୮ ବର୍ଷର ଝିଅ ପାଇଲା ପୋଲିସ ଚାକିରି, ମାତ୍ର ୨୫ ମିନିଟ୍ରେ ଦେଲେ ନିଯୁକ୍ତି ପତ୍ର
ମଧ୍ୟପ୍ରଦେଶର ଉଜ୍ଜୟିନୀର ଜଣେ ଚତୁର୍ଥ ଶ୍ରେଣୀ ଛାତ୍ରୀଙ୍କୁ ପୋଲିସ ବିଭାଗରେ ଚାକିରି ମିଳିଛି। ଶୁଣିବାକୁ ଆଶ୍ଚର୍ଯ୍ୟ ଲାଗିଲେ ବି ଏହା ସତ । ପୋଲିସ ଅଧ୍ୟକ୍ଷକ ନିଜେ ଝିଅଟିକୁ ଜଏନିଂ ଲେଟର ଦେଇଛନ୍ତି । ଝିଅଟି ମାତ୍ର ୮ ବର୍ଷ ବୟସର। ଝିଅଟିର ବାପା ହୃଦଘାତରେ ମୃତ୍ୟୁବରଣ କରିଥିଲେ। ସେ ପୂର୍ବରୁ ପୋଲିସ ବିଭାଗରେ କାମ କରୁଥିଲେ। ଝିଅଟି ତାଙ୍କ ସ୍ଥାନରେ ଚାକିରି ପାଇଁ ଆବେଦନ କରିଥିଲା। ଏସପି ମାତ୍ର ୨୫ ମିନିଟ ମଧ୍ୟରେ ଝିଅର ଆବେଦନ ଗ୍ରହଣ କରିଥିଲେ। କେବଳ ଏତିକି ନୁହେଁ, ସେ ତାଙ୍କୁ ଚାକିରି ପାଇଁ ନିଯୁକ୍ତି ପତ୍ର ମଧ୍ୟ ଦେଇଥିଲେ।
ମହାକାଳ ପୋଲିସ ଷ୍ଟେଶନରେ ନିଯୁକ୍ତ ହେଡ କନେଷ୍ଟବଳ ନମ୍ବର ୯୮୮ ଦେବେନ୍ଦ୍ର ସିଂହ ରଘୁବଂଶୀଙ୍କର ମେ ୧୭ ୨୦୨୫ରେ ହୃଦଘାତ ଯୋଗୁ ହଠାତ୍ ମୃତ୍ୟୁ ହୋଇଥିଲା। ହେଡ କନଷ୍ଟେବଳଙ୍କ ମୃତ୍ୟୁପରେ, ତାଙ୍କ ପରିବାର ଏସପି ପ୍ରଦୀପ ଶର୍ମାଙ୍କୁ ଭେଟିବାକୁ ଆସିଥିଲେ। ସେମାନେ ହେଡ କନଷ୍ଟେବଳ ଦେବେନ୍ଦ୍ର ସିଂହ ରଘୁବଂଶୀଙ୍କ ୮ ବର୍ଷର ଝିଅ ଇଚ୍ଛା ରଘୁବଂଶୀଙ୍କୁ ଶିଶୁ କନଷ୍ଟେବଳ କରିବା ପାଇଁ ଆବେଦନ କରିଥିଲେ। ଉଜ୍ଜୟିନୀ ଏସପି ପ୍ରଦୀପ ଶର୍ମା ମଧ୍ୟ ମାତ୍ର ୨୫ ମିନିଟ ମଧ୍ୟରେ ଆବେଦନ ଗ୍ରହଣ କରି ଇଚ୍ଛାଙ୍କୁ ଶିଶୁ କନଷ୍ଟେବଳ କରିଥିଲେ।
କୁହାଯାଏ ଯେ, ଇଚ୍ଛା ରଘୁବଂଶୀ ହେଡ କନଷ୍ଟେବଳ ସ୍ବର୍ଗତ ଦେବେନ୍ଦ୍ର ସିଂହ ରଘୁବଂଶୀଙ୍କ ଏକମାତ୍ର ସନ୍ତାନ। ସେଥିପାଇଁ ତାଙ୍କୁ ଏହି ନିଯୁକ୍ତି ଦିଆଯାଇଛି। ଇଚ୍ଛା ବର୍ତ୍ତମାନ ସେଣ୍ଟ ମେରୀ ସ୍କୁଲରେ ପାଠପଢ଼ୁଛନ୍ତି। ପୋଲିସ କର୍ମଚାରୀଙ୍କ ଅକାଳ ମୃତ୍ୟୁ ହେଲେ, ପରିବାର ପ୍ରତିପୋଷଣ ପାଇଁ ନାବାଳକ ପିଲାମାନଙ୍କୁ ଶିଶୁ କନଷ୍ଟେବଳ କରାଯାଏ। ଏହି ପିଲାମାନେ ୧୮ ବର୍ଷ ବୟସ ପର୍ଯ୍ୟନ୍ତ ପାଠପଢ଼ା ସହିତ ବିଭାଗର ଛୋଟ ଛୋଟ କାମ କରନ୍ତି।
୧୮ ବର୍ଷ ବୟସ ହେବା ପରେ, ସେମାନଙ୍କର କାମ ସିଧାସଳଖ ଆରମ୍ଭ ହୁଏ। ଏସପି ପ୍ରଦୀପ ଶର୍ମା କହିଛନ୍ତି, ଶିଶୁ କନଷ୍ଟେବଳ ନିଯୁକ୍ତି ମାମଲାଗୁଡ଼ିକୁ ଯଥାଶୀଘ୍ର ସମାଧାନ କରିବା ମୋର ପ୍ରାଥମିକତା।
Powered by Froala Editor
