ଧର୍ମସ୍ଥଳରେ ଶବ ପୋତା ଯିବା ମାମଲା, ମାସ୍କ ମ୍ୟାନକୁ ଗିରଫ କଲା ଏସ୍ଆଇଟି
କର୍ନାଟକର ଧର୍ମଶାଳାସ୍ଥିତ ଶ୍ରୀମଞ୍ଜୁନାଥ ଶୈବପୀଠରେ ୧୯୯୮ରୁ ୨୦୧୪ ଦଶକର ମଧ୍ୟଭାଗ ପର୍ଯ୍ୟନ୍ତ ଅନେକ ସ୍ବଳ୍ପବୟସ୍କା, ଯୁବତୀ ଓ ମହିଳାଙ୍କୁ ବଳାତ୍କାର ପରେ ହତ୍ୟା କରି ପୋତି ଦିଆଯାଇଥିବା ନେଇ ଗତ ଜୁଲାଇରେ ଅଭିଯୋଗ ଆସିଥିଲା। ୭୦ରୁ ୮୦ଟି ଶବକୁ ବେଆଇନ ଭାବେ ପୋତି ଦିଆଯାଇଥିବା ଅଭିଯୋଗ କରିଥିବା ମାସ୍କ ମ୍ୟାନକୁ ଗିରଫ କରିଛି ଏସଆଇଟି। ଧର୍ମସ୍ଥଳ ମନ୍ଦିର ପ୍ରଶାସନ ଅଧୀନରେ ସଫେଇ ଭାବେ କାମ କରୁଥିବା ଉକ୍ତ ବ୍ୟକ୍ତି ଚାକିରି ଶେଷ ହେବା ପରେ ନିକଟରେ ଦାବି କରିଥିଲେ ଯେ ୭୦ରୁ ୮୦ଟି ଶବକୁ ବିଭିନ୍ନ ସ୍ଥାନରେ ଗୁପ୍ତ ଭାବେ ପୋତା ଯାଇଛି। ଏହା ଏକ ସମ୍ବେଦନଶୀଳ ମାମଲା ହୋଇଥିବାରୁ ତାଙ୍କ ପରିଚୟ ଗୁପ୍ତ ରଖାଯାଇ ତଦନ୍ତକୁ ଜୋରସୋର କରାଯାଇଥିଲା। ହେଲେ ଏସଆଇଟି ତାଙ୍କୁ ପ୍ରାୟ ୬ ଘଣ୍ଟା ଜେରା କରିବା ପରେ ଗିରଫ କରିଛି।
ତଦନ୍ତ ବେଳେ ଗଣକବରରୁ ମଣିଷ କଙ୍କାଳ ଓ ଦେହାବଶେଷ ମଧ୍ୟ ଜବତ ହୋଇଥିଲା। ହ୍ବିସିଲବ୍ଲୋୟରଙ୍କ ବୟାନ ଓ ସେ ଦାଖଲ କରିଥିବା ଦସ୍ତାବିଜରେ ତାଳମେଳ ନ ଥିବାରୁ ଶନିବାର ତାଙ୍କୁ ଗିରଫ କରାଯାଇଥିବା ଏସ୍ଆଇଟି କହିଛି।
ମାସ୍କ ମ୍ୟାନ ୧୯୯୮ରୁ ୨୦୧୪ ମଧ୍ୟରେ ଅନେକ ନାବାଳିକା ଓ ମହିଳାଙ୍କ ମୃତଦେହକୁ ପୋତା ଯାଇଥିବା ଦାବି କରିଥିଲେ। କିନ୍ତୁ ସେ ଚିହ୍ନଟ କରିଥିବା ୧୫ଟି ସ୍ଥାନ ମଧ୍ୟରୁ କେବଳ ୬ ନମ୍ବର ସ୍ଥାନରୁ ଜଣେ ପୁରୁଷଙ୍କ କଙ୍କାଳ ମିଳିଥିଲା। ଏପରିକି ସେ ମାସ୍କ ପିନ୍ଧି ଗଣମାଧ୍ୟମରେ ନିଜ ପକ୍ଷ ମଧ୍ୟ ରଖିଥିଲେ।
ପ୍ରାୟ ଦେଢ଼ମାସ ଧରି ଯେଉଁ ହ୍ବିସିଲବ୍ଲୋୟରଙ୍କ ନାମ ଗୋପନ ରଖି ମୁହଁ ଢାଙ୍କି କୋର୍ଟକୁ ନିଆଯାଉଥିଲା, ତାଙ୍କୁ ଏସ୍ଆଇଟି ହଠାତ୍ ଅଭିଯୁକ୍ତ ଦର୍ଶାଇ ଗିରଫ କରିବା ପରେ ତଦନ୍ତର ସ୍ବଚ୍ଛତାକୁ ନେଇ ସନ୍ଦେହ ଉପୁଜିଲାଣି। ଏହି ପ୍ରସଙ୍ଗରେ ସିଦ୍ଦାରାମାୟା ସରକାର ତଦନ୍ତକୁ ବାଟବଣା ଉଦ୍ୟମ କରୁଥିବା ଭାଜପା ଅଭିଯୋଗ ଆଣିଥିବାବେଳେ ବିରୋଧୀ ଦଳ କର୍ନାଟକକୁ ବଦ୍ନାମ କରିବା ପାଇଁ ଷଡ଼ଯନ୍ତ୍ର ରହିଥିବା କଂଗ୍ରେସ ସମାଲୋଚନା କରିଛି।
Powered by Froala Editor
