କେରଳରେ ଓ୍ବେଷ୍ଟ ନାଇଲ୍‌ ଜ୍ୱର ଆତଙ୍କ ଖେଳାଇଛି। କେରଳର କୋଝିକୋଡ ଓ ମଲପ୍ପୁରମ ଜିଲ୍ଲାରେ ୱେଷ୍ଟ ନାଇଲ ଭାଇରସ (ଡବ୍ଲ୍ୟୁଏନଭି) ସଂକ୍ରମଣର ଅତିକମରେ ୧୦ଟି ମାମଲା ସାମ୍ନାକୁ ଆସିଛି । ଉତ୍ତର କେରଳର ଦୁଇଟି ଜିଲ୍ଲାରେ ୫-୫ଟି ଲେଖାଏଁ ମାମଲା ସାମ୍ନାକୁ ଆସିଛି । ୧୦ ଜଣ ସଂକ୍ରମିତଙ୍କ ମଧ୍ୟରୁ ୯ ଜଣ ଠିକ୍ ହୋଇଯାଇଥିବା ଅଫିସିଆଲ ଭାବେ କୁହାଯାଇଛି । କୋଝିକୋଡରେ ଜଣେ ରୋଗୀ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । ତେବେ ଏହି ଜ୍ୱରରେ ଦୁଇଜଣଙ୍କ ମୃତ୍ୟୁ ହୋଇଥିବା ନେଇ ଆଶଙ୍କା କରାଯାଉଥିଲେ ହେଁ ସେନେଇ ଅଫିସିଆଲ ଭାବେ କିଛି ବୟାନ ଜାରି କରାଯାଇନାହିଁ ।

ଖବର ଜଣାପଡ଼ିବା ପରେ କେରଳ ସ୍ବାସ୍ଥ୍ୟ କର୍ତ୍ତୃପକ୍ଷ ହାଇଆଲର୍ଟ ଜାରି କରିଛନ୍ତି। ସଂକ୍ରମଣକୁ କାବୁ କରିବା ଲାଗି ରାଜ୍ୟ ସ୍ବାସ୍ଥ୍ୟମନ୍ତ୍ରୀ ବୀଣା ଜର୍ଜ ମଶା ନିୟନ୍ତ୍ରଣ ଏବଂ ସେମାନଙ୍କ ବଂଶବୃଦ୍ଧି ରୋକିବା ଉପରେ ଗୁରୁତ୍ୱ ଦେଇଛନ୍ତି। ମୌସୁମୀ ପୂର୍ବରୁ ସଂକ୍ରମଣ ବଢ଼ୁଥିବାରୁ ରାଜ୍ୟରେ କେତେକ ପ୍ରତିକାର ବ୍ୟବସ୍ଥା ଗ୍ରହଣ କରାଯାଇଛି। ଏଥିସହିତ ଲୋକଙ୍କ ମଧ୍ୟରେ ଉକ୍ତ ରୋଗକୁ ନେଇ ସଚେତନତା ସୃଷ୍ଟି କରାଯାଉଛି।

ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) ଅନୁସାରେ, ଡବ୍ଲ୍ୟୁଏନଭି ସଂକ୍ରମିତ ମଶା କାମୁଡ଼ିଲେ ମଣିଷଙ୍କ ଠାରେ ତାହା ବ୍ୟାପିଥାଏ । ଯେତେବେଳେ ମଶା ସଂକ୍ରମିତ ପକ୍ଷୀଙ୍କୁ ଖାଇଥାଏ, ସେତେବେଳେ ସେମାନେ ମଧ୍ୟ ସଂକମ୍ରିତ ହୋଇଯାଇଥାନ୍ତି । ଫଳରେ ଏହି ଭାଇରସ ମଣିଷ ଓ ଅନ୍ୟ ପଶୁଙ୍କୁ ମଧ୍ୟ ବ୍ୟାପିଥାଏ । ମଣିଷ ଠାରୁ ମଣିଷକୁ ବ୍ୟାପିବା ନେଇ ବର୍ତ୍ତମାନ ସୁଦ୍ଧା କିଛି ସ୍ପଷ୍ଟ ହୋଇନାହିଁ ।

Powered by Froala Editor