ଲକ୍ଷ୍ନୌ: ଉତ୍ତର ପ୍ରଦେଶର ଗ୍ରେଟର ନୋଏଡାରେ ଜଣେ ବ୍ୟକ୍ତି ଅଧିକ ଯୌତୁକ ଦାବିରେ ପତ୍ନୀଙ୍କୁ ଜିଅନ୍ତା ଜାଳିଦେଇଥିବା ଜଣାପଡିଛି। ଅପରପକ୍ଷରେ ଗିରଫ ପରେ ଚମ୍ପଟ ମାରିବାକୁ ଉଦ୍ୟମ  କରୁଥିବାବେଳେ ପୁଲିସ ଗୁଳିରେ ଅଭିଯୁକ୍ତ ଆହତ ହୋଇଛି। ପୁଲିସ ଏହି ଘଟଣାରେ ମୃତ ମହିଳାଙ୍କ ଶାଶୂଙ୍କୁ ମଧ୍ୟ ଗିରଫ କରିଛି। ଏହି ଘଟଣା ସମୟରେ ଅଭିଯୁକ୍ତର ନାବାଳକ ପୁଅ ମଧ୍ୟ ଉପସ୍ଥିତ ଥିଲା। ଏହି ଘଟଣାରେ ଆଜି ସକାଳୁ ପୁଲିସ ତୃତୀୟ ଅଭିଯୁକ୍ତକୁ ଗିରଫ କରିଛି ।

ସୂଚନା ମୁତାବକ ୨୦୧୬ରେ ବିପିନ ଭଟ୍ଟି ନାମକ ଏହି ଅଭିଯୁକ୍ତ ନିକ୍କି ନାମ୍ନୀ ଯୁବତୀଙ୍କୁ ବିବାହ କରିଥିବାବେଳେ ସେମାନଙ୍କର ଏକ ପୁତ୍ର ସନ୍ତାନ ରହିଛି। କିଛି ବର୍ଷ ହେଲା ବିପିନ ଓ ତାଙ୍କ ପରିବାର ଯୌତୁକ ବାବଦରେ ୩୬ ଲକ୍ଷ ଟଙ୍କା ବାପଘରୁ ଆଣିବାକୁ ନିକ୍କିଙ୍କ ଉପରେ ଚାପ ପକାଉଥିଲେ। ବିବାହ ସମୟରେ ଦାବି ମୁତାବକ ଯୌତୁକ ଦିଆଯାଇଥିବା ସତ୍ତ୍ବେ ନିକ୍କିଙ୍କୁ ବାରମ୍ବାର ମାନସିକ ଓ ଶାରୀରିକ ନିର୍ଯାତନା ଦିଆଯାଉଥିଲା। ମୃତା ନିକ୍କ୍କିଙ୍କ ପିତା ଭିଖାରୀ ସିଂହ ପାୟଲାଙ୍କ କହିବା ଅନୁଯାୟୀ ଅତୀତରେ ବିପିନଙ୍କୁ ନଗଦ ଟଙ୍କା, ସ୍ବର୍ଣ୍ଣାଳଙ୍କାର, ନୂଆ ସ୍କର୍ପିଓ, ଏକ ବୁଲେଟ ଓ ଅନ୍ୟ ସାମଗ୍ରୀ ଦିଆଯାଇଥିଲା। ତାଙ୍କର ଅନ୍ୟ ଜଣେ ଝିଅ କାଞ୍ଚନ ମଧ୍ୟ ସେହି ପରିବାରରେ ବିପିନଙ୍କ ଭାଇଙ୍କୁ ବିବାହ କରିଛନ୍ତି। ବିପିନଙ୍କ ପରିବାର ଦୁଇ ଭଉଣୀଙ୍କୁ ଅଧିକ ଯୌତୁକ ଆଣିବାକୁ ବାଧ୍ୟ କରୁଥିଲେ।

ଗୁରୁବାର ଏହି ପ୍ରସଙ୍ଗ ନେଇ ବିପିନ ଓ ନିକ୍କିଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏଥିରେ କ୍ଷୁବ୍ଧ ହୋଇ ବିପିନ ନିକ୍କିଙ୍କ ଉପରେ ଦହନଶୀଳ ପଦାର୍ଥ ଢାଳି ନିଆଁ ଲଗାଇ ଦେଇଥିଲେ। ନିକ୍କିଙ୍କ ଶରୀରର ଅଧିକାଂଶ ଅଂଶ ପୋଡିଯାଇଥିଲା।  ଚିକିତ୍ସାଧୀନ ଅବସ୍ଥାରେ ନିକ୍କିଙ୍କର ଶନିବାର ମୃତ୍ୟୁ ଘଟିଛି। କାଞ୍ଚନଙ୍କ ଆଖି ସାମନାରେ ଏଭଳି ବୀଭତ୍ସ ଘଟଣା ଘଟିଥିବା ସେ ପୁଲିସକୁ ବୟାନ ଦେଇଛନ୍ତି।

Powered by Froala Editor