ଅବୁଜା: ନିଜ ଦେଶର ନାଗରିକଙ୍କ ଉପରେ ନାଇଜେରିଆ ସେନା ଭୟଙ୍କର ଡ୍ରୋନ୍‌ ଆକ୍ରମଣ କରିଛି । ଏହି ଘାତକ ଆକ୍ରମଣରେ ୮୫ ଜଣ ସାଧାରଣ ଲୋକଙ୍କ ମୃତ୍ୟୁ ହୋଇଥିବା ବେଳେ ୬୬ରୁ ଅଧିକ ଆହତ ହୋଇଛନ୍ତି । ଉତ୍ତର-ପଶ୍ଚିମ ନାଇଜେରିଆ ଅନ୍ତର୍ଗତ କଡୁନା ରାଜ୍ୟର ଗୋଟିଏ ଗ୍ରାମରେ ଏହି ଆକ୍ରମଣ ହୋଇଛି । ତେବେ ନାଇଜେରିଆ ସେନା ଭୁଲବଶତଃ ଏହି ଆକ୍ରମଣ କରିଥିବା ଜଣା ପଡିଛି । ସେନା ଆତଙ୍କବାଦୀ ଓ ଡକାୟତଙ୍କୁ ଟାର୍ଗେଟ କରିଥିଲା । ହେଲେ ଭୁଲରେ ଗୋଟିଏ ଗ୍ରାମ ଉପରେ ଡ୍ରୋନ୍‌ ଆକ୍ରମଣ କରିଦେଇଥିଲା । ଏହି ଘଟଣାରେ ନାଇଜେରିଆ ରାଷ୍ଟ୍ରପତି ଗଭୀର ଉଦବେଗ ପ୍ରକାଶ କରିବା ସହ ଏହାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ।

ଗତ ରବିବାର ରାତିରେ ଟୁଡୁନ ବିରି ଗ୍ରାମରେ ଏହି ଡ୍ରୋନ ଆକ୍ରମଣ ହୋଇଥିଲା । ସେହି ସମୟରେ ମୁସଲିମ ଧର୍ମଗୁରୁ ପ୍ରଫେଟ ମହମ୍ମଦଙ୍କ ଜନ୍ମଜୟନ୍ତୀ ପାଳନ ପାଇଁ ମୁସଲମାନ ସମ୍ପ୍ରଦାୟର ଲୋକେ ଏକାଠି ହୋଇଥିଲେ । ଠିକ୍ ଏତିକି ବେଳେ ସେନା ଆତଙ୍କବାଦୀ ଓ ଡାକୁମାନଙ୍କୁ ଟାର୍ଗେଟ କରି ଭୁଲରେ ସେହି ଗ୍ରାମ ଉପରେ ସିରିଜ୍ ଡ୍ରୋନ ଆକ୍ରମଣ କରିଥିଲା । ସେନା ସାଧାରଣ ଲୋକଙ୍କୁ ଡାକୁ ଭାବି ନେଇଥିଲା । ଯେଉଁଥିରେ ଅତିକମରେ ୬୬ ଜଣ ଆହତ ହୋଇଥିବା ବେଳେ ୭ ଡର୍ଜନରୁ ଅଧିକ ଲୋକଙ୍କ ମୃତ୍ୟୁ ହୋଇଛି । ଏନେଇ ନାଇଜେରିଆ ଏମର୍ଜେନ୍ସି ମ୍ୟାନେଜମେଣ୍ଟ ଏଜେନ୍ସି ଏକ ବିବୃତ୍ତିରେ ସୂଚନା ଦେଇଛି ।
ମୃତକଙ୍କ ମଧ୍ୟରୁ ଅଧିକାଂଶ ମହିଳା, ଛୋଟ ଛୁଆ ଏବଂ ବୃଦ୍ଧ ରହିଛନ୍ତି । ଏ ପର୍ୟ୍ୟନ୍ତ ୮୫ଟି ମୃତଦେହ ଉଦ୍ଧାର କରାଯାଇ କବର ଦିଆଯାଇଛି । ଏବେ ବି ଆକ୍ରମଣସ୍ଥଳରେ ସର୍ଚ୍ଚ ଅପରେସନ ଜାରି ରହିଛି ।

Powered by Froala Editor