ରାମ-ସୀତାଙ୍କ ଟାଟୁ ପାଇଁ ୧୫ ବର୍ଷ ପରେ ଘରକୁ ଫେରିଛି ପୁଅ । ଅହମଦାବାଦ୍‌ରୁ ଏଭଳି ଆଶ୍ଚର୍ଯ୍ୟକର ଘଟଣା ସାମ୍ନାକୁ ଆସିଛି । ୧୫ ବର୍ଷ ପୂର୍ବେ ଉତ୍ତରପ୍ରଦେଶର ବାନ୍ଦା ଜିଲ୍ଲାରୁ ନିଖୋଜ ଜଣେ ମୂକ ଯୁବକ ଶେଷରେ ନିଜ ପରିବାରକୁ ଭେଟିଛନ୍ତି ।

ବାନ୍ଦା ଜିଲ୍ଲାର ନାରାୟଣୀ ତାଲୁକାର ଥନୈଲ ଗାଁର ବାସିନ୍ଦା ପଙ୍କଜ ଓରଫ ରାହୁଲ ଯାଦବ ପ୍ରାୟ ୧୬ ବର୍ଷ ତଳେ ରାଗିକି ଘର ଛାଡ଼ି ଚାଲିଯାଇଥିଲେ । ସେ ଟ୍ରେନ୍‌ରେ ଅହମଦାବାଦ୍‌ର କାଲୁପୁର ରେଳ ଷ୍ଟେସନ୍‌ରେ ପହଞ୍ଚିଲେ । କିଛି ଦିନ ସେଠାରେ ଏଣେତେଣେ ବୁଲିଲେ । ରେଳବାଇ ପୁଲିସର ନଜର ତାଙ୍କ ଉପରେ ପଡ଼ିଲା । ତାଙ୍କର ମୂକ-ବ%ିର ସ୍ଥିତିକୁ ଦେଖି ପୁଲିସ ତାଙ୍କୁ ନବରଙ୍ଗପୁରା ଥାନା ନିକଟରେ ସ୍ଥିତ ମୂକ-ବ%ିର ସ୍କୁଲରେ ଭର୍ତ୍ତି କଲା ।

୭ ବର୍ଷ ହେଲା ପଙ୍କଜ ନବରଙ୍ଗପୁରା ଥାନାରେ ରହୁଥିଲେ । ତାଙ୍କର ଭୋଜନ, ପୋଷାକ ଓ ଅନ୍ୟ ଆବଶ୍ୟକ ଖର୍ଚ୍ଚ ଥାନା କର୍ମଚାରୀ ବହନ କରୁଥିଲେ । ପୁଲିସ ସମୟ ସମୟରେ ଏଭଳି ନିଖୋଜ ପିଲାଙ୍କୁ ସେମାନଙ୍କ ପରିବାର ସହ ମିଳନ ଅଭିଯାନ ମଧ୍ୟ ଚଳାଏ । ଇତିମଧ୍ୟରେ ନବରଙ୍ଗପୁରାର ମୁସ୍‌ଲିମ ସୋସାଇଟିରେ ସିକ୍ୟୁରିଟି ଗାର୍ଡ ରୂପେ କାର୍ଯ୍ୟରତ ପଙ୍କଜଙ୍କ ପିଲାଦିନ ସାଙ୍ଗ ନୀରଜ ଯାଦବଙ୍କ ନଜର ପଙ୍କଜଙ୍କ ଉପରେ ପଡ଼ିଲା । ସେ ପଙ୍କଜଙ୍କ ଡାହାଣ ହାତରେ ରାମ-ସୀତାଙ୍କ ଟାଟୁ ଦେଖି ଜାଣିଗଲେ ଯେ ସେ ହିଁ ତାଙ୍କ ପିଲାଦିନର ସାଙ୍ଗ ।

ନୀରଜ କହିଲେ, ସେ ଓ ପଙ୍କଜ ଗାଁର ଏକ ମେଳାରେ ଏହି ଟାଟୁ କରାଇଥିଲେ । ସେ ପୁଲିସକୁ ପଙ୍କଜଙ୍କ ସମ୍ପର୍କରେ ସମ୍ପୂର୍ଣ୍ଣ ବିବରଣୀ ଦେଲେ । ପୁଲିସ ଦ୍ୱନ୍ଦ୍ୱରେ ଥିଲେ ହେଁ ପଙ୍କଜଙ୍କ ପରିବାର ସହ ଯୋଗାଯୋଗ କଲେ । ଭିଡିଓ କଲ୍ ଜରିଆରେ ସବୁକିଛି ସ୍ପଷ୍ଟ ହେଲା । ପଙ୍କଜଙ୍କ ବଡ଼ ଭାଇ ନାଥୁ ଯାଦବ ନବରଙ୍ଗପୁରା ଥାନାରେ ପହଞ୍ଚିଲେ । ବଡ଼ ଭାଇଙ୍କ ସହ ପଙ୍କଜ ନିଜ ଘରକୁ ଫେରି ଯାଇଛନ୍ତି ।

Powered by Froala Editor