ଭବ୍ୟ ରାମ ମନ୍ଦିର ପ୍ରତିଷ୍ଠା ପାଇଁ ସବୁଠି ଉତ୍ସବର ମାହୋଲ । ଓଡ଼ିଶାରେ ମଧ୍ୟ ରାମ ନାମ ଧ୍ୱନି ଗୁଞ୍ଜରିତ ହେଉଛି । ତେବେ ରାମଙ୍କ ଉପସ୍ଥିତି ଜାହିର କରୁଥିବା କିଛି ତୀର୍ଥ ସ୍ଥାନ ଅଛି ଯାହା କିମ୍ବଦନ୍ତୀପୂର୍ଣ୍ଣ । କେନ୍ଦୁଝର ଜିଲ୍ଲା ଚମ୍ପୁଆ ବ୍ଲକ୍ ରାମତୀର୍ଥ ଓ ଗଜପତି ଜିଲ୍ଲା ଗୋଷାଣି ବ୍ଲକ୍‌ର ସୀତା ପାହାଡ ସେଥିରୁ ଅନ୍ୟତମ । ଏପରି ଅନେକ ସ୍ଥାନ ଅଛି ଯାହା ରାମ, ଲକ୍ଷ୍ମଣ ଓ ମାତା ସୀତାଙ୍କ ଉପସ୍ଥିତି ବିଷୟରେ ଜଣାଏ । ହେଲେ ଉପରୋକ୍ତ ଦୁଇଟି ସ୍ଥାନର ମାହାତ୍ମ୍ୟ କିଛି ନିଆରା । 

ଚମ୍ପୁଆ ସୀମାନ୍ତ ବୈତରଣୀ ନଦୀ କୂଳରେ ଅବସ୍ଥିତ ରାମତୀର୍ଥ ।  ମାନ୍ୟତା ଅନୁସାରେ ପ୍ରଭୁ ଶ୍ରୀ ରାମ ଭାଇ ଲକ୍ଷ୍ମଣ ଓ ପତ୍ନୀ ସୀତା ଙ୍କ ସହ ଚଉଦ ବର୍ଷ ବନବାସ କାଳରେ ଏହି ସ୍ଥାନକୁ ଆସିଥିଲେ। ରାମତୀର୍ଥ ଠାରେ ବୈତରଣୀ ଉତ୍ତର କୁ ପ୍ରବାହିତ ହୋଇଥିବା ବେଳେ ହିନ୍ଦୁ ମାନ୍ୟତା ଅନୁସାରେ ସେହି ସ୍ଥାନକୁ ପବିତ୍ର ମନେ କରାଯାଏ। ପବିତ୍ର ବୈତରଣୀ  ନଦୀ ତଟରେ ପିତା ଦଶରଥଙ୍କୁ ପିଣ୍ଡ ଦାନ କରିଥିଲେ। ଏଥି ସହିତ ଭଗବାନ ଶ୍ରୀ ରାମ ଏଠାରେ ଶିବ ଲିଙ୍ଗ ସ୍ଥାପନା କରି ପୂଜା କରିଥିଲେ ଓ ସେଠାରେ ପ୍ରସ୍ତର ଉପରେ ଛାଡି ଯାଇଥିଲେ ନିଜର ପଦଚିହ୍ନ । ଆଜି ବି ସେଠାରେ ପ୍ରଭୁ ଶ୍ରୀ ରାମ ଙ୍କର ପଦଚିହ୍ନ କୁ ଦର୍ଶନ ପାଇଁ ଶ୍ରଦ୍ଧାଳୁ ମାନେ ଧାଇଁ ଆସନ୍ତି। ସେଠାରେ ଅସ୍ଥି ବିସର୍ଜନ କଲେ ପିତୃ ପୁରୁଷ ମୁକ୍ତି ପାଆନ୍ତି ବୋଲି ମାନ୍ୟତା ରହିଛି। 

ବର୍ତ୍ତମାନ ସମୟରେ ସେଠାରେ ଗୋଟିଏ ବେଢ଼ାରେ ରାମେଶ୍ବର ଶିବ ମନ୍ଦିର, ସୀତାରାମ ମନ୍ଦିର, ଜଗନ୍ନାଥ ମନ୍ଦିର ଓ ହନୁମାନ ମନ୍ଦିର ଅବସ୍ଥିତ। ପ୍ରତିବର୍ଷ ରାମତୀର୍ଥ ରେ ମକର ସଂକ୍ରାନ୍ତି ଅବସର ରେ ଏଠାରେ ମେଳା ଅନୁଷ୍ଠିତ ହୁଏ।

ସେହିପରି ଗଜପତି ଗୋଷାଣୀ ବ୍ଲକରେ ରହିଛି ସୀତା ପାହାଡ । ସେହି ପାହାଡ ଉପରେ ପୂଜା ପାଉଛନ୍ତି ପ୍ରଭୁ ରାମଚନ୍ଦ୍ର ଓ ମାତା ସୀତା । ଅନ୍ୟ ଦିନ ଅପେକ୍ଷା ମକର ସଂକ୍ରାନ୍ତିରେ ସ୍ୱତନ୍ତ୍ର ଭାବେ ପୂଜାର୍ଚ୍ଚନା କରାଯାଇଥାଏ । ମାଆ ସୀତାଙ୍କ ଆସ୍ଥାନ ନେଇ ଏଠାରେ ରହିଛି ପୁରୁଣା କିମ୍ବଦନ୍ତୀ । ପ୍ରଭୁ ରାମଚନ୍ଦ୍ର ଓ ଲକ୍ଷ୍ମଣଙ୍କ ସହ ମାତା ସୀତା ଅଯୋଧ୍ୟା ଫେରିବା ସମୟରେ ଏହି ସ୍ଥାନରେ ବିଶ୍ରାମ ନେଇଥିଲେ । ସେହି ସମୟରେ ଗାଁର ଲୋକଙ୍କୁ ଏକାଠି କରି ସେମାନଙ୍କ ସହ କିଛି ସମୟ ବିତାଇଥିଲେ । ତାପରଠାରୁ ଏହି ଜାଗା ସୀତା ମ।ତାଙ୍କ ନାଁରେ କରାଯାଇଥିଲା ।

Powered by Froala Editor