କୁନି ଝିଅକୁ ଝୁଣି ମାରିଦେଲେ କୁକୁର
କୋରାପୁଟ ଜିଲା ବୋରିଗୁମ୍ମା ଥାନା ଅଧୀନ ପୁପୁଗାଁରେ ଏକ ୬ବର୍ଷର ଶିଶୁକନ୍ୟାକୁ ବୁଲା କୁକୁର ଝୁଣି ମାରିଦେଇଛନ୍ତି । ଜୟପୁର ବ୍ଲକ ପୁପୁଗାଁର କୃଷ୍ଣ ବେନିୟାଙ୍କ ୬ବର୍ଷର ନାତୁଣୀ ଚାନ୍ଦିନୀ ଗାଇ ଚରାଉଥିବା ମାମୁଁଙ୍କ ପାଖକୁ ଯାଉଥିଲା। ଅଜା, ଆଇ କିଛି କାମରେ ବ୍ୟସ୍ତ ରହିଥିଲେ। ୫ଟି ବୁଲା କୁକୁର ପଲ ଚାନ୍ଦିନୀ ନିକଟକୁ ଆସିଥିଲେ। ଅଚାନକ ଭାବେ ଗୋଟିଏ ବୁଲା କୁକୁର ଚାନ୍ଦିନୀକୁ କାମୁଡିବା ସହ ଆକ୍ରମଣ କରିଥିଲା। ଏହା ପରେ ପଲରେ ଥିବା ଅନ୍ୟ କୁକୁରମାନେ ମଧ୍ୟ ଚାନ୍ଦିନୀକୁ କାମୁଡି ଦେଇଥିଲେ।
ଏହା ଦେଖି ମାମୁଁ ଚିତ୍କାର କରିଥିଲେ। ସଙ୍ଗେସଙ୍ଗେ କେତେଜଣ ଲୋକ ଦୌଡ଼ି ଆସି କୁକୁରମାନଙ୍କୁ ଘଉଡ଼ାଇଥିଲେ। କିନ୍ତୁ ସେତେବେଳକୁ କୁକୁରମାନେ ଚାନ୍ଦିନୀଙ୍କୁ କାମୁଡି ରକ୍ତାକ୍ତ କରିଦେଇଥିଲେ। ଲୋକମାନେ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ନିକଟସ୍ଥ କୁମୁଲିପୁଟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ଚାନ୍ଦିନୀଙ୍କୁ ମୃତ ଘୋଷଣା କରିଥିଲେ।
ପ୍ରକାଶ ଯେ, ଚାନ୍ଦିନୀ ତାଙ୍କ ଅଜା, ଆଈଙ୍କ ଘରେ ପୁପୁଗାଁରେ ରହି ପଢ଼ୁଥିଲେ। ଏହି ଘଟଣାକୁ ପରିବାରବର୍ଗ ସହଜରେ ଗ୍ରହଣ କରି ପାରୁନାହାନ୍ତି। ପରିବାରବର୍ଗ କାନ୍ଦ ବୋବାଲିରେ ଗାଁ ଫାଟି ପଡିଛି। ଗାଁରେ ଶୋକର ଛାୟା ଖେଳିଯାଇଛି।
Powered by Froala Editor
