୧୬ ସୁଦ୍ଧା ନକଲି ଭୋଟର ପରିଚୟ ପତ୍ର ଦାଖଲ କରିବାକୁ ତେଜସ୍ବୀଙ୍କୁ ନିର୍ଦ୍ଦେଶ ଦେଲେ ନିର୍ବାଚନ କମିସନ
ନୂଆଦିଲ୍ଲୀ: ଚଳିତମାସ ୧୬ ସୁଦ୍ଧା ନକଲି ଭୋଟର ପରିଚୟ ପତ୍ର (ଏପିକ୍ କାର୍ଡ) ଦାଖଲ କରିବାକୁ ନିର୍ବାଚନ କମିସନ (ଇସି)ଙ୍କ ପକ୍ଷରୁ ଆରଜେଡି ନେତା ତଥା ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କୁ ନିର୍ଦେଶ ଦିଆଯାଇଛି। ନକଲି ଭୋଟର କାର୍ଡ ରଖିବା ଏବଂ ଏହାକୁ ବ୍ୟବହାର କରିବା ଅପରାଧ ବୋଲି ଇସିଙ୍କ ପକ୍ଷରୁ କୁହାଯାଇଛି। ଏହି ମର୍ମରେ ପାଟନା ସଦର ଏସଡିଏମ ତଥା ଇଲେକ୍ଟୋରାଲ ରେଜିଷ୍ଟ୍ରେସନ ଅଫିସରଙ୍କ ତରଫରୁ ତେଜସ୍ବୀଙ୍କୁ ପତ୍ର ପଠାଯାଇଛି। ସୂଚନାଯୋଗ୍ୟ ନିକଟରେ ଇସିଙ୍କ ତରଫରୁ ବିହାରରେ ଭୋଟର ତାଲିକା ସ୍ବତନ୍ତ୍ର ସମୀକ୍ଷା (ଏସଆଇଆର) କରାଯାଇଛି। ଏହାକୁ ସାର୍ବଜନୀନ କରାଯିବାପରେ ଅଗଷ୍ଟ ୨ରେ ତେଜସ୍ବୀ ପାଟନାରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି କହିଥିଲେ ଯେ ତାଙ୍କ ଏପିକ୍ ନମ୍ବର ଉକ୍ତ ତାଲିକାରୁ ବାଦ ପଡିଛି। ତେଜସ୍ବୀ ସେତେବେଳେ ନିଜ ମୋବାଇଲରେ ଏହି କାର୍ଡ ପ୍ରଦର୍ଶନ କରିଥିଲେ। ତେବେ ତେଜସ୍ବୀଙ୍କ ଏତାଦୃଶ ଅଭିଯୋଗକୁ ଇସି ଖଣ୍ଡନ କରିବା ସହ ସ୍ପଷ୍ଟୀକରଣ ଦେଇଥିଲେ ।
Powered by Froala Editor
