ଗଜପତି ଜିଲ୍ଲା ମୋହନା ଥାନା କଳାମେରୀ ଗାଁରେ ଅଭାବନୀୟ ଘଟଣା ଘଟିଛି । ଜ୍ୱାଇଁର ଟାଙ୍ଗିଆ ଚୋଟରେ ଶାଶୂ ଗୁରୁତର ହୋଇ ଜୀବନମରଣ ସହ ସଂଘର୍ଷ କରୁଛି । ଗୁରୁତର ହେଲେ ଅନଳା ବଣସିଂ । ଗୁରୁତର ଅନଳାଙ୍କୁ ପ୍ରଥମେ ମୋହନା ଡାକ୍ତରଖାନା ଓ ପରେ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି । ମୋହନା ଥାନା ପୁଲିସ ଘଟଣାର ତଦନ୍ତ ଆରମ୍ଭ କରିଛି ।

ପୁଲିସ ସୂଚନା ଅନୁଯାୟୀ, କଳାମେରୀ ଗାଁର ଅନଳାଙ୍କ ଝିଅ ସ୍ୱପ୍ନାଙ୍କୁ ସେହି ଗାଁର ମନମୋହନ ବିଷୋୟୀ ପ୍ରେମ କରୁଥିଲେ । ଧୀରେ ଧୀରେ ପ୍ରେମ ସମ୍ପର୍କ ବିବାହ ବନ୍ଧନରେ ବାନ୍ଧି ହୋଇଥିଲା । ୫ ବର୍ଷ ତଳେ ସ୍ୱପ୍ନାଙ୍କ ହାତ ଧରିଥିଲେ ମନମୋହନ । ସେମାନଙ୍କ ୪ ବର୍ଷର ଗୋଟିଏ ଝିଅ ଅଛି ।

କିନ୍ତୁ ପ୍ରେମ ବେଶୀ ଦିନ ତିଷ୍ଠିଲାନି । ସ୍ୱାମୀ-ସ୍ତ୍ରୀ ସବୁବେଳେ ଝଗଡ଼ା ହେଉଥିଲେ । ଝଗଡା ବଢିବାରୁ ଅନଳା ଝିଅ ସ୍ୱପ୍ନାଙ୍କୁ ଆଣି ପାଖରେ ରଖିଥିଲେ । ରବିବାର କୌଣସି କାରଣରୁ ମନମୋହନ ଶାଶୂ ଘରକୁ ଯାଇ ଝଗଡ଼ା କରିଥିଲା । ଅନଳା ତାଙ୍କୁ ବୁଝାଇବାକୁ ଚେଷ୍ଟା କଲାବେଳେ ମନମୋହନ ଏକ ଟାଙ୍ଗିଆରେ ଶାଶୂଙ୍କୁ ଆକ୍ରମଣ କରିଥିଲା । ଆକ୍ରମଣରେ ଅନଳାଙ୍କ ମୁଣ୍ଡ, ଶରୀରର ଟାଙ୍ଗିଆ ଚୋଟ ବାଜିବାରୁ ତାଙ୍କ ଅବସ୍ଥା ଗୁରୁତର ରହିଛି । ତେବେ ମନମୋହନଙ୍କ ବିରୋଧରେ ଏଯାଏ ଥାନାରେ କୌଣସି ରିପୋର୍ଟ ହୋଇନାହିଁ । ପୁଲିସ ନିଜଆଡୁ ମାମଲା ରୁଜୁ କରି ତଦନ୍ତ କରୁଛି । ଅନଳାଙ୍କ ସ୍ୱାସ୍ଥ୍ୟବସ୍ଥାରେ ସୁଧାର ଆସିବା ପରେ ତାଙ୍କ ବୟାନ ରେକର୍ଡ କରାଯିବ ।

Powered by Froala Editor