ସ୍ୱାସ୍ଥ୍ୟ ସମସ୍ୟା ପାଇଁ ୧୦ ଦିନ ମୋବାଇଲ୍ ବନ୍ଦ କରୁଛି: ତାରା
ଭୁବନେଶ୍ୱର: ବାରମ୍ବାର ଫୋନ୍ ଆସୁଛି । ଡିଷ୍ଟର୍ବ ହେଉଛି । ଏଥିପାଇଁ ୧୦ ଦିନ ଫୋନ୍ ବନ୍ଦ କରୁଛି । ମୋତେ କେହି ଭୁଲ୍ ବୁଝିବେନି । ଶାରୀରିକ ଅସୁସ୍ଥତା ପାଇଁ ଏପରି କରିବାକୁ ବାଧ୍ୟ ହେଉଛି । ଫେସ୍ବୁକ୍ରେ ଏକ ଭାବବ୍ୟୁହଳ ଭିଡିଓ ଅପଲୋଡ୍ କରି ଜୟପୁର ନିର୍ବାଚନମଣ୍ଡଳୀର ଜନସାଧାରଣଙ୍କୁ ଏଭଳି ନିବେଦନ କରିଛନ୍ତି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ।
ଭିଡିଓ ବାର୍ତ୍ତାରେ ତାରା କହିଛନ୍ତି, କରୋନାରୁ ମୁଁ ସୁସ୍ଥ ହୋଇଛି । କିନ୍ତୁ ସମ୍ପୂର୍ଣ୍ଣ ଆରୋଗ୍ୟ ହୋଇନାହିଁ । ୧୦ ଦିନ ବିଶ୍ରାମ ନେବାକୁ ଡାକ୍ତର ପରାମର୍ଶ ଦେଇଛନ୍ତି । ଦରକାର ପଡ଼ିଲେ ହାଇଦ୍ରାବାଦ ଯିବା ପାଇଁ ମନସ୍ଥ କରୁଛି । ତେଣୁ ଦୟାକରି ମୋତେ କେହି ଭୁଲ୍ ବୁଝିବେ ନାହିଁ ।
ସୂଚନାଯୋଗ୍ୟ, କିଛି ଦିନ ତଳେ ଜୟପୁର ବିଧାୟକ କରୋନାରେ ଆକ୍ରାନ୍ତ ହୋଇଥିଲେ । ତାଙ୍କୁ ଭୁବନେଶ୍ୱରର ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିଛିଦିନ ଚିକିତ୍ସା ହେବା ପରେ ଏବେ ସେ କରୋନାମୁକ୍ତ ହୋଇଛନ୍ତି । ହେଲେ ସମ୍ପୂର୍ଣ୍ଣ ଭାବେ ସୁସ୍ଥ ହୋଇନାହାନ୍ତି । ଡାକ୍ତର ତାଙ୍କୁ ବିଶ୍ରାମ ନେବାକୁ ପରାମର୍ଶ ଦେଇଛନ୍ତି । ଏଥିପାଇଁ ସେ ମୋବାଇଲ୍ ଫୋନ୍ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି ।
Powered by Froala Editor
