ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ କେନ୍ଦ୍ର ଯୋଗାଇ ଦେଇଥିବା ସିଆରପିଏଫର ‘ଜେଡ୍’ ସୁରକ୍ଷା ପ୍ରତ୍ୟାହାର କରି ନିଆଯାଇଛି। ଅଧିକାରୀକ ସୂତ୍ରରୁ ସୋମବାର ଏହି ସୂଚନା ଦିଆଯାଇଥିବା ବେଳେ କୁହାଯାଇଛି ଯେ ତାଙ୍କ ସୁରକ୍ଷା ଦାୟିତ୍ୱ ପୁଣି ଥରେ ଦିଲ୍ଲୀ ପୋଲିସ ଉପରେ ନ୍ୟସ୍ତ ହୋଇଛି ।

ଗତ ବୁଧବାର ଜନଶୁଣାଣି କାର୍ଯ୍ୟକ୍ରମ ସମୟରେ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ଉପରେ ଆକ୍ରମଣ ହୋଇଥିଲା। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଏହି ଆକ୍ରମଣକୁ ‘ତାଙ୍କ ହତ୍ୟାର ସୁନିୟୋଜିତ ଷଡ଼ଯନ୍ତ୍ର’ ବୋଲି କହିଥିଲା। ଏହି ଘଟଣାର ଦିନକ ପରେ କେନ୍ଦ୍ର ଗୃହମନ୍ତ୍ରାଳୟ ଭିଭିଆଇପିଙ୍କୁ ଯୋଗାଇ ଦିଆଯାଉଥିବା ସିଆରପିଏଫର ‘ଜେଡ’ ଶ୍ରେଣୀ ସୁରକ୍ଷା ପ୍ରଦାନ କରିବାକୁ ନିର୍ଦ୍ଦେଶ ଦେଇଥିଲା। ଏବେ କେନ୍ଦ୍ର ସରକାର ମୁଖ୍ୟମନ୍ତ୍ରୀ ଗୁପ୍ତାଙ୍କୁ ଦିଆଯାଇଥିବା ଜେଡ୍ ବର୍ଗର ସୁରକ୍ଷା ପ୍ରତ୍ୟାହାର କରିନେଇଛନ୍ତି। ତାଙ୍କ ସୁରକ୍ଷା ଦାୟିତ୍ୱ ପୁଣିଥରେ ଦିଲ୍ଲୀ ପୁଲିସକୁ ହସ୍ତାନ୍ତର କରାଯାଇଛି।

ମୁଖ୍ୟମନ୍ତ୍ରୀଙ୍କ ଉପରେ ଆକ୍ରମଣ ମାମଲାରେ ଦିଲ୍ଲୀ ପୋଲିସ ଏ ପର୍ଯ୍ୟନ୍ତ ୨ ଜଣଙ୍କୁ ଗିରଫ କରିଛି। ଏମାନଙ୍କ ମଧ୍ୟରେ ମୁଖ୍ୟ ଅଭିଯୁକ୍ତ ରାଜେଶ ଭାଇ ଖିମଜୀ ସକାରିୟା ମଧ୍ୟ ଅଛନ୍ତି। ସକାରିୟା ଗୁଜରାଟ ରାଜକୋଟର ବାସିନ୍ଦା ବୋଲି କୁହାଯାଉଛି। ତେବେ ସେ ମୁଖ୍ୟମନ୍ତ୍ରୀଙ୍କ ଉପରେ ଏପରି ଆକ୍ରମଣ କାହିଁକି କଲେ ସେ ନେଇ ଏ ପର୍ଯ୍ୟନ୍ତ ସ୍ପଷ୍ଟ ରୂପେ କିଛି କହି ନାହାନ୍ତି।

Powered by Froala Editor