ଜଣେ ବ୍ୟକ୍ତି କେବଳ ୨୮୦୦ ଟଙ୍କାରେ ଖାଦ୍ୟ ଖାଇ ୧୬୦୦୦ ଡଲାର (୧୨ ଲକ୍ଷ ଟଙ୍କା) ଟିପ୍ସ ଦେଇଛନ୍ତି। ଘଟଣାଟି ନ୍ୟୁ ହାମ୍ପସିର୍‌ରେ ଥିବା ଏକ ରେଷ୍ଟୁରାଣ୍ଟର । ହୋଟେଲ ମାଲିକ ମାଇକେଲ୍‌ ଜାରେଲା ନାଁ ନକହି ଏତେ ଟଙ୍କା ଟିପ୍ସ ଦେଇଥିବା ଗ୍ରାହକଙ୍କୁ ଧନ୍ୟବାଦ ଜଣାଇଛନ୍ତି। ଏନେଇ ସୋମବାର ନିଜ ଫେସବୁକ୍‌ରେ ସେ ପୋଷ୍ଟ କରିଛନ୍ତି । 

କରୋନା ମହାମାରୀ ପାଇଁ ବିଶ୍ବର ଅର୍ଥନୀତି ପ୍ରଭାବିତ ହୋଇଥିବା ବେଳେ କ୍ଷତି ସହିଛି ହୋଟେଲ ଶିଳ୍ପ। କରୋନା କଟକଣା ପାଇଁ ହୋଟେଲରେ ଗରାଖ କମୁଛନ୍ତି। କିନ୍ତୁ ଏହି ସମୟରେ ନ୍ୟୁ ହାମ୍ପସିର୍‌ରେ ଥିବା ଏକ ରେଷ୍ଟୁରାଣ୍ଟରେ ଜଣେ ଗ୍ରାହକ ଦେଇଥିବା ଟିପ୍ସକୁ ନେଇ ଚର୍ଚ୍ଚା ଜୋର ଧରିଛି। ହୋଟେଲ ମାଲିକ କହିଛନ୍ତି, ଜଣେ ଭଦ୍ରବ୍ୟକ୍ତି ରେଷ୍ଟୁରାଣ୍ଟକୁ ଆସିଥିଲେ। ଗୋଟିଏ ବିୟର ଏବଂ ଦୁଇଟି ଚିଲି ଚିଜ୍‌ ଡଙ୍ଗସ୍‌ ଅର୍ଡର କରିଥିଲେ। ପରେ ସେ ଆଚାର ଚିପ୍ସ ଏବଂ ଗୋଟିଏ ଟକିଲା ଅର୍ଡର କରିଥିଲେ। ସାଢ଼େ ୩ଟାରେ ସେ ଚେକ୍‌ ମାଗିଥିଲେ। ସେ ଏହାକୁ ଦେଇ ଚାଲିଯାଇଥିଲେ। ଏହା ସହ ସେ ଓ୍ବେଟରକୁ କହିଥିଲେ ଗୋଟିଏ ସ୍ଥାନରେ ଏ ଟଙ୍କା ସବୁ ଖର୍ଚ୍ଚ କରିବନି। ପ୍ରଥମେ ଏହାକୁ ଗୁରୁତର ସହ ନେଇନଥିଲେ ରେଷ୍ଟୁରାଣ୍ଟ କର୍ମଚାରୀ। ପରେ ବ୍ୟକ୍ତିଜଣଙ୍କ ୧୬ ହଜାର ଡଲାର ଟିପ୍‌ ଦେଇଥିବା ଜଣାପଡ଼ିଥିଲା ବୋଲି ମାଇକେଲ୍‌ କହିଛନ୍ତି । 

Powered by Froala Editor