ଏନ୍‌କ୍ଲୋଜରରୁ ମୁକୁଳିପାରୁନି ମହାରାଷ୍ଟ୍ରର ତଡ଼ବା ଅନ୍ଧାରୀରୁ ଓଡ଼ିଶା ଆସିଥିବା ବାଘୁଣୀ ‘ଜୀନତ୍‌’। ନଭେମ୍ବରରେ ଆସିଥିବା ବାଘୁଣୀ ‘ଜୀନତ୍‌’ ଶିମିଳିପାଳ କୋର୍‌ ଅଞ୍ଚଳରେ ଥିବା ଏନ୍‌କ୍ଲୋଜରରେ ଛଡ଼ାଯିବା ପରେ ସେ ଖୁଆଡ଼ରୁ ବାହାରି ଦୌଡ଼ି ବୁଲିଥିଲା। ଶିମିଳିପାଳର ଜଙ୍ଗଲ ଛାଡ଼ି ପ୍ରଥମେ ଝାଡ଼ଖଣ୍ଡ ଏବଂ ପରେ ପଶ୍ଚିମବଙ୍ଗର ଜଙ୍ଗଲକୁ ପଳାଇଥିଲା।୨୦୨୪ ଡିସେମ୍ବର ଶେଷରେ ଶିମିଳିପାଳ ଫେରାଇ ଅଣାଯାଇଥିଲା। ସେବେଠାରୁ ଅଭୟାରଣ୍ୟର ଏନ୍‌କ୍ଲୋଜରରେ ବନ୍ଦୀ ଜୀବନ କାଟୁଛି ଜୀନତ୍‌। ତେବେ ଜୀନତକୁ ନେଇ ଚିନ୍ତାରେ ପଡିଛି ବନବିଭାଗ ।

ଏନ୍‌କ୍ଲୋଜର୍‌ ବାହାରକୁ ଆସିଲେ ପୁଣି ବାହାର ରାଜ୍ୟକୁ ମୁହାଁଇବ କି ଜୀନତ୍‌? ଏଭଳି ପ୍ରଶ୍ନ ବନ ବିଭାଗ ପାଇଁ ଅଡ଼ୁଆ ପରିସ୍ଥିତି ସୃଷ୍ଟି କରିଛି। ତିନି ମାସ ହେଲା ତାହାର ପରିସୀମାକୁ ଯଥେଷ୍ଟ ବୃଦ୍ଧି କରାଯାଇଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ। ଅଭୟାରଣ୍ୟକୁ ଆଜି ପର୍ଯ୍ୟନ୍ତ ସେ ଆପଣାଇ ପାରି ନ ଥିବାରୁ ବନ ବିଭାଗ ପୁଣିଥରେ ଜଙ୍ଗଲକୁ ଛାଡ଼ିବା ଦିଗରେ ପଦକ୍ଷେପ ନେଇପାରୁ ନାହିଁ। ଏତେ ସମୟ ଧରି ଗୋଟିଏ ଏନ୍‌କ୍ଲୋଜର ମଧ୍ୟରେ ରହିଥିବାରୁ ତାହାର ଶିକାର ପ୍ରବୃତ୍ତି ନଷ୍ଟ ହେବା ନେଇ ଆଶଙ୍କା ପ୍ରକାଶ ପାଇଛି। 

୬ ମାସ ହେଲାଣି ଶିମିଳିପାଳ ଅଭୟାରଣ୍ୟ ଭିତରେ ଏକ ଏନ୍‌କ୍ଲୋଜରରେ ବନ୍ଦୀ ଜୀବନ କାଟୁଛି। ପାଖାପାଖି ୯ ମାସ ହେଲା ମହାରାଷ୍ଟ୍ରରୁ ଦୁଇଟି ବାଘୁଣୀ ଅଣାଯାଇଥିଲେ ମଧ୍ୟ ସେମାନଙ୍କଠାରୁ ଆଜି ପର୍ଯ୍ୟନ୍ତ କୌଣସି ଶୁଭ ଖବର ମିଳିପାରି ନ ଥିବାରୁ ଶିମିଳିପାଳରେ ବନ ବିଭାଗ ବିଫଳ ହେବା ନେଇ ବିଶେଷଜ୍ଞମାନେ ମତପ୍ରକାଶ କରିଛନ୍ତି।

ଶିମିଳିପାଳ ବ୍ୟାଘ୍ର ପ୍ରକଳ୍ପରେ କଳାବାଘ ବଂଶ ବୃଦ୍ଧି ଉପରେ ରୋକ ଲଗାଇବାକୁ ମହାରାଷ୍ଟ୍ରରୁ ଅକ୍ଟୋବରରେ ବାଘୁଣୀ ‘ଯମୁନା’କୁ ଅଣାଯାଇ ଅଭୟାରଣ୍ୟର କୋର୍‌ ଅଞ୍ଚଳକୁ ଛଡ଼ାଯାଇଥିଲା। ‘ଯମୁନା’ ଶିମିଳିପାଳ ଛାଡ଼ି ବାଲେଶ୍ବର କୁଲଡ଼ିହା ଅଭୟାରଣ୍ୟକୁ ଚାଲିଯାଇଥିଲା। ପରବର୍ତ୍ତୀ ସମୟରେ କେନ୍ଦୁଝରର ହଦଗଡ଼ରେ ଦେଖିବାକୁ ମିଳିଥିଲା। ‌ତେବେ ଜୀନତ ଆଜି ପର୍ଯ୍ୟନ୍ତ ଶିମିଳିପାଳରେ ଭରଷି ନଥିବାରୁ ଚିନ୍ତାରେ ପଡ଼ିଛି ବନବିଭାଗ ।

Powered by Froala Editor