ଭାରତୀୟ ଗ୍ରାଣ୍ଡମାଷ୍ଟର ଆର୍. ପ୍ରଜ୍ଞାନନନ୍ଦ ସେଣ୍ଟ୍ ଲୁଇସ୍‌ରେ ଗ୍ରାଣ୍ଡ ଚେସ୍ ଟୁର୍ ଟାଇଟଲ୍ ନିଜ ନାମରେ କରିଛନ୍ତି। ଏହି ଟ୍ରଫି ଜିତିବାରେ ସେ ପ୍ରଥମ ଭାରତୀୟ ଚେସ୍ ଖେଳାଳି ହୋଇଛନ୍ତି। ଫାଇନାଲ୍ ମୁକାବିଲାର ଶେଷ ଦିନରେ ବର୍ତ୍ତମାନର ଚାମ୍ପିୟନ୍ ଫାବିଆନୋ କାରୁଆନାଙ୍କଠାରୁ ୬ ପଏଣ୍ଟ ପଛରେ ଥିଲେ ମଧ୍ୟ ପ୍ରଜ୍ଞାନନନ୍ଦ ଚମତ୍କାର ପ୍ରତ୍ୟାବର୍ତ୍ତନ କରି ଟାଇଟଲ୍ ଜିତିବାରେ ସଫଳ ହୋଇଛନ୍ତି। ଗ୍ରାଣ୍ଡ ଚେସ୍ ଟୁର୍ ଟାଇଟଲ୍ ଜିତିବା ପରେ ତାଙ୍କୁ ବିଜେତା ଭାବେ ୨ ଲକ୍ଷ ଡଲାର, ଅର୍ଥାତ୍ ପ୍ରାୟ ୧ କୋଟି ୯୧ ଲକ୍ଷ ଟଙ୍କା ପୁରସ୍କାର ମିଳିଛି।

ଏହା ସହିତ ସେ ୨୦୨୭ ଗ୍ରାଣ୍ଡ ଚେସ୍ ଟୁର୍ ପାଇଁ ସିଧାସଳଖ ଯୋଗ୍ୟତା ମଧ୍ୟ ହାସଲ କରିଛନ୍ତି। ଏହା ବ୍ୟତୀତ ୨୦୨୬ର ସମ୍ପୂର୍ଣ୍ଣ ସର୍କିଟ୍‌ରେ ପ୍ରଜ୍ଞାନନ୍ଦ ମୋଟ ୪,୦୪,୩୫୪ ଡଲାର, ଅର୍ଥାତ୍ ପ୍ରାୟ ୪ କୋଟି ଟଙ୍କା ପ୍ରାଇଜ୍ ମନି ଜିତିଛନ୍ତି।

କ୍ଲାସିକାଲ୍ ମ୍ୟାଚ୍ ପରେ ପ୍ରଜ୍ଞାନନନ୍ଦ ୩-୯ ସ୍କୋରରେ ପଛରେ ଥିଲେ। ଏହାପରେ ଟାଇଟଲ୍ ଜିତିବାର ତାଙ୍କ ଆଶା ପ୍ରାୟ ଶେଷ ହୋଇଯାଇଥିଲା। କିନ୍ତୁ ପ୍ରଜ୍ଞାନନ୍ଦ ହାର ମାନିନଥିଲେ । ସେ ଲଗାତାର ଦୁଇଟି ରାପିଡ୍ ଗେମ୍ ଜିତି ସ୍କୋରକୁ ୧୧-୯ କରିଦେଇଥିଲେ। ଏହାପରେ କାରୁଆନା ବ୍ଲିଟ୍ଜର ଦ୍ୱିତୀୟ ମୁକାବିଲା ଜିତି ସ୍କୋରକୁ ୧୨-୧୨ରେ ସମାନ କରିଥିଲେ। କିନ୍ତୁ ପ୍ରଜ୍ଞାନନ୍ଦ ତୃତୀୟ ବ୍ଲିଟ୍ଜ ମ୍ୟାଚ୍ ଜିତି ପୁଣିଥରେ ଆଗୁଆ ହୋଇଥିଲେ। ଶେଷ ମୁକାବିଲାରେ ପ୍ରଜ୍ଞାନନ୍ଦଙ୍କୁ କେବଳ ଡ୍ର’ର ଆବଶ୍ୟକତା ଥିଲା। ସେ ଥ୍ରୀ-ଫୋଲ୍ଡ ରିପିଟିସନ୍ ମାଧ୍ୟମରେ ଡ୍ର’ ହାସଲ କରି ଟାଇଟଲ୍ ନିଜ ନାମରେ ପକ୍କା କରିଥିଲେ।

ଫାଇନାଲ୍‌ର ୬ଟି ମୁକାବିଲାରେ ପ୍ରଜ୍ଞାନନ୍ଦ ୩ଟିରେ ବିଜୟ, ୨ଟି ଡ୍ର’ ଏବଂ ମାତ୍ର ଗୋଟିଏ ମ୍ୟାଚ୍‌ରେ ପରାଜୟ ବରଣ କରିଥିଲେ। 

Powered by Froala Editor