ଟ୍ରାଫିକ ପୁଲିସକୁ ୫୦ ମିଟର ଘୋଷାଡ଼ି ନେଲା ମଦ୍ୟପ ଡ୍ରାଇଭର
![ଟ୍ରାଫିକ ପୁଲିସକୁ ୫୦ ମିଟର ଘୋଷାଡ଼ି ନେଲା ମଦ୍ୟପ ଡ୍ରାଇଭର](https://odishanewslens.com/news_gallery/30815_1719124589.jpg)
ଫରିଦାବାଦ: ହରିୟାଣାର ଫରିଦାବାଦରେ ଜଣେ ଟ୍ରାଫିକ ପୁଲିସ କର୍ମଚାରୀଙ୍କୁ ମଦ୍ୟପ ଡ୍ରାଇଭର ନିଜ ଗାଡ଼ିରେ ପାଖାପାଖି ୫୦ ମିଟର ଘୋଷାଡ଼ି ନେଇଥିବା ଜଣାପଡ଼ିଛି। ସେହି ସମୟର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି। ଫରିଦାବାଦର ବଲ୍ଲଭଗଡ଼ ବସ୍ଷ୍ଟାଣ୍ଡ ନିକଟରେ ଜଣେ ଡ୍ରାଇଭର ନିଜ ଗାଡ଼ି ଛିଡ଼ା କରି ଯାତାୟାତରେ ବାଧା ସୃଷ୍ଟି କରୁଥିବାରୁ ଟ୍ରାଫିକ ପୁଲିସର ଜଣେ ସବ୍ଇନ୍ସପେକ୍ଟର ସେଠାକୁ ଯାଇଥିଲେ। ସେ ଡ୍ରାଇଭର ପଟ କବାଟ ପାଖରେ ଛିଡ଼ା ହୋଇ ଗାଡ଼ିର କାଗଜପତ୍ର ଓ ଡ୍ରାଇଭିଂ ଲାଇସେନ୍ସ ମାଗିଥିଲେ। ଏହାକୁ ନେଇ ଉତ୍କ୍ଷିପ୍ତ ଡ୍ରାଇଭର ଜଣକ ହଠାତ୍ ଗାଡ଼ି ଚଳାଇବା ଆରମ୍ଭ କରି ଦେଇଥିଲେ। ଟ୍ରାଫିକ୍ ସବ୍ଇନ୍ସପେକ୍ଟର ଜଣକ ଫସି ରହିଥିବା ବେଳେ ଗାଡିଟି ପ୍ରାୟ ୫୦ ମିଟର ପର୍ଯ୍ୟନ୍ତ ଯାଇଥିଲା। ପାଖାପାଖି ୫୦ ମିଟର ଯିବା ପରେ ଗାଡ଼ିଟି ଅଟକି ଥିଲା। ତେବେ ସଂପୃକ୍ତ ଟ୍ରାଫିକ୍ ସବ୍ଇନ୍ସପେକ୍ଟର ମଦ୍ୟପ ଡ୍ରାଇଭରକୁ କାବୁ କରିବାରେ ସକ୍ଷମ ହୋଇଥିଲେ। ମଦ୍ୟପ ଡ୍ରାଇଭରଙ୍କୁ ଥାନାକୁ ନିଆଯାଇଥିବା ବେଳେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜନୈକ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
Powered by Froala Editor