ଭୁବନେଶ୍ୱର : କୋଭିଡ୍‌‌ର ନୂଆ ଭାରିଆଣ୍ଟ ଜେଏନ୍‌‌.୧ କିଛି ରାଜ୍ୟରେ ଆତଙ୍କ ସୃଷ୍ଟି କରିଥିବା ବେଳେ ଆଜି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ସବୁ ରାଜ୍ୟର ସ୍ୱାସ୍ଥ୍ୟ ମନ୍ତ୍ରୀଙ୍କ ସହ କୋଭିଡ୍‌‌ ମୁକାବିଲା ପ୍ରସ୍ତୁତି ସଂକ୍ରାନ୍ତରେ ଆଲୋଚନା କରିବେ।
 କୋଭିଡ୍‌‌ର ନୂଆ ଭାରିଆଣ୍ଟ ଆସିବ ବୋଲି ପୂର୍ବାନୁମାନ କରାଯାଇଥିଲେ ସୁଦ୍ଧା ସେପରି କିଛି ଘଟିନାହିଁ। ମାତ୍ର ଏବେ ଜେଏନ୍‌‌.୧ ଭାରିଆଣ୍ଟ ନୂଆ ବିପତ୍ତି ଡାକି ଆଣିବ ବୋଲି ଆଶଙ୍କା ସୃଷ୍ଟି ହୋଇଛି। କେରଳ ଓ କର୍ଣ୍ଣାଟକରେ ଲୋକମାନଙ୍କ ଜୀବନ ଯାଇଥିବା ସୂଚନା ପହଞ୍ଚଛି। ଏହି ପରିପେକ୍ଷ୍ରୀରେ ଆଗକୁ ବଡ଼ ଦିନ, ନୂଆବର୍ଷ ଓ ବଣଭୋଜି ଋତୁ ଚାଲିଥିବାରୁ ସଂକ୍ରମଣ ବୃଦ୍ଧି ପାଇପାରେ ଓ ଏପରିସ୍ଥଳେ କୋଭିଡ୍‌‌ କଟକଣା ଫେରିବା ସମ୍ଭାବନାକୁ ଏଡ଼ାଇ ହେବ ନାହିଁ ବୋଲି ସ୍ୱାସ୍ଥ୍ୟ ବିଶେଷଜ୍ଞ ମତ ଦେଇଛନ୍ତି।
ରାଜ୍ୟ ସ୍ୱାସ୍ଥ୍ୟସେବା ନିର୍ଦ୍ଦେଶକ ପ୍ରଫେସର୍‌ ବିଜୟ ମହାପାତ୍ର କହିଛନ୍ତି, ନୂଆ ଭାରିଆଣ୍ଟ କେତେ ବିପଜ୍ଜନକ, ତାହା ଅଦ୍ୟାବଧି ସ୍ପଷ୍ଟ ହୋଇନାହିଁ। ତଥାପି ଆମେ ଜିଲ୍ଲା ସ୍ତରରେ ପ୍ରସ୍ତୁତି ଆରମ୍ଭ କରିଛୁ। ଆରଟି-ପିସିଆର୍‌ ଟେଷ୍ଟ ସେଣ୍ଟର ପୁନଃ କାର୍ୟ୍ୟକ୍ଷମ କରାଯାଉଛି। ଡାକ୍ତରଖାନାରେ ଅମ୍ଳଜାନ୍‌‌, ଔଷଧ, କିଟ୍‌‌ ଆଦି ପର୍ୟ୍ୟାପ୍ତ ପରିମାଣରେ ମହଜୁଦ ଅଛି। କେଉଁଠି ବି ସନ୍ଦିଗ୍ଧ ସଂକ୍ରମିତ ଚିହ୍ନଟ ହେଲେ ତାହା ତୁରନ୍ତ ସ୍ୱାସ୍ଥ୍ୟ ବିଭାଗକୁ ଜଣାଇବା ପାଇଁ ଜିଲ୍ଲା ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ସେହିପରି ପଜିଟିଭ୍‌‌ ନମୁନା ଜିନୋମ ସିକ୍ୱେନ୍ସିଂ ବ୍ୟବସ୍ଥା ମଧ୍ୟ ହୋଇଛି। ଯେହେତୁ ଏହି ଭୂତାଣୁର ନୂଆ ପ୍ରଜାତି ସମ୍ପର୍କରେ ଅଧିକ ଜଣାନାହିଁ ସେଥିପାଇଁ ଆମେ ସତର୍କତାମୂଳକ ପଦକ୍ଷେପ ନେବା ଜରୁରୀ ବୋଲି ଡାକ୍ତର ମହାପାତ୍ର କହିଛନ୍ତି।

Powered by Froala Editor