ସଂରକ୍ଷଣକୁ ନେଇ ବାଂଲାଦେଶରେ ଅଣାୟତ୍ତ ପରିସ୍ଥିତି ସୃଷ୍ଟି ହୋଇଛି । ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପରେ ଶେଖ ହସୀନାଙ୍କୁ ବାଂଲାଦେଶ ଛାଡ଼ିବାକୁ ପଡ଼ିଛି । ବର୍ତ୍ତମାନ ସମୟରେ ହସୀନା ଭାରତରେ ଅଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାସଭବନରେ ପାଖାପାଖି ଦେଢ଼ ଘଣ୍ଟା ଧରି ଏକ ଉଚ୍ଚସ୍ତରୀୟ ବୈଠକ ବସିଥିଲା । ବିଦେଶ ମନ୍ତ୍ରୀ ଓ ଏନଏସଏ ପ୍ରଧାନମନ୍ତ୍ରୀଙ୍କୁ ବାଂଲାଦେଶର ସ୍ଥିତି ବାବଦରେ ଅବଗତ କରାଇଥିଲେ ।

ଅନ୍ୟପକ୍ଷରେ ବାଂଲାଦେଶରେ ଉପଦ୍ରବକାରୀଙ୍କ ହଙ୍ଗାମା ମାନବିକତାର ସୀମା ଲଙ୍ଘିଛି ।  କିଛି ଆନ୍ଦୋଳନକାରୀ ପ୍ରଧାନମନ୍ତ୍ରୀଙ୍କ ବାସଭବନରେ ପଶି ଯାହା ପାରିଥିଲେ ଲୁଟି ନେଇ ଯାଇଥିଲେ। ଏହି ଲୁଟର ଅନେକ ଭିଡିଓ ଏବେ ସୋସିଆଲ ମିଡିଆରେ ଘୁରି ବୁଲୁଛି।  ଯେଉଁଥିରେ ଆନ୍ଦୋଳନକାରୀଙ୍କୁ ପ୍ରଧାନମନ୍ତ୍ରୀଙ୍କ ବାସଭବନରୁ ଶେଖ୍‌ ହସିନାଙ୍କ ଶାଢ଼ି ସମେତ ତାଙ୍କ ଘରେ ସଜା ଯାଇଥିବା ବିଭିନ୍ନ ସାମଗ୍ରୀ, ବ୍ୟାଗ, ଆଟାଜି ଓ ଟୋଲିଫୋନ ଆଦିକୁ ଧରି ନିଜ ଘର ଅଭିମୁଖେ ଦୌଡ଼ିଥିଲେ। ଲୁଟରେ ସାମିଲ ଥିବା ପ୍ରତିଟି ଆନ୍ଦୋଳନକାରୀଙ୍କ ହାତରେ କିଛି ନା କିଛି ସାମଗ୍ରୀ ଥିବା ଭାଇରାଲ ଭିଡିଓରେ ଦେଖିବାକୁ ମିଳୁଛି।

ଭିଡିଓ ଯେ ଦେଖିଲେ ଯେ କେହି ବି ଆଶ୍ଚର୍ଯ୍ୟ ହୋଇଯିବ । ଉପଦ୍ରବକାରୀମାନେ ହସୀନାଙ୍କ ବାସଭବନରେ ପଶି ଚେୟାର, ଟେବୁଲ, ଶାଢ଼ୀ, ବ୍ଲାଉଜ, ମହଙ୍ଗା ପଙ୍ଖା, ବୃକ୍ଷ, ଟିଭି, ବେଡଶିଟ, ଟ୍ରଲି ବ୍ୟାଗ ଆଦି ଗଣ୍ଠିଲି କରି ଲୁଟି ନେଉଥିବା ଦେଖାଯାଉଛି । କିଏ ଛେଳି ଲୁଟି ନେଉଛି ତ ଆଉ କିଏ ପଲଙ୍କ ଉପରେ ଶୋଇ ମଜା ନେଉଛି । ସେହିପରି କିଏ ଜିମ୍ ମେଶିନ ଲୁଟି ନେଲାଣି ତ ଆଉ କିଏ ବଡ଼ ଗର୍ବର ସହ ସେଲଫି ନେଉଥିବାର ଦେଖାଯାଉଛି । ସୋସିଆଲ ମିଡ଼ିଆରେ ଭାଇରାଲ ହେଉଥିବା ଏହି ଫଟୋ ଆଉ ଭିଡିଓକୁ ଦେଖିଲେ ଯେତିକି ଆଶ୍ଚର୍ଯ୍ୟ ଲାଗୁଛି ସେତିକି ଲଜ୍ଜା ମଧ୍ୟ ଅନୁଭବ ହେଉଛି ।

ପ୍ରଧାନମନ୍ତ୍ରୀ ଦେଶ ଛାଡ଼ିବା ପରେ ଦେଶର ଶାସନ ଭାର ସେନାବାହିନୀ ନିଜ ହାତକୁ ନେଇଛି। ଖୁବ୍‌ଶୀଘ୍ର ଅନ୍ତରୀଣ ସରକାର ଗଠନ ହେବ ବୋଲି ସେନାବାହିନୀ ଘୋଷଣା କରିଛି। 

Powered by Froala Editor