ରାଜନଗର: ଗତବର୍ଷ ଅପେକ୍ଷା ଚଳିତବର୍ଷ କୁମ୍ଭୀରଙ୍କ ସଂଖ୍ୟା ବୃଦ୍ଧି ପାଇଛି। ୨୦୨୩ ଗଣନା ବେଳେ କୁମ୍ଭୀରଙ୍କ ସଂଖ୍ୟା ୧୭୯୩ ଥିବାବେଳେ ଚଳିତବର୍ଷ ଏହା ୧୮୧୧କୁ ଛୁଇଁଛି। ଏଥିମଧ୍ୟରେ କନିକା ବନଖଣ୍ଡରେ ସର୍ବାଧିକ ୧୪୨୨ଟି କୁମ୍ଭୀର ଥିବା ଚିହ୍ନଟ ହୋଇଛନ୍ତି ବୋଲି ରାଜ୍ୟ ପ୍ରମୁଖ ମୁଖ୍ୟ ବନ୍ୟପ୍ରାଣୀ ସଂରକ୍ଷକ (ପିସିସିଏଫ୍‌) ଡ. ସୁଶାନ୍ତ କୁମାର ନନ୍ଦ ସୂଚନା ଦେଇଛନ୍ତି।

ଡ. ନନ୍ଦଙ୍କ ସୂଚନା ଅନୁଯାୟୀ, ଚଳିତବର୍ଷ ୧୦ତାରିଖରୁ କୁମ୍ଭୀର ଗଣନା ଆରମ୍ଭ ହୋଇଥିଲା। ୧୨ତାରିଖ ପର୍ଯ୍ୟନ୍ତ କୁମ୍ଭୀର ଗଣନାରେ ୨୨ଟି ଗଣନାକାରୀ ଦଳ ସାମିଲ ହୋଇଥିଲେ। ଭିତରକନିକା ଜାତୀୟ ପାର୍କ ଏବଂ ଅନ୍ୟାନ୍ୟ ନଦୀ ଅବବାହିକାରେ କୁମ୍ଭୀରଙ୍କ ଗଣନା ବେଳେ ଜଣାଯାଇଛି ଯେ, ଏଥର କୁମ୍ଭୀରଙ୍କ ସଂଖ୍ୟା ୧୮ଟି ବଢ଼ି ୧୮୧୧ରେ ପହଞ୍ଚିଛି। ସେଥି ମଧ୍ୟରେ ୬ରୁ ୮ଫୁଟିଆ ବଡ଼କୁମ୍ଭୀରଙ୍କଠାରୁ ଆରମ୍ଭ କରି ୩ରୁ ୬ଫୁଟିଆ ମଧ୍ୟମ ଧରଣର ଓ ୨ରୁ ୩ଫୁଟିଆ ଛୋଟ କୁମ୍ଭୀର ରହିଛନ୍ତି। ୫୮୨ଟି ସଦ୍ୟ ବାହାରିଥିବା କୁମ୍ଭୀର (ହାଚଲିଂ) ଚିହ୍ନଟ ହୋଇଥିବାବେଳେ ୩୮୭ଟି ବର୍ଷିକିଆ, ୩୨୭ଟି କିଶୋର ଅବସ୍ଥାରେ ଥିବା (ଜୁଭେନାଇଲ୍ସ) କୁମ୍ଭୀର, ୧୬୭ଟି ଅଧାପ୍ରୌଢ଼ ଏବଂ ୩୪୮ଟି ପ୍ରୌଢ଼ ଜାତୀୟ କୁମ୍ଭୀର ରହିଛନ୍ତି। ସର୍ବାଧିକ ୧୪୨୨ଟି କୁମ୍ଭୀର କେବଳ ଭିତରକନିକାର କନିକା ବନାଞ୍ଚଳ ନଦୀ ଅବବାହିକାରେ ରହିଛନ୍ତି। ମହାନଦୀ ଅବବାହିକାର ମହାକାଳପଡ଼ାଠାରେ ୮୩ଟି କୁମ୍ଭୀର ଚିହ୍ନଟ ହୋଇଥିବାବେଳେ ଗହୀରମଥାରେ ୩୪ଟି ଚିହ୍ନଟ ହୋଇଛନ୍ତି। ୨୦୨୩ରେ ୫୬୯ଟି ଛୋଟ(୨ଫୁଟରୁ କମ୍) କୁମ୍ଭୀର ଥିବାବେଳେ ଏହା ଏବେ ୫୮୨କୁ ବୃଦ୍ଧି ପାଇଛି। ସେହିପରି ବର୍ଷିକିଆ ୩୮୮ରୁ ୩୮୭କୁ କମିଥିବାବେଳେ ଜୁଭେନାଇଲ୍ସ ୩୨୫ରୁ ୩୨୭କୁ ବଢ଼ିଛି। ୬ରୁ ୮ଫୁଟିଆ ୧୬୭ଟି କୁମ୍ଭୀର ଥିବାବେଳେ ୩୪୮ଟି ୮ଫୁଟରୁ ଊର୍ଦ୍ଧ୍ବ ବଡ଼ କୁମ୍ଭୀର ଓଡ଼ିଶାରେ ରହିଛନ୍ତି ବୋଲି ଗଣନାରୁ ଜଣାଯାଇଛି।

Powered by Froala Editor