ଭୁବନେଶ୍ୱର: ସାତ ତାରିଖ ସନ୍ଧ୍ୟା ୬.୩୦ରେ ଷ୍ଟାରସନ ବାବୁସାନଙ୍କର ପୁଅଟିଏ ହେଇଛି । ଏକୋଇଶା ପୂଜା ପରେ ପୁଅର ନାମ କ’ଣ ରହିବ ଜଣାପଡିବ । ଯଦିଓ ଓଡିଆ ପରମ୍ପରା ଅନୁସାରେ ଏହା ହେବ, କିନ୍ତୁ ତାଙ୍କ ପୁଅର ନାମକରଣ ଗୁରୁଜୀ ଚନ୍ଦ୍ରଭାନୁ ଶତପଥୀ କରିବେ ବୋଲି ବାବୁସାନ କହିଛନ୍ତି । ୨୦୧୪ରେ ବାବୁସାନ ଓ ତୃପ୍ତି ଶତପଥୀଙ୍କ ଶୁଭ ପରିଣୟ ହୋଇଥିଲା । ସହିଦନଗରରେ ଥିବା ଆର୍ଯ୍ୟସମାଜ ମନ୍ଦିର ପରିସରରେ ବିବାହ ଏବଂ ପରଦିନ ହୋଟେଲ ମେ-ଫେୟାର ପରିସରରେ ତାଙ୍କ ପରିବାର ପକ୍ଷରୁ ଏକ ପାରିବାରିକ ଭୋଜି ଆୟୋଜିତ ହୋଇଥିଲା । ପ୍ରାୟ ସମୟ ସିନେମା ସୁଟିଂରେ ବ୍ୟସ୍ତ ରହୁଥିବା ବାବୁସାନ ବ୍ୟକ୍ତିଗତ ଜୀବନ ପ୍ରତି ଏତେଟା ଧ୍ୟାନ ଦେଇପାରୁନଥିଲେ । କୋଭିଡ-୧୯ ସଂକ୍ରମଣ ଏବଂ ଏଥିନିମନ୍ତେ ସାରା ଦେଶରେ ଜାରି ହୋଇଥିବା ବିଭିନ୍ନ ପ୍ରକାର କଟକଣା ଭିତରେ ସିନେମା ନିର୍ମାଣ ପୂରାପୂରି ଠପ ହୋଇଯାଇଥିଲା । ଏତିକିବେଳେ ସେ ଘରେ ରହି ଅର୍ଗାନିକ ଫାର୍ମିଙ୍ଗ କରୁଥିଲେ । ବାବୁସାନ କହିଛନ୍ତି, ଲକଡାଉନ ମୋତେ ବଡ ଶିକ୍ଷା ଦେଲା । ପ୍ରଫେସନାଲ କାମଠାରୁ ପର୍ସନାଲ ଲାଇଫର ଗୁରୁତ୍ୱ କେତେ ତାହା ମୁଁ ବୁଝିଲି । ଅପ୍ରିୟ ସତ କହିବାକୁ ଲକଡାଉନ ମୋତେ ବାପା ବନେଇଦେଲା । ମୁଁ ଏବେ ଆଉ ଟିନ ଏଜ ହିରୋ ନୁହେଁ ବରଂ ବୁଢ଼ା ହେଇଗଲି । ଓଡିଆ ଚଳଚ୍ଚିତ୍ରର ରୋମାଣ୍ଟାିକ ଯୋଡି ଉତ୍ତମ-ଅପରାଜିତାଙ୍କ ପୁଅ ବାବୁସାନ । ‘ ରୋମିଓ ଦ ଲଭର ବୟ’ ଚଳଚ୍ଚିତ୍ରରୁ ସେ ଅଭିନୟ କ୍ୟାରିୟର ଆରମ୍ଭ କରିଥିଲେ । ପରେ ସଞ୍ଜୁ ଆଉ ସଞ୍ଜନା, ପ୍ରେମ ଅଢେ଼ଇ ଅକ୍ଷର, ଲୋଫର, ୧୪୩-ଆଇ ଲଭ ୟୁ, ଚକୋଲେଟ, ଇଡିଅଟ, ଲଭମାଷ୍ଟର, ଆଖିରେ ଆଖିରେ, ଭଲପାଏ ତତେ ଶହେରୁ ଶହେ, ଜବରଦସ୍ତ ପ୍ରେମିକ, ଲଭ ଷ୍ଟେସନ, ସୁଇଟ ହାର୍ଟ, ଓନଲି ପ୍ୟାର, ଲୋକାଲ ଟୋକା ଲଭ ଚୋଖା, ଅଜବ ସଞ୍ଜୁର ଗଜବ ଲଭ, ଗୋଲମାଲ ଲଭ, ମିଷ୍ଟର ମଜନୁ ଭଳି ରୋମାଣ୍ଟିକ ସିନେମାରେ ସେ ହ୍ୟାଣ୍ଡସମ ହିରୋ ସାଜିଛନ୍ତି । ଏହା ଭିତରେ ଦୋସ୍ତି, ଥୁକୁଲ, ଲୁଚକାଳି, ଯିଏ ଯାହା କହୁ ମୋର ଢେ଼ା, ସୁପର ମିଛୁଆ, ସିଷ୍ଟର ଶ୍ରୀଦେବୀ, ସୁନ୍ଦରଗଡର ସଲମାନ ଖାନ, ଶ୍ରୀମାନ ସୁରଦାସ ପରି ଚଳଚ୍ଚିତ୍ରରେ ବାବୁସାନ ଭିନ୍ନ ଅବତାରରେ ଦେଖିବାକୁ ମିଳିଛନ୍ତି । ଲକଡାଉନ ପରେ ସୁଟିଂ ହେଇଥିବା ବାବୁସାନଙ୍କ ଅଭିନୀତ ଓଡିଆ ଚଳଚ୍ଚିତ୍ର ‘ବିଦ୍ୟାରାଣ’ ଖୁବଶୀଘ୍ର ପରଦାକୁ ଆସୁଛି । ତେବେ ରୋମାଣ୍ଟିକ ହିରୋ ବାବୁସାନ ଏବେ ବାପା ହେବା ପରେ ଦର୍ଶକ ମହଲରେ ଆହୁରି ଖୁସି ପରିଲକ୍ଷିତ ହେଇଛି । ତାଙ୍କ ପାଖକୁ ଏବେ ଶୁଭେଚ୍ଛାର ସୁଅ ଛୁଟିଛି ।