ମଦ ପିଇ ଭୁଲିଗଲେ ହିତାହିତ ଜ୍ଞାନ, ବିଚ୍ ରାସ୍ତାରେ ଏସ୍ପିଙ୍କୁ ପିଟିଲେ ୩ କନଷ୍ଟେବଲ
ଭୋପାଲ: ୩ କନଷ୍ଟେବଲ ପ୍ରଚୁର ମଦ ପିଇ ନିଜର ହିତାହିତ ଜ୍ଞାନ ଭୁଲି ଗଲେ । ଏପରିକି ସେମାନେ ଏସପିଙ୍କୁ ମଧ୍ୟ ଚିହ୍ନି ନପାରି ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହିତ ବିଚ୍ ରାସ୍ତାରେ ପିଟିଲେ । ଘଟଣା ଘଟିଛି ମଧ୍ୟପ୍ରଦେଶ ଭୋପାଲର ଡେପୋଟ ଛକରେ । ଏହି ଘଟଣାରେ ୩ କନଷ୍ଟେବଲଙ୍କୁ ନିଲମ୍ବନ କରାଯାଇଛି । ସେମାନେ ହେଲେ ୨୫ତମ ବାଟାଲିୟମରେ କନଷ୍ଟେବଲ ଭାବେ କାମ କରୁଥିବା ବିନୋନ୍ଦ ପାରଶର, ନେହରୁ ନଗର ପୁଲିସ୍ ଲାଇନରେ କାମ କରୁଥିବା ଅନୀଲ ଜାଠ ଓ ଟ୍ରାଫିକ ବିଭାଗରେ କାର୍ଯ୍ୟ କରୁଥିବା କନଷ୍ଟେବଲ ଅଭଦେଶ ଜାଠ ରହିଥିଲେ ।
ସୂଚନା ଅନୁସାରେ, ଏସ୍ପି ବିଏମ ଶକୟା ପରିବାର ସହିତ ଘରକୁ ଫେରୁଥିଲେ । ଏହି ସମୟରେ ସେ ପୁଲିସ୍ ୟୁନିଫର୍ମ ପିନ୍ଧି ନଥିଲେ । କିନ୍ତୁ ତାଙ୍କ ସରକାରୀ ଗାଡ଼ି ଚଲାଉଥିଲେ । ଡେପୋଟ ଛକରେ ରାସ୍ତା ଉପରେ କିଛି ପଥର ପଡ଼ିଥିଲା । ଏହା ଦେଖିବା ପରେ ଏସ୍ପି ଗାଡ଼ି ଅଟକାଇ ଥିଲେ । ରାସ୍ତା ଉପରୁ ପଥର ଉଠାଇବା ବେଳେ ଏକ କାରରେ ୩ ଜଣ ଯାକ କନଷ୍ଟେବଲ୍ ପହଞ୍ଚି ଥିଲେ । କିଛି ବିଝୁବା ପୂର୍ବରୁ ସେମାନେ ଶକୟାଙ୍କୁ ଗାଲିଗୁଲଜ କରିଥିଲେ । ଶକୟା ଏହାର ପ୍ରତିବାଦ କରିବାରୁ ସେମାନେ ମାରପିଟ୍ କରିଥିଲେ । ଧମକ ଚମକ ମଧ୍ୟ ଦେଇଥିଲେ । ସେମାନେ ପ୍ରଚୁର ମଦ ପିଇ ଥିବାରୁ ଏସ୍ପି ତୁରନ୍ତ ୧୦୦ ନମ୍ବରକୁ ଯୋଗାଯୋଗ କରିଥିଲେ । ଫୋନ୍ କଲ୍ ପାଇଁ ତୁରନ୍ତ ଅଧିକ ଫୋର୍ସ ଘଟଣାସ୍ଥଳରେ ପହଞ୍ଚି ଥିଲେ । ହେଲେ ସେତେବେଳକୁ ଅଭିଯୁକ୍ତମାନେ ଘଟଣାସ୍ଥଳରୁ ପଳାଇ ଥିଲେ । ଏସ୍ପି ଶକୟା ସେମାନଙ୍କ କାର୍ ନମ୍ବର ନୋଟ୍ କରି ଦେଇଥିଲେ । ଗାଡ଼ି ନମ୍ବର ଆଧାରରେ ସେମାନଙ୍କୁ ଚିହ୍ନଟ କରାଯିବା ସହ ତୁରନ୍ତ ୩ ଜଣ କନଷ୍ଟେବଲଙ୍କୁ ନିଲମ୍ବନ କରାଯାଇଛି ।
Powered by Froala Editor
