ଭୁବନେଶ୍ବର: ଯେଉଁ ରେସନ କାର୍ଡ ହିତାଧିକାରୀ ଇ-କେୱାଇସି କରିନାହାନ୍ତି ସେମାନଙ୍କୁ ନଭେମ୍ବରରୁ ଆଉ ମାଗଣା ଚାଉଳ ମିଳିବ ନାହିଁ। କାରଣ ଇ-କେୱାଇସି କରିବାର ଅବଧି ଅକ୍ଟୋବର ୩୧ ଥିଲା। ଏହି ସମୟ ସୀମା ମଧ୍ୟରେ ଯେଉଁ ହିତାଧିକାରୀ ଇ-କେୱାଇସି କରିନାହାନ୍ତି ସେମାନଙ୍କୁ ଯୋଜନାରୁ ବାଦ୍ ଦିଆଯିବ। କେନ୍ଦ୍ର ସରକାର ଇ-କେୱାଇସି ସମୟ ବୃଦ୍ଧି କରିନାହାନ୍ତି। ସେହି ଅନୁଯାୟୀ ରାଜ୍ୟ ସରକାର ମଧ୍ୟ ଅବଧି ବୃଦ୍ଧି ନ କରିବାକୁ ନିଷ୍ପତ୍ତି ନେଇଥିବା ଖାଦ୍ୟ ସୁରକ୍ଷା ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି।

ଅକ୍ଟୋବର ୨୯ ସୁଦ୍ଧା ରାଜ୍ୟର ୧୫ ଲକ୍ଷ ୫୭ ହଜାରରୁ ଊର୍ଦ୍ଧ୍ବ ରେସନ କାର୍ଡ ହିତାଧିକାରୀ ଇ-କେୱାଇସି କରିନାହାନ୍ତି। ଯେଉଁମାନେ ଇ-କେୱାଇସି କରିନାହାନ୍ତି ସେମାନେ ଯୋଜନାରୁ ବାଦ୍ ପଡ଼ିବା ଦ୍ବାରା ଆଉ ପୂର୍ବଭଳି ମାଗଣା ଚାଉଳ ପାଇବେ ନାହିଁ। ଇ-କେୱାଇସି ପାଇଁ କେନ୍ଦ୍ର ସରକାର ସମୟ ବଢାଇଲେ ରାଜ୍ୟ ସରକାର ସେହି ଅନୁସାରେ ସମୟ ବଢ଼ାଇବେ। ଯଦି କେଉଁ ଦୁଃଖୀରଙ୍କି ବାଦ୍‌ ରହିଯାଇଥିବେ  ସେମାନେ ସରକାରଙ୍କୁ ଲିଖିତ ଭାବେ ଜଣାଇଲେ ତାଙ୍କ କଥା ବିଚାର କରାଯିବ ବୋଲି କୁହାଯାଇଛି, ବହୁ ଅଯୋଗ୍ୟ ହିତାଧିକାରୀ ଧରାପଡ଼ିବା ଭୟରେ ଇ-କେୱାଇସି କରିନାହାନ୍ତି। ପୁଣି ଉପାନ୍ତ ଅଞ୍ଚଳରେ ନେଟ୍‌ୱର୍କ ସମସ୍ୟା ଯୋଗୁଁ ଅନେକ ହିତାଧିକାରୀ ଇ-କେୱାଇସି ଅପଡେଟ୍ କରିନାହାନ୍ତି। ବୟସ୍କ ଓ ଶଯ୍ୟାଶାୟୀଙ୍କ ଇ-କେୱାଇସି ଅପଡେଟ୍‌ରେ ସମସ୍ୟା ରହିଛି। ବାହାର ରାଜ୍ୟରେ କାମ କରୁଥିବା ଶ୍ରମିକଙ୍କ ପରିବାର ମଧ୍ୟ ଇ-କେୱାଇସି କରିପାରିନାହାନ୍ତି। ଇ-କେୱାଇସି ଦ୍ବାରା ୬ଲକ୍ଷ ଭୂତ ହିତାଧିକାରୀ ଯୋଜନାରୁ ବାଦ୍ ପଡ଼ିଛନ୍ତି। ସେମାନଙ୍କ ସ୍ଥାନରେ ସରକାର ନୂଆ ହିତାଧିକାରୀଙ୍କୁ ରେସନ କାର୍ଡ ବଣ୍ଟନ କରାଯାଉଛି। ଅକ୍ଟୋବର ୨୯ ସୁଦ୍ଧା ୭୩ ହଜାର ୧୦୬ଜଣ ହିତାଧିକାରୀ ଇ-କେୱାଇସି କରିଛନ୍ତି।

ଖୋର୍ଦ୍ଧା ୬୫ ହଜାର ୩୪୯, କୋରାପୁଟ ୫୩ ହଜାର ୭୪୩, ନବରଙ୍ଗପୁର ୫୪ ହଜାର ୪୫୫, ରାୟଗଡ଼ା ୩୮ ହଜାର ୬୮୪, ସୁନ୍ଦରଗଡ଼ ୪୬ ହଜାର ୫୫୧, ଜଗତସିଂହପୁର ୩୬ ହଜାର ୬୪୪, ନୟାଗଡ଼ ୩୫ ହଜାର ୧୮୧, ମାଲକାନଗିରି ୨୮ହଜାର ୮୮୫, ସମ୍ବଲପୁର ୨୬ହଜାର ୮୪, କନ୍ଧମାଳ ୨୫ ହଜାର ୪୨୫, ନୂଆପଡ଼ା ୨୬ହଜାର ୩୫୯, ସୁନ୍ଦରଗଡ଼ ୨୩ ହଜାର ୬୧୭, ଗଜପତି ୨୩ ହଜାର ୨୧୧, ଝାରସୁଗୁଡ଼ା ୧୫ ହଜାର ୮୬୭ ଏବଂ ବୌଦ୍ଧରେ ୧୪ହଜାର ୪୨୧ଜଣ ହିତାଧିକାରୀ ଇ-କେୱାଇସି କରିନାହାନ୍ତି।

Powered by Froala Editor