ବେଙ୍ଗାଲୁରୁରୁ ବାରାଣସୀ ଯାଉଥିବା ଏୟାର ଇଣ୍ଡିଆର ଏକ ବିମାନରେ ଦୁଇଜଣ ଯାତ୍ରୀ କକପିଟ୍ ଦ୍ୱାର ଖୋଲିବାକୁ ଚେଷ୍ଟା କରିବା ସମୟରେ ଆତଙ୍କ ସୃଷ୍ଟି ହୋଇଥିଲା। ଯାତ୍ରୀ କକ୍‌ପିଟ୍‌ କ୍ୟାବିନ୍‌ ଡୋର୍‌ ଖୋଲିବାକୁ ଚେଷ୍ଟା କରିଥିଲେ, ଯାହା ଫଳରେ ବିମାନ ଭିତରେ ହଙ୍ଗାମା ହୋଇଥିଲା। ଯାତ୍ରୀ  ଦୁଇଜଣ ସଠିକ୍‌ ପାସକୋଡ୍‌ ଏଣ୍ଟ୍ରି କରିଥିଲେ, କିନ୍ତୁ ପାଇଲଟ୍‌ ଅପହରଣର ଭୟରେ ଡୋର୍‌ ଖୋଲି ନ ଥିଲେ। ସେହି ବ୍ୟକ୍ତି ଅନ୍ୟ ୮ ଜଣ ଯାତ୍ରୀଙ୍କ ସହିତ ଯାତ୍ରା କରୁଥିଲେ। ସମସ୍ତ ଯାତ୍ରୀଙ୍କୁ ସିଆଇଏସ୍‌ଏଫ୍‌କୁ ହସ୍ତାନ୍ତର କରାଯାଇଥିଲା।

ପାଇଲଟ୍ ତୁରନ୍ତ ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC)କୁ ସତର୍କ କରାଇ ଦେଇଥିଲେ, ଯାହା ଫଳରେ ସୁରକ୍ଷା ସଂସ୍ଥାଗୁଡ଼ିକୁ ସତର୍କ କରାଯାଇଥିଲା। ବିମାନଟି ସୁରକ୍ଷିତ ଭାବରେ ଅବତରଣ କରିବା ପରେ, ଦୁଇ ଯାତ୍ରୀଙ୍କ ସମେତ ନଅ ଜଣଙ୍କୁ ଅଟକ ରଖାଯାଇଥିଲା।

ସୋମବାର ସକାଳେ ବେଙ୍ଗାଲୁରୁରୁ ବାରାଣସୀ ଯାଉଥିବା ଏୟାର ଇଣ୍ଡିଆ ଏକ୍ସପ୍ରେସ୍ ବିମାନ IX 1086 ରେ ଏହି ଘଟଣା ଘଟିଥିଲା। ଉଡ଼ାଣ ଆରମ୍ଭ ହେବାର କିଛି ସମୟ ପରେ, ଦୁଇଜଣ ଯାତ୍ରୀ କକପିଟ୍ ଦ୍ୱାର ଖୋଲିବାକୁ ଚେଷ୍ଟା କରିଥିଲେ।

ଏୟାର ଇଣ୍ଡିଆ କହିଛି, ଆମେ ଗଣମାଧ୍ୟମ ରିପୋର୍ଟରୁ ବାରାଣସୀ ଯାଉଥିବା ବିମାନ ବିଷୟରେ ସୂଚନା ପାଇଥିଲୁ। ଯାତ୍ରୀ ଶୌଚାଳୟ ଖୋଜିବା ସମୟରେ କକ୍‌ପିଟ୍‌ ଏଣ୍ଟ୍ରି ଡୋର୍‌ ନିକଟରେ ପ୍ରବେଶ କରିଥିଲେ। ଆମେ ଜନସାଧାରଣଙ୍କୁ ଆଶ୍ୱସ୍ତ କରିବାକୁ ଚାହୁଁଛୁ ଯେ, ବିମାନରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ଏବଂ କୌଣସି ଉଲ୍ଲଂଘନ ହୋଇନାହିଁ। ଅବତରଣ କରିବା ସମୟରେ କର୍ତ୍ତୃପକ୍ଷଙ୍କୁ ଘଟଣା ବିଷୟରେ ସୂଚନା ଦିଆଯାଇଥିଲା ଏବଂ ବର୍ତ୍ତମାନ ଏହାର ତଦନ୍ତ ଚାଲିଛି।

Powered by Froala Editor