ଭୁବନେଶ୍ୱର: ଆଗକୁ ଆସୁଛି ସାଧାରଣ ନିର୍ବାଚନ। ରାଜଧାନୀରେ ଯେପରି ଶାନ୍ତି ଶୃଙ୍ଖଳାରେ ନିର୍ବାଚନ ଶେଷ ହେବ ତାହା ଉପରେ ପୁଲିସ ଗୁରୁତ୍ୱ ଦେଉଛି। ଆଇନ ଶୃଙ୍ଖଳା ଯେମିତି ଭଙ୍ଗ ନହୁଏ, ସେଥିପ୍ରତି ପୁଲିସ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଛି। ତେଣୁ ନିବାଚନ ପୂର୍ବରୁ ରାଜଧାନୀରେ ଥିବା ସବୁ ହାର୍ଡକୋର ଅପରାଧୀଙ୍କୁ ଗିରଫ କରାଯିବ। କାରଣ ଅନେକ ରାଜନେତା ଆସନ୍ତା ସାଧାରଣ ନିର୍ବାଚନରେ ଏହି ଅପରାଧୀଙ୍କୁ ବ୍ୟବହାର କରିବାର ଅଧିକ ସମ୍ଭାବନା ରହିଛି। କିଛି ନେତା ଏମାନଙ୍କୁ ଭୋଟ ହାତେଇବା ପାଇଁ ବ୍ୟବହାର କରିବା ସହ ବୋମା ମାଡ଼, ଗୁଳିମାଡ଼ ଆଦି କାର୍ୟ୍ୟରେ ନିୟୋଜିତ କରିପାରନ୍ତି। ତେଣୁ ପୁଲିସ ରାଜଧାନୀରେ ଥିବା ହାର୍ଡକୋର ଅପରାଧୀଙ୍କୁ ଗିରଫ କରିବାକୁ ନିର୍ଦ୍ଦେଶ ଦିଆଯାଇଛି। ତେଣୁ ଡିସିପି ପ୍ରତୀକ ସିଂ ରାଜଧାନୀ ଭୁବନେଶ୍ୱରରେ ଥିବା ସମସ୍ତ ଥାନା ଅଧିକାରୀଙ୍କୁ ୧୫ ଦିନ ପୂର୍ବରୁ ଅପରାଧୀଙ୍କ ତାଲିକା ଦେବାକୁ କହିଥିଲେ। ସମସ୍ତ ଥାନାର ଅଧିକାରୀ ନିଜ ନିଜ ଅଞ୍ଚଳରେ ଥିବା ହାର୍ଡକୋର ଅପରାଧୀଙ୍କ ତାଲିକା କରି ଡିସିପିଙ୍କୁ ଦେଇଛନ୍ତି। ତେଣୁ ତାଲିକା ଆଧାରରେ ନିର୍ବାଚନ ପୂର୍ବରୁ ପୁଲିସ ସେମାନଙ୍କୁ ଗିରଫ କରି ଝାରପଡ଼ା ଜେଲ୍‌‌ର ଚାରି କାନ୍ଥ ଦେଖାଇବ। ଏଥର ତାଲିକାରେ ଯେଉଁମାନଙ୍କ ନାମରେ ୧୩ରୁ ଊର୍ଦ୍ଧ୍ବ ମାମଲା ରହିଛି, ସେମାନଙ୍କୁ ସାମିଲ୍‌‌ କରାଯାଇଛି। ତେଣୁ ପୁଲିସ ଏବେଠୁ ସହରରୁ ଅପରାଧୀ କ୍ଲିନ୍‌‌ କରିବା ପାଇଁ ଯୋଜନା କରିଛି। ମିଳିଥିବା ତଥ୍ୟ ଅନୁସାରେ ରାଜଧାନୀରେ ୨୨୦ରୁ ଊର୍ଦ୍ଧ୍ବ ପେସାଦାର ଅପରାଧୀ ଅଛନ୍ତି। ସେମାନଙ୍କ ମଧ୍ୟରୁ ୮୦ଜଣ ଜେଲ୍‌‌ ଭିତରେ ଥିବାବେଳେ ୧୪୦ଜଣ ବାହାରେ ଥିବା ଜଣାପଡ଼ିଛି।

Powered by Froala Editor