଯାହା ଗ୍ରାମାଞ୍ଚଳର ଲୋକମାନଙ୍କୁ ୧୦୦ ଦିନର ନିଶ୍ଚିତ ନିଯୁକ୍ତି ପ୍ରଦାନ କରିଥିଲା।

ଏହି ବିଲ୍‌ର ଲକ୍ଷ୍ୟ ହେଉଛି “ଏକ ବିକଶିତ ଭାରତ ୨୦୪୭ ର ଜାତୀୟ ଦୃଷ୍ଟିକୋଣ ସହିତ ସମନ୍ୱିତ ଏକ ଗ୍ରାମୀଣ ବିକାଶ ଢାଞ୍ଚା” ସୃଷ୍ଟି କରିବା ଯାହା ଅଧୀନରେ ଗ୍ରାମୀଣ ପରିବାରର ପ୍ରତ୍ୟେକ ବୟସ୍କ ସଦସ୍ୟ ଅଣକୁଶଳୀ ହସ୍ତକୃତ କାମ କରିବାକୁ ଇଚ୍ଛୁକ ହେବେ।

ଏହି ବିଲ ସୋମବାର ପ୍ରକାଶିତ ଲୋକସଭାର ପରିପୂରକ କାର୍ଯ୍ୟସୂଚୀରେ ତାଲିକାଭୁକ୍ତ କରାଯାଇଛି। ଗ୍ରାମୀଣ ବିକାଶ ମନ୍ତ୍ରୀ ଶିବରାଜ ସିଂହ ଚୌହାନ ବିଲ ପାଇଁ ତାଙ୍କ ଉଦ୍ଦେଶ୍ୟ ଏବଂ କାରଣ ବିବୃତ୍ତିରେ କହିଛନ୍ତି, ଗତ ଦୁଇ ଦଶନ୍ଧି ଧରି ଗ୍ରାମୀଣ ପରିବାରଗୁଡ଼ିକୁ ନିଶ୍ଚିତ ନିଯୁକ୍ତି ପ୍ରଦାନ କରିବାରେ ମନରେଗା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଗ୍ରାମାଞ୍ଚଳରେ ଗୁରୁତ୍ୱପୂର୍ଣ୍ଣ ସାମାଜିକ-ଆର୍ଥିକ ପରିବର୍ତ୍ତନ, ସାମାଜିକ ସୁରକ୍ଷା ଯୋଜନାର ବ୍ୟାପକ ପ୍ରସାର ଏବଂ ପ୍ରମୁଖ ସରକାରୀ ଯୋଜନାଗୁଡ଼ିକର ସଂତୃପ୍ତି-ଭିତ୍ତିକ କାର୍ଯ୍ୟାନ୍ବୟନକୁ ଦୃଷ୍ଟିରେ ରଖି, ବର୍ତ୍ତମାନ ଏହି ବ୍ୟବସ୍ଥାକୁ ଆହୁରି ମଜଭୁତ ଏବଂ ଆଧୁନିକୀକରଣ କରିବାର ଆବଶ୍ୟକତା ରହିଛି। ଉଲ୍ଲେଖନୀୟ ଯେ ସଂସଦର ଶୀତକାଳୀନ ଅଧିବେଶନ ଡିସେମ୍ବର ୧ରୁ ଆରମ୍ଭ ହୋଇ ଡିସେମ୍ବର ୧୯ରେ ଶେଷ ହେବ।

Powered by Froala Editor