ଏବେ ସମଗ୍ର ଦେଶରେ ମତ ପାର୍ଥକ୍ୟ ଅପରାଧ ଭାବେ ବିବେଚନା ହେବାରେ ଲାଗିଛି। ଏଭଳି ବୟାନ ଦେଇଛନ୍ତି ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ମୁଖ୍ୟ ମେହବୁବା ମୁଫତି। କିଛି ଦିନ ତଳେ ମୁଫତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡାକିଥିବା ସର୍ବଦଳୀୟ ବୈଠକରେ ଯୋଗ ଦେଇଥିଲେ। ଏବେ ସେ ଏପରି ବୟାନ ଦେଇଛନ୍ତି। ଏଥିସହ ଜମ୍ମୁ-କଶ୍ମୀରରେ ଧାରା ୩୭୦ ଓ ୩୫ ଏ ଲାଗୁ ନ ହେବା ଯାଏ ସେ ନିର୍ବାଚନ ଲଢ଼ିବେ ନାହିଁ ବୋଲି ମଧ୍ୟ କହିଛନ୍ତି। ସରକାର ଯଦି ନିର୍ବାଚନ କରିବାକୁ ଚାହୁଁଛନ୍ତି ତେବେ ପ୍ରଥମେ ଲୋକମାନଙ୍କ ବିଶ୍ବାସଭାଜନ ହେବାକୁ ପଡ଼ିବ । ବିଶ୍ବାସଭାଜନ ପାଇଁ ରାଜ୍ୟମାନ୍ୟତା ଓ ଧାରା ୩୭୦ ଲାଗୁ ହେବା ଜରୁରୀ ବୋଲି ସେ କହିଛନ୍ତି ।

ଗୋଟିଏ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ମୁଫତି କହିଛନ୍ତି, ଆମେ ନେତାମାନେ ଜମ୍ମୁ-କଶ୍ମୀରରେ ଅପରାଧୀ ଭାବେ ରହିଥିଲୁ। ଏହି କାରଣ ପାଇଁ ଆମକୁ ବନ୍ଦୀ କରାଯାଇଥିଲା। କିନ୍ତୁ ଏବେ ଏହା କେବଳ ମେହବୁବା ମୁଫତି କିମ୍ବା ଜମ୍ମୁ-କଶ୍ମୀରରେ ସୀମିତ ହୋଇନାହିଁ। ସେମାନେ ସମଗ୍ର ଦେଶର ଯୁବ ଶିକ୍ଷାର୍ଥୀଙ୍କୁ ଜେଲରେ ଭର୍ତ୍ତି କରିବାରେ ଲାଗିଛନ୍ତି। 

ଏପରି ସ୍ଥିତିରେ ସାଧାରଣ ଲୋକଙ୍କ ଅବସ୍ଥା କ’ଣ ହେଉଥିବ ଥରେ ଚିନ୍ତା କରନ୍ତୁ। ଗୋଟିଏ ଟ୍ୱିଟ ପାଇଁ ଜଣେ ୧୫ ବର୍ଷୀୟ ପିଲାକୁ ଜେଲରେ ଭର୍ତ୍ତି କରିଦିଆଯାଇଛି। ଭୟରେ ଲୋକମାନେ ନିଜ ଘରର ଚାରିକାନ୍ଥ ମଧ୍ୟରେ ରହୁଛନ୍ତି। ସେମାନେ ମୁହଁ ଖୋଲିବାକୁ ଡରୁଛନ୍ତି। ଜମ୍ମୁ-କଶ୍ମୀର ଏବେ ମୁକ୍ତାକାଶ ଜେଲରେ ପରିଣତ ହୋଇ ଯାଇଛି ବୋଲି ସେ କହିଛନ୍ତି।

ପାକିସ୍ତାନ ସହ ଭାରତ ସରକାର ଆଲୋଚନା କରିବାକୁ ମଧ୍ୟ ସେ ପ୍ରସ୍ତାବ ଦେଇଛନ୍ତି। ସେ କହିଛନ୍ତି, “ଜମ୍ମୁ-କଶ୍ମୀରବାସୀ ପାକିସ୍ତାନ ସହ ତିକ୍ତତା ଯୋଗୁ ଅସୁବିଧାର ସମ୍ମୁଖୀନ ହେଉଛନ୍ତି। ଏହି କାରଣରୁ ସେମାନେ ପାକିସ୍ତାନ ସହ ଭାରତ ସରକାର କଥା ହୁଅନ୍ତୁ ବୋଲି ଚାହୁଁଛନ୍ତି।

ଅନ୍ୟପକ୍ଷରେ, କେନ୍ଦ୍ର ସରକାର ଆଗ ବିଧାନସଭା ନିର୍ବାଚନ ଓ ତା ପରେ ରାଜ୍ୟ ମାନ୍ୟତା ପାଇଁ ପ୍ରସ୍ତାବ ଦେଇଥିବାବେଳେ ଘାଟିର ନେତାମାନେ ଆଗ ରାଜ୍ୟ ମାନ୍ୟତା, ଧାରା ୩୭୦ ଲାଗୁ ଓ ତାପରେ ନିର୍ବାଚନ ପାଇଁ ଦାବି କରୁଛନ୍ତି ।

ନ୍ୟାସନାଲ କନଫରେନ୍ସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଓମର ଅବଦୁଲ୍ଲା କହିଛନ୍ତି ଯେ, ଯଦି କେନ୍ଦ୍ର ସରକାର ନିର୍ବାଚନ ଆୟୋଜନ କରିବାକୁ ଚାହୁଁଛନ୍ତି, ତେବେ ଆଗ ରାଜ୍ୟ ମାନ୍ୟତା ଦିଅନ୍ତୁ । ସେ କହିଛନ୍ତି ଯେ ରାଜ୍ୟ ମାନ୍ୟତା ଓ ଧାରା ୩୭୦ ଲାଗୁ ପାଇଁ ଯେତେ ଦିନ ଲାଗୁ ପଛେ ମେଣ୍ଟ ପଛକୁ ହଟିବ ନାହିଁ ।

Powered by Froala Editor