ରବିବାର ନନ୍ଦନକାନନ ପ୍ରାଣୀ ଉଦ୍ୟାନରେ ଖସିଖବର ଆସିଥିଲା । ସିମ୍ପାଞ୍ଜି ରାକ୍ଷୀ ପୁଣି ଥରେ ମା’ ହେଲା ବୋଲି ଖୁସିର ମାହୋଲ ଦେଖାଦେଇଥିଲା । ହେଲେ ଦିନକପରେ ନନ୍ଦନକାନନରେ ଏକ ଦୁଃଖଦ ଖବର ସମସ୍ତଙ୍କ ନିରାଶ କରିଛି । ୬୦(କ) ଖୁଆଡ଼ରେ ସପରିବାର ରହୁଥିବା ସିମ୍ପାଞ୍ଜି ‘ଜୁଲୁ’ ସୋମବାର ସକାଳେ ଆଖି ବୁଜିଛି । ୩୬ବର୍ଷ ବୟସ୍କ ଏହି ସିମ୍ପାଞ୍ଜିର ମୃତ୍ୟୁରେ ଶୋକର ଛାୟା ଖେଳିଯାଇଛି ।

ସୂଚନା ଯୋଗ୍ୟ, ୧୯୯୪ ମସିହା ମେ ୧୬ ତାରିଖରେ ସିଙ୍ଗାପୁର ଚିଡ଼ିଆଖାନାକୁ ଘଡ଼ିଆଳ କୁମ୍ଭୀର ଓ ଭାଲୁ ବିନିମୟରେ ଜୁଲୁ ଏବଂ ମାଈ ପାମ୍ପେଟା ସିମ୍ପାଞ୍ଜି ଅଣାଯାଇଥିଲା । ୧୨ ଅକ୍ଟୋବର ୧୯୮୮ ମସିହାରେ  ସିଙ୍ଗାପୁର ପ୍ରାଣୀ ଉଦ୍ୟାନରେ ‘ଜୁଲୁ’ ଜନ୍ମ ଗ୍ରହଣ କରିଥିଲା । ସେଠାରୁ ନନ୍ଦନକାନନକୁ ଆସିବା ପରେ ତିନି ଦଶନ୍ଧୀ ଧରି ପର୍ଯ୍ୟଟକଙ୍କ ମନୋରଞ୍ଜନର କେନ୍ଦ୍ରବିନ୍ଦୁ ଥିଲା । ଅନ୍ୟ ମାଈ ସିମ୍ପାଞ୍ଜି ସହ ‘ଜୁଲୁ’ମିଳନରୁ ୧୨ଟି ସନ୍ତାନ ଜନ୍ମ ନେଇଥିଲେ । ସେଥି ମଧ୍ୟରୁ ୪ ସନ୍ତାନର ମୃତ୍ୟୁ ହୋଇଛି ।

ଗତ ଅଗଷ୍ଟ ମାସରେ ବୟସାଧିକ କାରଣରୁ ‘ଜୁଲୁ’ ହଠାତ୍ ଅସୁସ୍ଥ ହୋଇପଡ଼ିଥିଲା ।  ପ୍ରାଣୀ ଚିକିତ୍ସକ ତା’ର ଚିକିତ୍ସା କରିଥିଲେ । ତେବେ ସେ ସମ୍ପୂର୍ଣ୍ଣ ସୁସ୍ଥ ହୋଇନଥିଲା । ସୋମବାର ସକାଳେ ‘ଜୁଲୁ’ଆଖି ବୁଜିଛି । ଜୁଲୁ ମୃତ୍ୟୁ ପରେ ପ୍ରାଣୀ ଉଦ୍ୟାନରେ ସିମ୍ପାଞ୍ଜି ସଂଖ୍ୟା ୭କୁ ଖସି ଆସିଛି ।

Powered by Froala Editor