ଉତ୍ତର ପ୍ରଦେଶର ମିରଟରେ ଏକ ଚାଞ୍ଚଲ୍ୟକର ହତ୍ୟା ମାମଲା ସାମ୍ନାକୁ ଆସିଛି। ପ୍ରେମିକ ସହ ମିଶି ନିଜ ପତିଙ୍କୁ ହତ୍ୟା କରି ଗିରଫ ହୋଇଛନ୍ତି ମହିଳା । ତେବେ ଯୁବକଙ୍କ ମୃତ୍ୟୁକୁ ଭିନ୍ନ ଢଙ୍ଗରେ ଦର୍ଶାଇବା ପାଇଁ ଚେଷ୍ଟା କରି ବିଫଳ ହୋଇଛନ୍ତି ମହିଳା ଓ ତାଙ୍କ ପ୍ରେମିକ ।

ହତ୍ୟାକୁ ଦୁର୍ଘଟଣା ଭାବେ ଦେଖାଇବା ପାଇଁ ଅଭିଯୁକ୍ତ ଦମ୍ପତି ଏକ ବିଷାକ୍ତ ସାପ ବ୍ୟବହାର କରି ସ୍ୱାମୀଙ୍କ ମୃତଦେହ ଉପରେ ରଖିଥିଲେ, ଯାହା ଦ୍ୱାରା ଏହା ସାପ କାମୁଡ଼ା ଯୋଗୁଁ ମୃତ୍ୟୁ ଭଳି ଦେଖାଯିବ।

ଘଟଣାଟି କିଛି ଏମିତି । ରବିତା ନାମକ ଜଣେ ମହିଳା ତାଙ୍କ ପ୍ରେମିକ ଅମରଦୀପ ସହ ମିଶି ନିଜ ସ୍ୱାମୀ ରାମବୀରଙ୍କୁ ତଣ୍ଟି ଚିପି ହତ୍ୟା କରିଥିଲେ । ଏହା ପରେ ତାଙ୍କ ମୃତଦେହ ପାଖରେ ଏକ ସାପ ଛାଡିଦେଇଥିଲେ । ସାପଟି ତାଙ୍କୁ କାମୁଡିଥିଲା । ସକାଳକୁ ପରିବାର ଲୋକେ ପୁଅର ମୃତଦେହ ଦେଖିବା ପରେ ସାପ କାମୁଡା ଚିହ୍ନ ଦେଖିଥିଲେ । ସମସ୍ତେ ସାପ କାମୁଡାରେ ତାଙ୍କର ମୃତ୍ୟୁ ହୋଇଛି ବୋଲି ସନ୍ଦେହ କରିଥିଲେ । ତେବେ ପୋଷ୍ଟମର୍ଟମ ରିପୋର୍ଟ ଆସିବା ପରେ ମୃତ୍ୟୁ ଅନେକ ସମୟ ପୂର୍ବରୁ ହୋଇଥିବାବେଳେ ଶ୍ବାସରୁଦ୍ଧ ହୋଇ ମୃତ୍ୟୁ ହୋଇଥିବା ଜଣାପଡିଥିଲା । ଏହା ପରେ ପୋଲିସ ରବିତା ଓ ଅମରଦୀପଙ୍କୁ ଜେରା କରିଥିଲା, ଯେଉଁଥିରେ ସେମାନେ ନିଜର ଅପରାଧ ସ୍ୱୀକାର କରିଥିଲେ। ମିରଟ ପୋଲିସ ଏହି ମାମଲାରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ରବିତା ଓ ଅମରଦୀପଙ୍କୁ ଗିରଫ କରିଛି।

Powered by Froala Editor